Yupu
3 Evinre mahiku yaale, Yupu aapacerya oloca ni wuulumela nihiku aayariweiye.* 2 Yupu aahi:
3 “Ncakanele nihiku kaayariwaaka,
ni ohiyu yoole tho yaalociwaaya: ‘Ooyariwa mulopwana!’
4 Nihiku nenle nikhale epiiphi.
Muluku ari wirimu, ahipwache nihiku nenle;
Omwaleela ohaaryele nihiku nenle.
5 Nikuxiwe ti epiiphi yooripa phii.
Nihuruweliwe nneeku nooripa na epula;
Yeele enariipiha nihiku yoopopihe nenlo.
6 Ohiyu yoole okuxiwe ni epiiphi yooripaxa;
Nihiku nenle, nihihakalale vamoha ni mahiku a eyaakha,
Naari nihaalakhanyeryiwe ntoko nihiku na miyeeri.
7 Aa, ohiyu yoole okhale woohiyara;
Nave nihiiweyeru okhuwela wa ohakalala.
8 Yaale anuulumela nihiku, yuulumele ohiyu yoole,
Yaale anawerya oviiha Ekonya.*
9 Itheneeri sa mavoroxo iriipihe ohiyu yoole;
Ohiyu yoole ohooneru oxa waya,
Nave ohiyu yoole ohooneru ekamaama ya oxa.
10 Tiwi, ohiyu yoole hiwaawanle milako ya erukulu ya amama;
Naari haniipithinhe ohaawa wi kihoone ni miitho aka.
11 Ntakhara heeni kahaakhwilaaka kirikimuyariwaru?
Ntakhara heeni kahaarimeelaaka kirikinkhumaru mmirimani?
12 Ntakhara heeni amama aakaakhela vameconi vaya
Nave ekaamwiiha mapele aya?
13 Woona wi, vano kii kineera kirikimukona moomaaleleya
Kirupaka ni wiichuuwa
14 Vamoha ni mamwene a veelaponi yavathi ni anamiruku aya,
Yaawo yiitekenle mapuro vano ari milepe,*
15 Naari ni asitokweene yaawo yaarino ooru,
Ipa saya saasaren’ye ni eparata.
16 Naari ntakhara heeni kaahaakhanlaka ntoko mwaana oohororiwa,
Ntoko anamwane yaale ahintoko woona omwaleela?
17 Wuukhwani, wuukhuwa wa alipa oonanara murima onnamala;
Weiwe anniichuuwawo oovelavela.
18 Weiwe, alipa oophariwa ari vamoha mmureceleni;
Awo haniiwa nsu na muchu aakhinyererya olapa.
19 Weiwe, mukhaani ni mutokweene anamulikana,
Nave kapuro ori ootaphuwa wa pwiya awe.
20 Ntakhara heeni Muluku onamvaheiye omwaleela yoole onahooxeya
Ni okumi wa yaale anasooseya murima?
21 Ntakhara heeni awo ananlelaaya okhwa, nto owo ohinaaphwanya?
Awo annathipa yaavyaka owo opwaha muhakhu woovithiwa,
22 Yaawo annachapa vatokovene,
Annahakalala vaavaa anaphwanyaaya nihiye.
23 Ntakhara heeni Muluku onnamvaha omwaleela muchu yoowo orimeeliwe mphiro awe,
Yoowo Muluku omurukurenryeiye makupa oothene?
24 Tiwi, ohiya olya, kiniicha miwiya,
Wuupulela waka onnayeeheya ntoko maahi.
25 Yeeyo yaakoopopiha yookiphwanya,
Nave yeeyo koovaaka yookiphacuwela.
26 Nkaano murecele, naari wiichaala, naari wiichuuwa;
Makacamiho anamvira erwaaka.”