Yupu
24 “Ntakhara heeni Aikuru Soothene ohinatikitheryeiye nihiku nawe na othoriha?
Ntakhara heeni yaale amusuwenle ahinasuwelaaya nihiku nenlo?
2 Aakhalavo achu anasusiha minlaano sa akina;
Awo anniiya mihuwo sa akina yaakanyerya ni sawaya.
3 Awo annamukusa puuru a ikwaasuni*
Nave aanakusa tho emope ya naamukhweli ntoko mweemeseryo.
4 Awo annaakhinyererya oohaawa opwahamo mphironi;
Yaale ahirino nikhaviheryo veelaponi anniipitha wa nthowa na yaawo.
5 Oohaawa annaavya yoolya ntoko apuuru a mutakhwani mu elapo yawuuma;
Awo annaavya yoolya mu elapo yawuuma ntakhara anaaya.
6 Awo annahaca mmacani mwa muchu mukina,*
Nave annamuurula uuva mmacani mwa muchu ootakhala.
7 Awo annaviriha ohiyu eri eepwitikiri ene, ehirino yoowara;
Haanono yawiikhuneelano ntakhara oriirya.
8 Awo annanaanihiwa ni epula ya mmiyaakoni
Annahaamela miyala woona wi haanono nipuro noochawelavo.
9 Mwaana ori ekwaasuni onnaxopholiwa vanipeleni va amama awe;
Nave soowara sa achu oohaawa sinnakusiwa ntoko mweemeseryo.
10 Anneeca epwitikiri ene, ehirino yoowara,
Nave annateexa iwuphu sa soolya evoliwe ene.
11 Awo annalapa mwakuru* ni oviha wene mu ixiri sa maluku;
Annamuhowa uuva, nto naamwi hiihaa annavoliwa nthanana.
12 Mpooma, achu annatitelela wuupulela ekhwaaka;
Achu oophoreyaxa annakhuwela evekaka nikhaviheryo,
Nto Muluku hanoona yeela ntoko echu yoonanara.*
13 Aakhalavo yaawo anamwaryeela omwaleela;
Hanasuwela iphiro sa omwaleela,
Naari mano ochariha inaani sa omwaleela.
14 Mulipa awiipha onnavinya wooxiixelo ene;
Amwiipha yoole ohirino nikhaviheryo ni oohaawa,
Nave ohiyu, onniiya.
15 Miitho a mulipa ooraruwa annaweherya wiila,
Alocaka ariki: ‘Haavo oni akoone!’
Nave onnakhuneela ethoi awe.
16 Mweepiphini, achu annakhucula* ipa;
Othana awo anniiwalela.
Awo hanasuwelaru omwaleela.
17 Wa yaawo wooxiixelo ori ntoko epiiphi yooriipa phii;
Awo annasuwela phaama sawoopiha sa epiiphi yooriipa phii.
18 Nto annakuxiwa mwawaakuveya ni maahi.
Imaca saya inamuulumeliwa.
Awo herwa ekookela imaca saya sa uuva.
19 Hiihaa ntoko elimwi ni oviha onakuxaaya mucarapo otothonwe,
Hiihaa tho Mahiye* annaakuxa yaale achenke!
20 Amama awe* anammucuwala; miyuuku inammoona osiva.
Owo harwa uupuweleliwa tho.
Nave ohookololowa onamuuhiwa ntoko mwiri.
21 Awo annamweerela yoonanara muthiyana ohinayara,
Nave annamuhooxa naamukhwele.
22 Muluku* onampharihela ikuru sawe wi aaviihevo ooweryaxa;
Naamwi yiisiinuwinhe, awo annakhwa minikwa sa okumi aya.
23 Muluku* onnaweemererya wi yiiroromeleke ni wiisoona okhala ookhapeleleya,
Nto miitho awe annavarerya soothene awo anapakaaya.*
24 Awo annacicimihiwa elukuluku tonto nave voocharela annacakanela.
Annakuruxiwa nave annathukumanyiwa ntoko akina oothene;
Annakwasiwa ntoko iwuphu sa soolya.
25 Vano taani onawerya wooniherya wi kamulipa awootha
Naari ovaanya masu aka?”