Yupu
32 Mwawiihiiha, alopwana yaala araru yaahiya omwaakhula Yupu, woona wi owo aari oolekecheya wi aari awookololowa murima.* 2 Nto Elihu, mwaana a Parakeli o Pusi, a emusi ya Rami aatepa onanariwa. Owo aatepa onyeenyeya ni Yupu woona wi owo aaneererya wiisooneiha wi aari awookololowa murima omuhiya Muluku. 3 Owo tho aatepa onanariwa ni asinthamwene araru a Yupu, woona wi hiyaawenrye ophwanya naakhulo, nto yaaloca wi Muluku toonanara murima. 4 Elihu aawehererya wi amwaakhule Yupu, woona wi awo yaari awunnuwa ompwaha yene. 5 Vaavaa Elihu oonneiye wi alopwana yaale araru hiyaarino echu ya waakhula, esara awe yaanyahuwa. 6 Mwawiihiiha, Elihu mwaana a Parakeli, o Pusi, aapacerya oloca ariki:
“Miyaano ka mmiravo,*
Nave nyuwo mwa achu awunnuwelavo.
Mwawiihiiha, mwa ncicimiho kaamaala,
Kihaakuvela wooleelaani yeeyo kisuwenlaaka.
7 Kaahuupuwela: ‘Iyaakha iloce,*
Nave waaca wa iyaakha olaleye miruku.’
8 Nto ti munepa ori mwa achu,
Nwiya wa Aikuru Soothene, yoowo onaavaha osuwelaxa.
9 Wunnuwa pahi honamweeriha* muchu okhala a miruku,
Naari tahi pahiru awuuluvala anasuwela yeeyo eri yaphaama.
10 Vano kinnaloca: ‘Mukiwiriyane,
Mi tho kinahaala oloca yeeyo kisuwenlaaka.’
11 Onani! Kaaweherya wi muloce;
Kaanawiriyana muupuwelo anyu,
Mwaavyaka echu yooloca.
12 Kaanoowiriyanaani phaama,
Nto haavo mmoha a nyuwo owenrye wooniherya wi Yupu oohesa,*
Naari mano waakhula sooloca sawe.
13 Mwawiihiiha muhiloce muriki: ‘Hiyaano na achu amiruku;*
Muluku toni amookolole ohiya muchu.’
14 Yupu hakilocenle masu,
Mwawiihiiha, nkini kimwaakhule ni masu ntoko awinyu.
15 Alopwana ala* aarimeeliwa, haano maakhulo;
Haano echu ekina ya oloca.
16 Kooweherya, nto awo hanaloca;
Awo arimoona weemela, ehirino naakhulo.
17 Vano miyo tho kinamwaakhula;
Kinamooleelaani tho yeeyo kisuwenlaaka,
18 Tiwi kookhalano masu mancipale wi kiloce;
Munepa ori mwa miyo onnakiceenyerya oloca.
19 Mpuwa mwaka, kiri ntoko eviinyu eciyeliwe ehinamumula,
Ntoko mirupa ivyaani sa eviinyu ihanle vakhaani ophuleya.
20 Mukihiye kiloce, wi kikhale ootaphuwa.
Kinamuhula iyano saka ni ovaha naakhulo.
21 Nkimooniherya muchu nthalu;
Naari wooniherya ncicimiho noowoka* wa muchu ori oothene,
22 Tiwi nkisuwenle mukhalelo wa omooniherya muchu ncicimiho noowoka;
Waakhanle wi koheerano, yoole okipanke aahaala okitoloxa mwawaakuveya.