Yupu
35 Elihu aatitelela oloca ariki:
2 “Apwanne muri oolekecheya wi mookhalano rasawu ophiyerya oloca muriki:
‘Kiri awookololowaxa murima ompwaha Muluku’?
3 Tiwi munnaloca: ‘Apwanne munnaphuravo echu wakhala wi kinneera yeeyo eri yawookololowa?*
Apwanne kinnaphuravo echu wa nthowa na ohicheka?’
4 Kinanwaakhulaani nyuwo
Vamoha ni asinthamwene anyu ala.
5 Nwehe wirimu nave moone,
Mvarerye mahuruku, yaawo ari osuluxa woopwahaani nyuwo.
6 Wakhala wi moocheka, muni mmuhooxe hai Muluku?
Wakhala wi soocheka sanyu sohaacereryeya, yoonanara taani munahaalaanyu omweerela?
7 Wakhala wi mwa awookololowa murima, tiheeni munahaalaanyu omvaha yoowo?
Tiheeni owo onahaaleiye waakhela wa nyuwaano?
8 Yoonanara anyu enamvolowela pahiru muchu ntoko nyuwo,
Nave wookololowa wanyu murima onamphuriha mwaana a muchu.
9 Achu annakhuwela wa nthowa na ohooxiwa otokweene;
Awo annakhuwela wi yoopoliwe wa nthowa na olamulelo* wa achu oowerya.
10 Nto haavo onakoha ariki: ‘Ori woowi Muluku, Mulipa Ookipaka Mutokweene,
Yoole oneeriha wi macipo yiipiweke ohiyu?’
11 Owo onnanihusiha waapwaha axinama a veelaponi,
Nave onnaneeriha okhala amiruku opwaha ipalame sa wirimu.
12 Achu annakhuwela, nto owo hanaakhula,
Nthowa na wiirumiha wa achu ootakhala.
13 Mweeparipari Muluku haniiwa okhuwela wasiiyo;*
Aikuru Soothene hanapwacha yeeyo.
14 Hanka nto vooloca sa nyuwaano vaavaa muniikhupanyeryaanyu wi hamunamoona!
Mulacu anyu ori vamiithoni vawe, mwawiihiiha munaphwanela onwehereryaka ni murima woothene.
15 Owo hoolankeeni moosarasareya,
Naari mano opwacha wiirumiha wanyu otokweene.
16 Yupu onnahula eyano awe vasiiyoni vene;
Ahisuwelaka, owo onnaaceera masu.”