Yupu
37 “Wa nthowa na yeela, murima aka onnathukumela
Nave onnacupha munipuroni mwaya.
2 Muwiriyane phaama nsu nakuru na Muluku
Ni oruma wa yoowo onakhuma mwaano mwawe.
3 Owo onnakumiha oruma weiwo vathi veerimu
Nave onnarumiha itari sawe ophiyerya weiwo elapo ekotenlaayawo.
4 Voocharela onniiweya oruma;
Owo onnoopa itari ni nsu ntokweene,
Nave itari hinnamaala woopa vaavaa nsu nawe nniiweyaaya.
5 Muluku onnoopa itari ni nsu nawe mmukhalelo wootikhiniha;
Onnapaka ichu itokweene seiho inapwaha wiiwexexa wahu.
6 Tiwi owo onnaloca wa mucharapo: ‘Omorele vachayani,’
Nave wa epula etokweene: ‘Orupe ni ikuru soothene.’
7 Muluku onnamaaliha miteko soothene sa achu,*
Wi achu oothene esuwele muteko Awe.
8 Axinama a mutakhwani annavolowa mmakhuku aya
Nave annatitelela okhala mmapuro aya awiipithamo.
9 Echeku yoowali ennakhuma munipuroni mwaya,
Nave echeku yoomoko ennaruuha oriirya.
10 Ni nwiya wa Muluku, maahi annuupaana,*
Nave maahi mancipale annuupaana.
11 Owo onniireiha meeku maahi;
Onnamwaramwaxa overunya mmeekuni;
12 Awo anneeca moorukurerya ehooleliwaka ni yoowo;
Awo annapaka veelaponi yavathi soothene owo onaalamuleleiye.
13 Owo onneeriha wi yeeyo yeereye, moohipwacha waari olaka,* naari oruuhela mphurelo elapo yavathi,
Naari wooniherya osivela woororomeleya.
14 Nwiriyane ela Yupu;
Mmaale nave muupuwelele miteko sootikhiniha sa Muluku.
15 Apwanne moosuwela mukhalelo Muluku onavareryeleiye* meeku
Ni mukhalelo owo oneeriheiye overunya okhuma waaryaka muneekuni nawe?
16 Apwanne moosuwela mukhalelo meeku anavavaaya osulu?
Iha miteko sootikhiniha sa Yoole orino masuwelelo awaakhwanela.
17 Ntakhara heeni soowara sanyu sinnaviha
Vaavaa echeku yoohico enamaalihaaya elapo?
18 Apwanne nyuwaano ni yoowo, munanwerya waatalela erimu,
Etikitheryeya ntoko espeelyu ya emetaale?
19 Munleele yeeyo nnaphwanelaahu omuleela;
Hiyaano hinnawerya omwaakhula, nthowa nawi nri mweepiiphi.
20 Apwanne aleeliwe wi kinchuna olocano?
Naari apwanne muchu ooloca echu yeeyo aaphwaneleiye oleeliwa?
21 Achu hanoonaru mano omwaleela,*
Naamwi owo waaryaka wirimu,
Ophiyerya echeku evinre ni oviihawo meeku.
22 Makupa oomoko onnarwawo waarya wootikhiniha ntoko ooru;
Otokweene wa Muluku ti wawoopiha.
23 Tahi wooweryeya omwiiwexexa Aikuru Soothene;
Owerya wawe otokweene
Nave hannanariha ekhaikhai awe ni wookololowa wawe wawaaca.
24 Mwa yeela, achu anaphwanela omoovaka.
Tiwi Muluku hanaweemererya achu yaale aniisoona okhala a miruku.”*