Yupu
18 Piltati o Xuhi aahaakhula ariki:
2 “Ophiyerya liini muneeraanyu mutitelele oloca ichu seiha?
Mooniherye wiiwexexa, nave voocharela nnahaala ovaanela.
3 Ntakhara heeni naahaalaahu wooniwaka ntoko axinama
Ni weeriwa alolo* vamiithoni vanyu?
4 Naamwi mwiihooxaka ni esara anyu,
Apwanne elapo enahaala onyanyaliwa wa nthowa nanyu,
Naari miyala inahaala othaama mmapuro aya?
5 Aa, omwaleela wa aweera soonanara onamuxipihiwa,
Nave nikalume na mooro awe nnamuhiya waarya.
6 Chiryeene omwaleela ori mmixakalani mwawe onamuripa,
Nave epanthi eri mmuxakalani mwawe enamuxipihiwa.
7 Meecelo awe akuru anamukhuveihiwa,
Nave marehereryo awe ene anammuuwiha.
8 Tiwi, inaani sawe inammukeriha va muraakhoni,
Nave owo onamuhuwahuwa ni omorela vamulapani.
9 Muraakho onammuheya nsica;
Ntapha nnammuheya yoowo.
10 Wookhalavo mukoi wuuheeliwe vacheyani wi aheiwe yoowo,
Nave wooreiwavo muraakho mphironi mwawe.
11 Sawoopiha sinnamututuxa yoowo makupa oothene
Nave sinnamwiikara vakhivirukhiviru.
12 Ikuru sawe sinnavukuwa,
Nave epahu enarwa emweeriha otuthunya.
14 Owo onnakuxiwa vamuxakalani vawe vookhapeleleya
Nave onnakerihiwa wa mwene awoopiha.*
15 Achu oohisuweliwa* enarwa ekhala mmuxakalani mwawe
Enxofre onarwa amwaramwaxiwa vaate vawe.
16 Mitathaari sawe inamuuma vathi,
Nave mirai sawe inamunyaala osulu.
17 Wuupuweleliwa wawe onarwa ocakanela veelaponi
Nave nsina nawe hinisuweliwa* muramphani.
18 Owo anarwa akuxiwa woomwaleelani akerihiwa weepiphini
Nave onarwa iikariwa veelaponi yavathi.
19 Hakhalano anamwane naari muyareriwo variyari va achu a nloko nawe,
Nave hakhalavoru oni oopowe mu nipuro nenlo aakhaleiyevo.*
20 Naphiya nihiku nawe, achu a weiwo nnamorelawo nsuwa enarwa etikhina,
Nave achu a makupa weiwo nnakhumawo nsuwa enarwa ethukumela nthowa na woova.
21 Ti yeela eneereya ni mixakala ya achu ootakhala murima
Ni mapuro a yaale ahimusuwenle Muluku.”