Salmu
Ncipo. Salmu a anamwane a Kora.
48 Yehova ti mutokweene nave chiryeene tonaphwanela ocicimihiwa
Mu epooma ya Muluku ahu, omwaako awe waweela.
2 Wooreera mu orakama waya, ohakalala wa elapo yoothene yavathi,
Ti Mwaako Siyoni makupa oomoko,
Epooma ya Mwene Mutokotoko.
3 Mmiconco soolipihiwa sa epooma,
Muluku aahiisuweliha ntoko nipuro noochawelavo nookhapeleleya.*
4 Vawi nkoonani! Mamwene yaahithukumana;*
Awo yaaheeca vamoha.
5 Vaavaa yoonnaaya epooma, awo yaahitikhiniheya.
Yaahaleeliheya nave echawa wa nthowa na woova.
6 Weiwo othukumela waahaarweela,
Yaahoona wiicela ntoko muthiyana onayara.
7 Ni echeku ya makupa onakhumawo nsuwa munnaanyaanya apophoro o Tarsu.
8 Yeele niiwalaahu elociwaka, vano nohoona akaneene ahu
Mu epooma ya Yehova a anakhoco, mu epooma ya Muluku ahu.
Muluku onarwa atikitherya yeeyo okhala wookhala. (Selaha)
9 Ninnuupuwelela osivela wanyu woororomeleya, khwoo Muluku,
Mpuwa mwa empa anyu.
10 Ntoko nsina nanyu, khwoo Muluku, ncicimiho nanyu
Ninnaphiya weiwo elapo ekotenlaayawo.
Ntata nanyu noolopwana noosareya ni wookololowa.
11 Mwaako Siyoni ohakalale,
Ipooma so* Yuta ihakalale wa nthowa na mathorihelo anyu.
12 Mweece mmwaapheelaka Siyoni; mweece mmurukureryaka yoowo;
Mwaalakhanye miconco sawe.
13 Mvarerye ixiri saya soolipa.*
Mwaalikhele miconco sawe soolipihiwa,
Wi nwerye oloca sa seiho wa miyareriwo sa muhoolo.
14 Tiwi Muluku yoola, tori Muluku ahu okhala wookhala.
Owo onamunihoolelaka mahiku oothene.*