Salmu
Wa muhooleli a macipo, mmukhalelo wa Mahalate.* Masikili.* Salmu a Tavite.
53 Mulolo* onnaloca mmurimani mwawe:
“Haawowo Yehova.”
Saweera sawe soonanara ti sootakhala ni soothanyeya;
Haavo ooneera yaphaama.
2 Nto Muluku onnaweha vathi, ovinyerya wirimu, wi aavarerye anamwane a achu,
Wi oone waakhanle wi ookhalavo muchu orino wiiwexexa,* waakhanle wi ookhalavo muchu onamwaavya Yehova.
3 Oothene aahuwela;
Oothene tootakhala.
Haavo onapaka yaphaama,
Naari mmoharu mano.
4 Mwa achu ootakhala, apwanne haavoru mmoha mano oniiwexexa?
Annaakhuura achu aka ntoko wi anakhuura epau.
Awo hanamwiichana Yehova.
5 Nto awo anamusareya ni woova otokweene,
Woova yoowo ahintonkaaya woona,*
Ntakhara Muluku onahaala omwaramwaxa makhuva a yaale anoohiphela.*
Woona wi Yehova ohaakhooca, weyo onanwuuliha muru.
6 Nivuluxo na Isarayeli nrwe o Siyoni!
Vaavaa Yehova oneereiye akookihe muloko awe wookapuroni,
Yakopo achape, Isarayeli ahakalale.