Salmu
106 Mmucicimihe Yehova!*
Mmuthamalele Yehova, woona wi owo taphaama;
Osivela wawe woororomeleya onniikhalelaru okhala wookhala.
2 Taani onawerya olaleya saweera soothene soowerya sa Yehova
Naari olaleya saweera sawe soothene soocicimiheya?
3 Oohakalala ti yaawo aneerano ichu mweekhaikhai,
Yaawo ilukuluku soothene anapaka yeeyo eri yaphaama.
4 Mukuupuwele miyo, khwoo Yehova, vaavaa munooniheryaanyu mahala* wa achu anyu.
Mukikhapelele ni saweera sanyu sa ovuluxa,
5 Wi miyo kilawihe oreera murima yoowo munooniheryaanyu wa oothanliwa anyu,
Wi kihakalale vamoha ni nloko nanyu,
Wi koocicimiheeni mwawiirumiha, vamoha ni yoohiyeryiwa anyu.
6 Noocheka ntoko makholo ahu;
Noohesa; noheera yeeyo eri yoonanara.
7 Makholo ahu o Yikuputu hiyaathamalenle* saweera sanyu sootikhiniha.
Hiyaawuupuwenle osivela wanyu woororomeleya otokweene,
Nto yaamwaryeya oxerexere wa eniya, Eniya Yooxeerya.
8 Nyenya owo aahaavulusa wa nthowa na nsina nawe,
Wi asuwelihe owerya wawe.
9 Owo aahisamela Eniya Yooxeerya, nave eyo yaahuuma;
Owo aahaahoolela mu eniya yawiixa ntoko wi yaavira mu ntakhwa.
10 Owo aahaavuluxa mmatani mwa yaale yaawiica,
Nave aahiwoopola mmatani mwa mwiicani.
11 Maahi yaahaamirya amwiicani aya;
Haavo mmoharu a yaawo aavulunwe.*
12 Mwawiihiiha, yaakhalano nroromelo mu soororomeliha sawe;
Awo yaapacerya omwiipela macipo.
13 Nto yaahicuwala mwawaakuveya yeeyo owo eenreiye;
Hiyaaweherenrye wi esuwele ohoolela wawe.*
14 Otakhwani awo yaahooniherya nchuno naya na nrima;
Yaahimweeha Muluku otakhwani.
15 Owo aahaavaha yeeyo yaavenkaaya,
Nto ohoolo waya aahaaruuhela ereca yeeyo yaawiiphale.*
16 Awo yaahimukhalela nrima Mose mmuxakalani,
Nave tho yaahimukhalela nrima Aroni, aweela a Yehova.
17 Mwawiihiiha, echaya yaathaleya nave emmirya Tatani
Yaamirya tho yaale yaathukumanne ni Apiramu.
18 Mooro waavarela veeri va nikhuuru naya;
Makalume yaaweeyela achu oonanara murima.
19 Yaampaka mwaasaana amope o Horepi
Nave yaakokhora vamiithoni va yoophwaniherya ya emetaale;*
20 Yaatorokaniha ovuwa waka
Ni yoophwaniherya ya emope yeeyo enalya manaxi.
21 Yaamucuwala Muluku, Moopoli aya,
Yoowo aapanke ichu itokweene o Yikuputu,
22 Miteko sootikhiniha mu elapo ya Hami,
Ichu sawoopiha mu Eniya Yooxeerya.
23 Owo aahanle vakhaani olamulela wi etoloxiwe,
Nto Mose, oothanliwa awe, aavekela wa yoowo*
Wi akurumuxe esara awe yootoloxa.
24 Voocharela awo yaahinyemula elapo yooreera;
Hiyaarino nroromelo mu yoororomeliha awe.
25 Yaatitelela waapa mmixakalani mwaya;
Hiyaawiiwelenle nsu na Yehova.
26 Mwawiihiiha, owo aaviha ntata nave alipela
Wi aahaala owiipha mu ntakhwa;
27 Owo aahaala oweeriha anamwane aya okhwa variyari va maloko,
Nave aahaala waamwaramwaxela mu ilapo ikina.
28 Voocharela awo yaapacerya omulapela* Pala o Peyore
Nave yaalya mikucho saaveleeliwa wa alipa ookhwa.*
29 Awo yaamuroxa Muluku ni saweera saya,
Nave epahu yaapacerya veeri vaya.
30 Nyenya, vaavaa Fineya aavinnyeiye ni eeravo echu,
Epahu yaamaala.
31 Nave owo aaheeriwa okhala awookololowa,
Wa miyareriwo soothene okhala wookhala.
32 Awo yaahimuroxa Yoowo va maahi o Meripa,*
Nave wa nthowa naya, Mose aahooxeya;
33 Awo yaamunyeenyeiha yoowo,*
Nave owo aaloca ni iyano sawe ahuupuwelenle.
34 Awo hiyaawiimphe achu,
Hiiha ntoko Yehova aalamulenleiye.
35 Nto awo yaahiipwexiiherya ni maloko
Nave ehuserya sookhovelela saya.
36 Yaanalapela soophwaniherya saya,
Nave iho saahikhala muraakho wa yaawo.
37 Yaanaveleela anaaya aasithiyana ni aasilopwana
Ntoko mikucho wa masololo.
38 Yaanayeeha nikhami nihirino nthowa,
Nikhami na anaaya aasilopwana ni aasithiyana,
Yaawo yaavahaaya ntoko mikucho wa soophwaniherya so Kanani;
Nave elapo yaananarihiwa ni oyeehiwa wa nikhami.
39 Awo yaakhala ooripiheya wa nthowa na miteko saya;
Yaapaka ocapaheya woomunepani wa nthowa na saweera saya.
40 Mwawiihiiha, esara ya Yehova yaavarela wa achu awe,
Nave owo aapacerya othanya yoohiyeryiwa awe.
41 Aahaaveleela wiiliwiili wa maloko,
Wi yaale yaawiica yaalamuleleke yaawo.
42 Amwiicani aya yaanaahooxa,
Nave awo yaaveleeliwa wa owerya waya.*
43 Ikwaha sincipale owo aanawoopola,
Nto awo yaanamwaryeya nave hiyiiwelela,
Nave yaanuulihiwa muru wa nthowa na yoohesa aya.
44 Nyenya owo aanoona ohooxeya waya
Nave aaniiwa okhuwela waya ntakhara nikhaviheryo.
45 Wa nthowa naya, owo anuupuwela nlakano nawe;
Nave aanoona wiicela* aceenyeryiwaka ni osivela wawe woororomeleya otokweene.*
46 Aneeriha wi oothene yaale yaaweera okhala akapuro
Yaamoreleke ikharari.
47 Munivuluxe, khwoo Yehova, Muluku ahu,
Munithukumanye orweela wa maloko,
Wi niwerye othamalela nsina nanyu naweela
Ni okhalano ohakalala otokweene mu woocicimihaani.*
Acicimihiwe Yehova!*