Salmu
LIIVURU ANEETHANU
(Masalmu 107-150)
107 Mmuthamalele Yehova, woona wi owo taphaama;
Osivela wawe woororomeleya onniikhalelaru okhala wookhala.
2 Mwaaleele yaawo yoopoliwe* ni Yehova,
Yaawo owo owooponleiye mmatani* mwa mwiicani,
3 Yaawo owo aathukumannyeiye orweela mu ilapo,
Ovinyerya onakhumawo nsuwa ni nnaneelaayawo,
Ohico ni omoko.
4 Awo yaahuwahuwa mu elapo yawuuma, mutakhwani;
Hiyaaphwannye ephiro yaakeeriha o epooma yeeyo awo yaahaalaaya okhalakawo.
5 Awo yaavoliwa etala nave yaakhalano nthanana;
Yaamalavo* nthowa na okoma.
6 Yaanakhuwela wa Yehova mu ohooxeya waya;
Owo aanawaakiha wa makacamiho aya.
7 Owo aahiweeriha weeca mu ephiro yoophwanelela,
Wi ephiye mu epooma yeeyo yaahaalaaya okhalakawo.
8 Achu emuthamalele Yehova wanthowa na osivela wawe woororomeleya
Ni wa nthowa na miteko sawe sootikhiniha onaweereleiye anamwane a achu.
10 Akina yaakhala mu epiiphi yooriipa phi,
Emakiwe mu wuukhuwa ni mu ikurenti.
11 Tiwi awo yaamwareela masu a Muluku;
Hiyaaciciminhe ekano ya Awiirimurimu.
12 Mwawiihiiha, owo aalamwiha mirima saya moorweela wa waaruuhela makacamiho;
Awo yaakwaculeya nave haarivo mmoharu a waakhaviherya.
13 Awo yaakhuwela wa Yehova ntakhara nikhaviheryo mu wuukhuwa waya;
Owo aahaavuluxa wa makacamiho aya.
14 Owo aaweeriha okhuma mu epiiphi etokweene
Nave aanyaanya ikurenti saya.
15 Achu emuthamalele Yehova wa nthowa na osivela wawe woororomeleya
Ni wa nthowa na miteko sawe sootikhiniha onaweereleiye anamwane a achu.
16 Tiwi owo aapwesa masele a muchove
Nave aathikila iwalelo sa muthipo.
17 Awo yaari alolo nave yaahooseya
Wa nthowa na soocheka saya ni soohesa saya.
19 Awo yaanakhuwela wa Yehova ntakhara nikhaviheryo mu wuukhuwa waya;
Owo aanaavuluxa wa makacamiho aya.
20 Owo aanarumiha masu awe nave aanaapenuxa,
Nave aanaavuluxa wa nlici nenlo awo yaamorelaayamo.
21 Achu emuthamalele Yehova wa nthowa na osivela wawe woororomeleya
Ni wa nthowa na miteko sawe sootikhiniha onaweereleiye anamwene a achu.
22 Mvahe mikucho sa mathamalelo
Nave mulaleye miteko sawe ni okhuwela woohakalala.
23 Yaale anapaka mikwaha mu ephareya ni apophoro,
Anaapaka anakoso mmaahi mancipale,
24 Annoona miteko sa Yehova
Ni miteko sawe sootikhiniha mphareya;
25 Awo annoona mukhalelo echeku yawuupa enapaceryaaya moorweela wa masu awe,
Yeeyo enaviiha macumuxa a mphareya.
26 Awo annawela ophiyerya osulu;
Nave annakhuruwela vathi va macumuxa.
Variyari va yawoopiha, olipa waya murima* onnamala.
27 Annakhala oohaleeliheya nave annaphirikeya ntoko mivona,
Nave mavyakelo aya oothene hanakhalano mphurelo.
28 Annakhuwela wa Yehova mu wuukhuwa waya,
Nave owo onnaavuluxa wa makacamiho aya.
29 Owo onnakurumuxa echeku yawuupa;
Macumuxa a mphareya annamaala.
30 Awo annahakalala vaavaa macumuxa anamaalaaya,
Nave owo onnaahoolela o nipuro oneemelawo apophoro anachunaaya,
31 Achu emuthamalele Yehova wa nthowa na osivela wawe woororomeleya
Ni wa nthowa na miteko sawe sootikhiniha onaweereleiye anamwane a achu.
32 Awo emvuwihe veeri va achu athukumanne
Nave emucicimihe variyari va asiitokweene athukumanne.*
33 Owo onnatatuxa mihice okhala ntakhwa,
Ni anaacuucu a maahi okhala elapo yawuuma,
34 Elapo yawuucelana okhala elapo yoohivaha sawiima, yamaakha,
Wa nthowa na otakhala wa yaawo anakhala mwemmo.
35 Owo onnatatuxa matakhwa okhala machiya a maahi asaren’ye marekele,
Ni elapo yawuuma okhala anaacuucu a maahi.
36 Onnaweeriha achu oovoliwa okhala weiwo,
Wi etekewo epooma yeeyo anahaalaaya okhalakawo.
37 Awo annalima imaca nave annaala miri sa uuva
Seiho inavaha sawiima sawaaca.
38 Owo onnaareeliha, nave awo annaaceereryeya;
Owo haneemererya wi muhuwo aya ovukuwe.
39 Nto awo annuuluula okhala avakhaani nave annalamwihiwa
Ni ohooxa, epahu vamoha ni makacamiho.
40 Owo onnaayeeherya munyemu achu oocicimiheya
Nave onnaweeriha ohuwahuwa mmatakhwa yaawo ohirimo mphiro.
41 Nto onnamukhapelela* oohaawa wa ohooxa
Nave onneeriha emusi awe okhala yawaaca ntoko muhuwo.
42 Yaale ari awookololowa annoona yeeyo nave annahakalala;
Nto oohookololowa oothene annamaala.
43 Yoole ori a miruku onamuupuwelela ichu seiha
Nave onamuthokororya moopwacha saweera sa osivela woororomeleya wa Yehova.