Salmu

125 Yaale anamuroromela Yehova ari ntoko mwaako Siyoni,

Yoowo ohinawerya ocikinyiwa,

Nto onnatitelela okhala wookhala.

 2 Hiiha ntoko miyaako simurukurenryaaya Yerusalemu,

Hiiha Yehova ohaarukurerya achu awe,

Ovinyerya hiihaano ni okhala wookhala.

 3 Ekopo ya ootakhala hiyiikhalelaru mu elapo yeeyo evahiwe awookololowa,

Wi awookololowa eheereke* yeeyo eri yoonanara.

 4 Khwoo Yehova, nweerele yaphaama yaale ari aphaama,

Yaale ari awookololowa mmurimani.

 5 Vooloca sa yaale anahuwela wi echareke iphiro sookhoromana,

Yehova onahaala waatoloxa vamoha ni amutakhali.