Salmu
Nivekelo na Tavite.
17 Khwoo Yehova, mwiiwe yooveka aka ntakhara ekhaikhai;
Wiriyanani okhuwela waka ntakhara nikhaviheryo;
Mwiiwe nivekelo naka kinapakaaka moohiwoka.
2 Mpake yoolakelela yawookololowa ntakhara miyo;
Miitho anyu yoone yeeyo eri yawookololowa.
3 Moovareryela murima aka, mookaalikhela ohiyu;
Nyuwo mookirehererya,
Munamoona wi nkuupuwelenle weera echu yoonanara,
Nave eyano aka hechenkeru.
4 Vooloca sa miteko sa achu,
Mwawiiwanana ni masu a mwaano mwanyu, kinnasepa iphiro sa achu a nlala.*
5 Meecelo aka etitelele mu iphiro sanyu
Wi manaani aka ehikwaculiwe.
6 Kinnawiichanaani, woona wi nyuwo munarwa mukaakhula, khwoo Muluku.
Mutheteye ewaru anyu wa miyo.* Mwiiwe masu aka.
7 Mooniherye osivela wanyu woororomeleya mmukhalelo wootikhiniha,
Khwoo Mvuluxa a yaale anaavya okhapeleleya omoono anyu woolopwana
Yaachawaka yaale anoorukunuwelaani nyuwo.
8 Mukikhapelele ntoko erukuruku ya miitho anyu;
Mukiipithihe mmuuruxi wa makuphelo anyu.
9 Mukikhapelele wa achu oonanara murima yaawo anakihiphela,
Wa amwiicani aka awiipha* yaawo anakirukurerya.
10 Awo tawuuma murima,*
Ni eyano aya annaloca mwawiirumiha;
11 Vano awo annanrukurerya;
Annaavya ekari wi enimorihe.*
12 Mmoha ti mmoha a yaawo ori ntoko mwaco ooluwa, onachuna omwasanya* echu ophanreiye.
Ntoko mwaco akuru iipinthe va nipuro nawiipithavo.
13 Vinyani, khwoo Yehova, wi muwaneno ni mmuuwihe;
Mukoopele* ni nlema nanyu, wa yoole ori oonanara murima;
14 Mukoopole ni ntata nanyu, khwoo Yehova,
Wa achu a elapo yeela,* yaawo nikupa naya nri mu okumi yoola,
Yaawo munaasareihaanyu ni ichu sanyu saphaama munavahereryaanyu
Nave anaahiyerya anamwane aya ancipale yoohiyeryiwa.
15 Nto wa miyaano, kinarwa koona ethoi anyu mwawookololowa;
Kinnaakhwaneliwa kaavinyaka vamiithoni vanyu.*