Ncipo na Solomoni
4 “Chiri, wootepa oreera, oosiveliwa aka!
Chiri, wootepa oreera!
Miitho aa ari ntoko ale a ekakaiya* wiikhunenle ni eveewu aa.
Miihi aa ari ntoko nikhuuru na ipuri
Seiho inakhuruwa o miyaako so Kiliyati.
2 Miino aa taweela ntoko muhuwo wa ipucepuche icemmwe hiihaanoru
Yoowo onakhuma weiwo waarapihiwaayawo;
Muhuwo woothene oyanre maphapo,
Nave hiyaavo emuyelenle mwaasaana aya.
3 Iyano saa iri ntoko oxalo woophilivila,
Nave oloca waa ti woosiva.
4 Exiko aa eri ntoko muconco wa Tavite,
Yoowo otekiwe ni maluku athataanyiwe* phaama,
Othomeiwevo sawiisaakihano sawaakhwana ncikhwi nimoha,*
Sawiisaakihano soothene soovilikana sa anakhoco oowerya.
5 Mapele aa meeli ari ntoko asaana eeli a naahe,
Anaahe ayariwe maphapo,
Yaawo analya variyari va ithutu.”
6 “Ehaakumve woopa echeku ya nihiku* nave muuruxi ohichanwe,
Kinamuyawo o mwaako wa miira
Ni wa ekumukumu ya oliipanu.”
7 “Wootepa oreera oosiveliwa aka,
Hiwaavo onananraawevo.
8 Nikhuruwele vamoha o Lipanu, oosiveliwa* aka,
Nikhuruwele vamoha o Lipanu.
Okhuruwe va mwaako wa Amana,*
Va mwaako wa Senir, va mwaako wa Hermoni,
Okhuruwe mmakhukuni a amwaco, mmiyaakoni sa ahavara.
9 Wookikuxa murima murokora aka, oosiveliwa* aka,
Wookikuxa murima okiweharu omoha,
Nnikupa nimoha pahi na kolaare aa.
10 Okichuna waa ti waphaama murokora aka, oosiveliwa aka!
Okichuna waa ti waphaamaxa opwaha eviinyu;
Nave muhiriri aa ti wa wunkhela opwaha sawunkhela soothene!*
11 Iyano saa, oosiveliwa* aka, sinnaconya enuwi,
Vathi va nlumi naa yookhalavo enuwi ni mukaka,*
Wunkhela wa soowara saa ori ntoko wunkhela wa Lipanu.
12 Murokora aka, oosiveliwa* aka, ori ntoko emaca yooreera* ewaliwe;
Emaca yooreera* ewaliwe, ehime ewaliwe.
13 Weyo* ori ntoko emaca yooreera* osaren’yemo miri sinavaha sawiima,
Ni sawiima sincipale soosiva, vamoha ni heena ni miri sa naartu,
14 Naartu ni asafarawu, kalamu* ni kanela,
Vamoha ni miri soothene so Lipanu, miira ni aloyesi,
Vamoha ni sawunkhela soothene sookhweleya.
15 Weyo wa naacuucu a emaca yooreera, ehime ya maahi oosiva,
Ni mihice inarwa o Lipanu.
16 Vinya, khwoo echeku yoomoko;
Rwaa, khwoo echeku yoohico.
Woopele moomaleleya emaca aka yooreera,
Wi wunkhela waya omwaramwaxeye.”
“Oosiveliwa aka avolowe mu emaca yooreera
Nave alye sawiima saya soosiva.”