Ncipo na Solomoni
5 “Koovolowa mu emaca aka yooreera,
Murokora aka, oosiveliwa* aka.
Koohepha miira aka ni sawunkhela saka.
Koolya enuwi ya oravo aka;
Koowurya eviinyu aka ni mukaka* aka.”
“Lyaani, asinthamwene oosiveliwa!
Nwurye nave muhapaliwe ni osivela!”
2 “Koorupelavo, nyenya murima aka horumpe.
Kinnamwiiwa oosiveliwa aka amanaka nsele!”
“Okihulele, murokora aka, oosiveliwa aka,
Ekakaiya* aka yoophaameya!
Tiwi muru aka woonaana nnikami;
Miihi aka ahiimela nikami na ohiyu.”
3 “‘Koorula yoowara aka.
Kiware wanaawiili?
Koorapiha inaani saka.
Kixuxaarihe wanaawiili?’
4 Oosiveliwa aka ooviihavo ntata nawe va ephaka ya mulako,
Nave murima aka waathukumela wa nthowa nawe.
5 Kaavinya wi kimuhulele oosiveliwa aka;
Mata aka yaanaconya miira,
Nave ikatha saka saanaconya makhurwa a miira,
Yaawo yaawoolela va ekowelu ya efexatura.
6 Kaamuhulela oosiveliwa aka,
Nto oosiveliwa aka aapwaha, arowa.
Kaatepa wuukhuwa vaavaa owo aacimunleiye.*
Kaamwaavya, nto nkaamphwannye.
Kaamwiichana, nto owo haakaakhunle.
7 Alipeleli yeeceeca va epooma yaakiphwanya.
Awo yaakimana, ekiphoreiha.
Alipa oowehererya ixiri yaakaakha lensu* aka oorekama.
8 Nyuwo anamwane aasithiyana o Yerusalemu, kinnoovekaani wi mulipele:
Mwamphwanya oosiveliwa aka,
Mmuleele wi miyaano kinnakhwa nthowa na osivela.”
9 “Tiheeni enamweeriha oosiveliwa aa okhala oophwanelela ompwaha muchu mukina,
Weyo ooreeraxa waapwaha athiyana akina?
Tiheeni enamweeriha oosiveliwa aa okhala oophwanelela ompwaha muchu mukina,
Wi onlipeliheke hiihaa?”
10 “Oosiveliwa aka tooreera ni akuru;
Variyari va alopwana macikhwi khumi* owo tonasuwanyeya.
11 Muru awe ori ntoko ooru, ooru aphaamaxa.
Mirai sa miihi awe sinnacikinyeya ntoko mayale,*
Tooriipa ntoko nakhuku.
12 Miitho awe ari ntoko ikakaiya* iri muxerexere wa muhice,
Sirapaka mmukakani,*
Siichuuwaka muxerexere wa nchiya nsaren’ye maahi.*
13 Marama awe ari ntoko miri sinavaha sawunkhela,
Ntoko malaxi awunkhela yuukeliwe.
Iyano sawe iri ntoko ithutu, seiho sinaconya makhurwa a miira.
14 Ikatha sa mmatani mwawe ti sa ooru, ireheryiwe ni krisoolitu.
Erukulu awe eri ntoko niino na echepo nihuruweliwe ni safira.
15 Meco sawe iri ntoko apoco a maarmore yaawo atikitheryiwe mmathipelo a ooru aphaamaxa.
Wooneya wawe ori ntoko Lipanu, ni oohilikanyiheya ntoko miri sa seetru.
16 Eyano awe ti yoosivaxa,
Nave soothene vooloca sa yoowo sinnakeeriha omuchunaxa.
Nyuwo anamwane aasithiyana o Yerusalemu, ola ookhweleya aka, ola oosiveliwa aka.”