Afilipi
3 Wookuchulani anna, titelelani ohakalala mwa Apwiya. Tahi yookacamiha wa miyo woorepelaani ichu imohamoha, nave eyo enanwaakihaani.
2 Mwiikasoopeke ni anapwa; mwiikasoopeke ni yaale aneera soonanara; mwiikasoopeke ni yaale anacicimiherya othikiliwa. 3 Vawi, arino othikiliwa weeparipari ti yeehu nnaphara muteko waweela moorweela wa munepa wa Muluku nave ninniirumiha mwa Yesu Kristu, nto hinnatikitherya nroromelo nahu mwa mwiili. 4 Nyenya, ompwaha muchu ori oothene, miyaano kookhalano mathowa a ororomela mmwiilini.
Aarivo muchu mukina onuupuwela wi ookhalano mathowa a ororomela mmwiilini, miyaano kootepano: 5 kithikiliwe mu nihiku naneethanu nararu, ka nloko na Isarayeli a nihimo na Penxami, ka Muhepri ooyariwa ni Ahepri; vooloca sa malamulo ka Mfarisi; 6 vooloca sa mvai kaahiikara muloko; vooloca sa okhala awookololowa mwawiiwanana ni malamulo, kaahiiseera oohikhalano nthowa. 7 Mwawiihiiha, ichu koonaaka okhala sa esisapo wa miyaano kinoona okhala etheru ene* wa nthowa na Kristu. 8 Opwaha yeela, kinnoona chiryene ichu soothene okhala etheru ene wa nthowa na esisapo etokweene ya masuwelelo a Kristu Yesu Apwiya aka. Vanthowa na yoowo, kiheemeererya oyeleela ichu soothesene nave kinoona okhala ikokhola* wi kimwaakhele Kristu 9 ni okhala awawe. Wookololowa waka, honarweela nthowa na wiiwelela soothene sa Mmalamulo. Nyenya onathipeleya mu omuroromela Kristu. Wookololowa yoola onarweela wa Muluku nave onathipeleya mu nroromelo. 10 Yoochuna aka ori omusuwela Kristu ni owerya wa oviihiwa wawe mookhwani ni wuukano vamoha mu ohooxiwa wawe keemereryaka okhwa ntoko yoowo, 11 wi koone waakhanle wi kinahaala waakhela oviihiwa mookhwani woopacerya.
12 Tahi wi kirimwaakhela yeeyo, naari kirimukhala oophaameya, nyenya kinniilipixerya wi, wakhala wooweryeya, kaakhele yeeyo Kristu Yesu okithanlenleiye.* 13 Asinnaka, nkiniisoona wi kohaakhela nchuwelo; nyenya echu kineeraaka ti ela: Ocuwala ichu sa muculi ni wiinyomola wi kiphwanye ichu sa muhoolo. 14 Kinniilipixerya wi kiphwanye yoolakelela ya waakhela nchuwelo na wiichaniwa wa wirimu onarwa wa Muluku mwa Kristu Yesu. 15 Mwawiihiiha, oothene hiyo nri oolipa omunepani, nikhaleno moonelo mmohamoha yoola; nave wakhala wi mmoha a nyuwo onuupuwela moohiyana, Muluku onamooneiha moonelo woophwanelela.* 16 Vano, moohipwacha oya wahu vahoolo, nititelele ochara meecelo yaala mamohamoha.
17 Asinnaka, khalani ookitakiherya miyo nave mwaavareryeke yaale aneeca mwawiiwanana ni yootakiherya ntikithenryaahu wa nyuwo. 18 Woona wi aakhalavo ancipale yaawo aneeca ntoko amwiicani a mwiri* wa Kristu. Yaawo kaaromolaaka wiiliwiili, nyenya vano kinaaromolaaka kinlaka. 19 Makuchuwelo aya otoloxiwa, muluku aya ti soochuna saya, anniirumiha ni ichu seiho yaaphwanelaaya wuuliwaakano muru nave annatikitherya muupuwelo aya mu ichu sa veelaponi. 20 Owaahu wirimu, weiwo nnaweheryaahuwo omwaakhela mvuluxa, Apwiya Yesu Kristu. 21 Owo onahaala otoroka mwiili ahu woovelavela wi alikanyihe* ni mwiili awe woocicimiheya moorweela wa ikuru sawe itokweene seiho onalamuleleiyeno ichu soothene.