Wupulula
10 Kaamoona munkeelo mukina oowerya akhuruwaka wirimu, ahuruweliwe* nneeku. Yaakhalavo ekhwiini vamuru vawe, ethoi awe yaari ntoko nsuwa, meco sawe* saari ntoko apoco a mooro, 2 nave owo aakhalano mmatani mwawe eroolu ekhaani yeeyo yaari yoohuleya ene. Mweco awe woolopwana aanyikalano ephareya, nto mweco awe woothiyana aanyikalano echaya, 3 nave aakhuwela ni nsu noovuwa hiiha ntoko wunla wa mwaco. Vaavaa owo aakhuwenleiye, masu a itari thanu napiili yaaloca.
4 Vaavaa itari ihe thanu napiili saaloncaaya, kaahanle vakhaani orepa, nyenya nsu noorweela wirimu naaloca ni miyo nriki: “Okhuwe* ichu seiho itari thanu napiili iloncaaya, nave ohirepe.” 5 Munkeelo yoowo kaamonnaaka anyikanle ephareya ni echaya, aahookololela wirimu ntata nawe noolopwana, 6 nave aalipela wa Yoole onakhala okhala wookhala, Yoowo opatunxe erimu ni ichu iri mwemmo, elapo ni ichu iri mwemmo, vamoha ni ephareya ni ichu iri mwemmo, ariki: “Horwa olekeleyavo. 7 Nto mmahiku yaawo munkeelo aneethanu napiili oneereiye akhale ooreheryeya wi oope nipenka nawe, mweeparipari enahaala waakhwanela yoovitheya yaweela yeeyo Muluku aalonceiye ntoko michaka saphaama wa akapuro awe, alipa a miririmu.”
8 Nave kaahiiwa nsu noorweela wirimu nlocaka ni miyo wanaawiili nriki: “Hawe, wakuxe eroolu yoohuleya ene eri mmatani mwa munkeelo yoole eemenle mweco mmoha anyikanle ephareya nave mukina vachayani.” 9 Miyaano kaaya wa munkeelo yoole nave kaaloca ni yoowo wi akinnye eroolu yeele ekhaani. Owo aahi wa miyaano: “Okuxe nave okhuure; enamoowaawela mmirimani mwaa, nyenya mwaano mwaa enamusiva* ntoko enuwi.”* 10 Miyaano kaakuxa eroolu yeele ekhaani mmatani mwa munkeelo nave kikhuura; mwaano mwaka waanasivamo ntoko enuwi, nyenya vaavaa kaakhunraaka, mmirimani mwaka waanawaawamo. 11 Nave kaaleeliwa wi: “Onnaphwanela oloca mwa miririmu wanaawiili wa maloko, wa ilapo, wa ilocelo ni wa mamwene mancipale.”