MWAHA 33
Tiheeni Omwene wa Muluku Onahaalaaya Weera?
Omwene wa Muluku onnalamulela wirimu. Moohilekela owo onahaala opaka matorokelo veelaponi. Mmwaha yoola nnahaala othokororya ichu ikina saphaama Omwene wa Muluku onahaalaya opaka.
1. Ti mwawiihai Omwene wa Muluku onahaalaya oruuha murecele ni wookololowa veelaponi?
Yesu Mwene a Omwene wa Muluku, onahaala waatoloxa achu oothene oonanara murima ni alamuleli a elapo mu ekhoco ya Armaketo. (Wupulula 16:14, 16) Yeela yeereya, enahaala waakhwanela yoororomeliha ya Mpiipiliyani eni: “Vahilekenle aweera soonanara hamuwoona tho.” (Salumu 37:10) Moorweela wa Omwene wa Muluku, Yesu onahaala oruuha murecele ni wookololowa mu elapo yoothene.—Mwaalakhanye Isaiya 11:4.
2. Okumi onahaala okhala hai vaavaa yookhwela ya Muluku enahaalaaya weereya veelaponi?
Mwaanyiherye okhala mu elapo yeeyo achu ari awookololowa, ooreera murima, anamusivela Yehova, ni anasivelana mukina ni mukhwaawe! “Onarwa aavaha awookololowa murima elapo ya vathi, yiikhalelaru mwemmo okhala wookhala.” (Salumu 37:29) Haavo muchu onahaala wiiceliwaka nave oothene anahaala okhala mweelaponi okhala wookhala.
3. Tiheeni Omwene wa Muluku onahaalaaya weera achu oonanara murima emanle otoloxiwa?
Emanle otoloxiwa achu oonanara Yesu onahaala olamulela mu iyaakha 1.000. Variyari va elukuluku yeeyo, Yesu ni a 144.000 anahaala waakhaviheryaka achu veelaponi okhala oophaameya. Omakuchuwelo wa iyaakha 1.000 elapo enahaala okhala Parataiso ooreera, nave achu oothene anahaala okhala oohakalala woona wi anahaala wiiwelelaka malamulo a Muluku. Voocharela Yesu onahaala waakookiherya olamulelo Atiithi awe Yehova. Opwahana khalai, nsina na Yehova nnahaala ‘weelihiwa.’ (Mateu 6:9, 10) Vaavaa nsina na Yehova nnahaalaaya weelihiwa enahaala okhala yookwakwaleya wi Yehova mulamuleli onaapwacha achu. Voocharela Yehova onahaala omutoloxa Satana, masololo, ni muchu vyakala onathanla omwaryeela olamulelo awe. (Wupulula 20:7-10) Wa nthowa na Omwene wa Muluku, okumi onahaala okhala woophaameya mmikhalelo soothene nave eyo enahaala okhala, okhala wookhala.
OHUSERYA MWAWIISEELA
Muthokororye ntakhara heeni nnaphwanelaahu ororomela wi Muluku onahaala opharihela Omwene awe wi aakhwaniherye soororomeliha soothene siri Mpiipiliyani vooloca sa omwaahiyu.
4. Omwene wa Muluku onahaala omaliha olamulelo wa achu
Piipiliya onaloca wi “muchu mukina onnamulamulela mukhweiye amweerelaka yoonanara.” (Eklesiyaste 8:9) Yehova onahaala opharihela Omwene awe wi amalihe ohookololowa yoola.
Mwaalakhanye Daniyeli 2:44 ni 2 Tesalónika 1:6-8, nave voocharela muthokororye makoho ala:
Tiheeni Yehova ni Yesu anahaalaaya weera ni alamuleli a elapo vamoha ni yaale anaakhaviherya yaawo?
Ntakhara heeni munaphwanelaanyu olekecheya wi othoriha waya ti wawookololowa?
5. Yesu Mwene oophaameya
Ntoko Mwene a Omwene wa Muluku, Yesu onahaala opaka ichu saphaama wi aakhaviherye achu oothene a veelaponi. Moone EXILEMA enahaala wooniherya wi Yesu onnachuna waakhaviherya achu nave wi Muluku omvaha owerya wi eereno yeeyo.
Ichu seiyo Yesu aapankeiye ari veelaponi, sootakiherya sa ichu onahaaleiye opaka ntoko Mwene a Omwene wa Muluku. Mareeliho taani alociwe yaawo munachunaanyu woona yaakhwanelaka? Mwaalakhanye soorepa sa Mpiipiliyani iniiwanana ni mareeliho yaala.
VAAVAA AAREIYE VEELAPONI YESU . . . |
ORWEELA WIRIMU YESU ONAHAALA . . . |
|---|---|
|
|
|
|
|
|
|
|
6. Omwene wa Muluku onahaala oruuha omwaahiyu woohakalalihaxa
Omwene wa Muluku onahaala waavaha achu okumi woohakalalihaxa yoowo Yehova aachuneiye waavaha. Achu anahaala okhala okhala wookhala mu Parataiso veelaponi. Moone EXILEMA wi moone mukhalelo Yehova onahaaleiye waakhwaniherya yookhwela awe veelaponi yeela ya vathi moorweela wa Yesu.
Mwaalakhanye Salumu 145:16, voocharela muthokororye nikoho nla:
Munoona hai vaavaa munasuwelaanyu wi Yehova ‘onnahakalaliha soopatushiwa soothene?’
ACHU AKINA ANI: “Wakhala wi muchu ti muchu onnapaka makupa awe nnanwerya oreherya makacamiho mweelaponi.”
Makacamiho taani Omwene wa Muluku onahaalaaya omaliha yaawo alamuleli a achu ahinaweryaaya omaliha?
MUKWASU
Omwene wa Muluku onahaala opaka soothene Muluku onachuneiye wi seereye. Eyo enahaala weeriha wi elapo ekhale Parataiso esaren’ye achu aphaama yaawo anahaala omulapelaka Yehova okhala wookhala.
Makoho awuuluulela
Ti mwawiihai Omwene wa Muluku onahaalaya weeliha nsina na Yehova?
Ntakhara heeni nnaroromelaahu wi omwene wa Muluku onahaala waakhwaniherya soororomeliha soothene sa Mpiipiliyani?
Wa ichu soothene saphaama Omwene onahaalaya waakhwaniherya tiivi nyuwaano mwaachunaanyu woona yaakhwanelaka?
OTHOLATHOLA
Musuwele Armaketo tiheeni.
Mwaalakhanye yeeyo enahaala weereya ni Yesu mu olamulelo wa iyaakha miili, mwaalakhanye tho yeeyo enahaala weereya evinre elukuluku yeeyo.
“O que acontecerá no Dia do Julgamento?” (A Sentinela, 1.o de setembro de 2012)
Moone ti mwawiihai echoko eneeraaya yiisaanyiherye eri mu Parataiso.
Mu mwaha “Muitas perguntas me perturbavam,” moone ti mwawiihai mulopwana okhumme mu epoliitika ophwannyeiye maakhulo a makoho aavyeiye.
“A Bíblia Muda a Vida das Pessoas” (A Sentinela, 1.o de janeiro de 2012)