MWAHA 11
Muni Nwerye Hai Ophwanya Mphurelo Wawaaca mu Omwaalakhanya Piipiliya?
Apwanne mohintoko wuupuwela opacerya muteko mutokweene nyenya moona wi ti woovilasa? Akhweya, wi okhale wookhweya nyuwo mwaahikawanya mmakupa makhaani. Emohamoha enneereya vooloca sa omwaalakhanya Piipiliya. Nyuwo munamphiyerya wiikoha, ‘Kinii kipacerye hai omwaalakhanya Piipiliya?’ Mmwaha yoola, nnahaala othokororya ichu sookhweya seiyo muneeraanyu mpake inahaala wookhaviheryaani opuha omwaalakhanya ni omuhuserya Piipiliya.
1. Ntakhara heeni ninnaphwanela omwaalakhanya Piipiliya moohihiyererya?
Muchu onamwaalakhanya Piipiliya, naari ‘malamulo a Yehova,’ onahaala okhala oohakalala ni okhumelela phaama. (Mwaalakhanye Salumu 1:1-3, NN.) Wi mpacerye, mweererye omwaalakhanya mu aminutu vakhaani nihiku ti nihiku. Wakhala wi munniikhoveleliha ni masu a Muluku, munahaala osiveliwaka vancipale ni yeeyo munaalakhanyaanyu Mpiipiliya.
2. Tiheeni enahaala wookhaviheryaani okumihavo mphurelo mu omwaalakhanya Piipiliya?
Wi niphure mu omwaalakhanya Piipiliya, nnaphwanela omaala ni wuupuwelela yeeyo nnaalakhanyaahu. Nnaphwanela waalakhanya ni ‘wuupuwelela.’ (Yosuwa 1:8) Vaavaa munaalakhanyaanyu, mwiipakele makoho ntoko ala: ‘Tiheeni ela enakihusihaaya vooloca sa Yehova Muluku? Kinii kipharihele hai mu okumi aka? Kinii kipharihele hai soorepa seiha wi kaakhaviherye akina?’
3. Muni mphwanye hai elukuluku ya omwaalakhanya Piipiliya?
Apwanne munnoona okhala woovila ophwanya elukuluku ya omwaalakhanya Piipiliya? Ancipale a hiyo anoona hiiha. Mweererye ‘olapano phaama elukuluku anyu.’ (Éfeso 5:16) Munanwerya weerano yeela moorweela wa otikitherya elukuluku yoophwanelela ya omwaalakhanya Piipiliya nihiku ti nihiku. Achu akina anniivaha elukuluku wi emwaalakhanyeke Piipiliya wooxixelo ori woothene. Akina annathanla elukuluku ekina, akhweya elukuluku ya othana. Akina anamwaalakhanya Piipiliya ohiyu ehaakumve okona. Tiivi yaahaala okhala elukuluku yaphaama wa nyuwaano?
OHUSERYA MWAWIISEELA
Muhuserya mukhalelo wa omwaalakhanya Piipiliya onahaala okhala wa mphurelo. Moone mukhalelo wa wiireherya phaama wi mukumihevo mphurelo wawaaca mu yoohuserya anyu ya Piipiliya.
Hiiha ntoko nnahuseryaahu osiveliwa ni olya yoolya yoohiyanahiyana, nnanwerya ohuserya osiveliwa ni omwaalakhanya Piipiliya
4. Muhuserye osiveliwano omwaalakhanya Piipiliya
Tahi wookhweya opacerya omwaalakhanya Piipiliya. Nyenya hiyaano nnanwerya ‘winlela’ weerano yeeyo, hiiha ntoko muchu onakhaleiyeno nchuno na olawiha yoolya evyaani. Mwaalakhanye 1 Pedro 2:2, nave voocharela muthokororye nikoho nla:
Munoona wi omwaalakhanya Piipiliya nihiku ti nihiku, enahaala okhala echu muneeraanyu musiveliweno ni ochuna weerano eyo moohihiyererya?
Moone EXILEMA wi moone ti mwawihai achu akina yaapacenryaaya osiveliwano omwaalakhanya Piipiliya. Voocharela muthokororye makoho anacharela.
Mu exilema, makacamiho taani amiravo avonthaaya?
Tiheeni yaakhavihenrye otitelela omwaalakhanya Piipiliya moohihiyererya?
Yeerinhe hai omwaalakhanya waya Piipiliya okhala woohakalaliha?
Sooleeliherya inahaala wookhaviheryaani opacerya:
Mmuthanle Piipiliya oororomeleya, onapharihela malocelo amutano. Mmweererye Tradução do Novo Mundo wakhala wi onnaphwanyeya mu elocelo anyu.
Mpacerye waalakhanya makupa a Piipiliya munuupuwelaanyu wi anahaala woosivelaani vancipale. Mukhalelo wa weerano, moone etabela “Mpacerye Omwaalakhanya Wanyu Piipiliya.”
Murepele ichu seiyo mwaalakhannyaanyu. Mpharihele makupa ani “Muupuwele Mukontaanyuvo” enaphwanyeya mu etapela yeela.
Mumpharihele aplicativo JW Library®. Ni yoola, munahaala owerya omwaalakhanya naari owiriyana waalakhanyiwa wa Piipiliya, mmupharihelaka telefoni naari ekhankoonya ekina.
Mwapharihele aapêndice mu Tradução do Novo Mundo. Awo annaphitaanyerya maapa, itapela ni masu atharihiwe, ichu seiyo inahaala wookhaviheryaani wi waalakhanya wanyu okhale woohakalaliha.
5. Mwiirehererye ntakhara yoohuserya anyu ya Piipiliya
Mwaalakhanye Salumu 119:34, nave voocharela muthokororye nikoho nla:
Ntakhara heeni oryaaya woophwanelela opaka nivekelo muhaakumve omwaalakhanya Piipiliya naari wiirehererya ntakhara yoohuserya anyu ya Piipiliya?
Muni mukumihevo hai mphurelo wawaaca mu nikupa ti nikupa na yoohuserya anyu? Vaavaa munarehereryaanyu mwaha mu yoohuserya yeela, mweererye ochariha meerelo ala:
Mwaalakhanye iparakrafo soopacerya sa mwaha.
waalikhele nave mwaalakhanye soorepa, mweererye wiiwexexa mukhalelo iniiwananaaya ni mwaha.
Muceke masu anaakhula nikoho ti nikoho, weerano hiiha enahaala wookhaviheryaani othokororya mwaha ni muhusiha anyu.
Nyuwaano mwaanasuwela?
Anamoona a Yehova ahaapharihela Apiipiliya ancipale oohiyanahiyana. Nyenya ninnasiveliwa ni Tradução do Novo Mundo da Bíblia Sagrada nthowa nawi tookwakwaleya, tawiiwexexeya, nave tho onnapharihela nsina na Muluku.—Moone artigo do jw.org “As Testemunhas de Jeová usam uma Bíblia diferente?”
ACHU AKINA ANI: “Omuhuserya Piipiliya ti woovilaxa. Nkaanono elukuluku naari ikuru.”
Tiheeni munuupuwelaanyu vooloca sa yeela?
MUKWASU
Wi mukumihevo mphurelo wawaaca mu omwaalakhanya wanyu Piipiliya, mwiivahe elukuluku ya omwaalakhanya, ovekela wi mwiiwexexe yeeyo munaalakhanyaanyu, ni wiirehererya ntakhara nikupa ti nikupa na yoohuserya anyu.
Makoho awuuluulela
Tiheeni enahaala wookhaviheryaani okumiha mphurelo wawaaca mu omwaalakhanya wanyu Piipiliya?
Elukuluku taani muneeraanyu nweryeke omwaalakhanya ni omuhuserya Piipiliya?
Ntakhara heeni ti yaphaama wiirehererya ntakhara nikupa ti nikupa na yoohuserya anyu?
OTHOLATHOLA
Moone sooleeliherya ikina inahaala wookhaviheryaani ophwanya mphurelo wawaaca mu omwaalakhanya wanyu Piipiliya.
Muhuserye mikhalelo miraru sa omwaalakhanya Piipiliya.
“Como a Bíblia pode me ajudar?—Parte 1: Conheça melhor a sua Bíblia” (Artigo do jw.org)
Muthokororye mukhalelo wa osiveliwano omwaalakhanya Piipiliya.
Muhuserye meerelo makina ni achu yaawo amwaalakhanye Piipiliya mu iyaakha sincipale.