MASU AWAACEERERYA

Nihiku na Othoriha—Tiheeni?

NYUWO munuupuwela wi Nihiku na Othoriha tiheeni? Ancipale anuupuwela wi muchu mmoha ni mmoha, achu masana masaneene echaranaka anahaala oruuhiwa vahoolo va munyukhu wa Muluku. Vaava muchu ti muchu onahaala othorihiwa. Akina anahaala ovahiwa phatamari a parataiso a wirimu, akina anahaala othorihiwa ohooxeya woohimala. Vanonto, Piipiliya onaloca echu yoohiyana vancipale vooloca sa elukuluku yeela. Masu a Muluku analoca sa eyo, ohiya ntoko elukuluku ya ohooxa, nyenya ntoko elukuluku ya ewehereryo ni mareeliho.

Mu Wupulula 20:11, 12, hiyaano ninnaalakhanya masu a murummwa Yohani vooloca sa Nihiku na Othoriha: “Vano kàhona ehitxe etokwene yawarya ni yole akiranthevo. Erimu ni elapo sàtxhawa vamithoni vawe ihihiyale etxhu. Kàwona tho alipa òkhwa, atokwene ni akhani, yemenle oholo wa ehitxhe. Yàhuliwa malivru ni nàhuliwa tho nlivuru nikina, nle na ekumi. Alipa òkhwa yàthorihiwa ntoko metxelo aya ni ntoko saremphwaya mmalivuruni mwemmo.” Taani ori Mulipa Oothoriha onalociwa vaava?

Yehova Muluku tori Mulipa Oothoriha mutokweene a nloko naachu. Nyenya, owo oomuthanla muchu mukina wi apake muteko wa othoriha wa mutano. Mwawiiwanana ni Saweriwa T’arummwa 17:31, murummwa Paulo ooloca wi Muluku oothanla “nihiku onereiye athorihe elapo ni wokolola ni mutxhu yowo Muluku omuthanlileiye.” Mulipa Oothoriha ola othanliwe ti Yesu Kiristu aaviihiwe muukhwani. (Yohani 5:22) Mano Nihiku na Othoriha nnahaala opacerya liini? Nave nnahaala olekela ophiyerya liini?

Liivuru a Wupulula onnooniherya wi Nihiku na Othoriha nnahaala opacerya emanle ekhoco ya Armaketo, vaavaa marehereryo a Satana veelaponi yavathi anahaalaaya otoloxiwa.a (Wupulula 16:14, 16; 19:19–20:3) Amanle Armaketo, Satana ni masololo awe anahaala owaleliwa mu kariposo mu miyakha masanaru khumi. Mu elukuluku ele, a 144.000 wirimu anahaala okhala alipa oothoriha nave enarwa ‘elamula vamoha ni Yesu miyakha ntxikhwi nimoha.’ (Wupulula 14:1-3; 20:1-4; Aroma 8:17) Nihiku na Othoriha tahi yaweereya yawaakuveya ya iwora 24 pahiru. Nihiku na Othoriha nnahaala okhala miyakha masanaru khumi.

Mu miyakha ncikhwi nimoha, Yesu Kiristu onii “arwe wathoriha akumi ni alipa òkhwa.” (2 Timoteo 4:1) “Akumi” anahaala okhala “muloko mutokwene” yoowo onahaala ovuluwa va Armaketo. (Wupulula 7:9-17) Murummwa Yohani tho aawoona “alipa òkhwa . . . Yemenle ohoolo wa ehitxe” wa othoriha. Hiihaa ntoko Yesu olaihenryeiye, “enamurwa elukuluku atxhu othene ari mmahiyeni aneraya yiwe nsu nawe [na Kiristu] nave anamukhumamo yale yenre saphama” moorweela wa ovinya muukhwani. (Yohani 5:28, 29; Saweriwa T’arummwa 24:15) Nyenya achu oothene awo anahaala othorihiwa mu mathipelo taani?

Mwawiiwanana ni yawoona ya murummwa Yohani, “yàhuliwa malivru,” nave “Alipa òkhwa yàthorihiwa ntoko metxelo aya ni ntoko saremphwaya mmalivuruni mwemmo.” (Wupulula 20:12) Aliivuru ala ti soorempwa sa miteko sa khalai sa achu? Hooye, othorihiwa honahaala othipeliwa mu miteko sa achu yeeraaya ehaakumve okhwa. Hiyaano nnasuwela hai yeela? Piipiliya onii: “Ole okhwile òtaphuliwa wa yòtxheka.” (Aroma 6:7) Oothene anahaala oviihiwa ni mukhalelo waphaama, ni soocheka saya soothene icuwaliwe. Aliivuru aneemelela ikano sawaacererya sa Muluku. Wi ekhale okhala wookhala, achu oothene avulunwe va Armaketo ni aviihiwe muukhwani anahaala wiiwelela malamulo a Muluku, ophitaanyerya ikano ivyaani sa Yehova inahaala wuupululiwa mu miyakha masanaru khumi. Mwawiihiiha, achu anahaala othorihiwa mu mathipelo a ichu awo aneeraaya mu Nihiku na Othoriha.

Mu Nihiku na Othoriha macikhwi macikhweene a achu anahaala okhalano ekari yoopacerya wi ehuserye vooloca sa yookhwela ya Muluku ni okhala mwawiiwanana ni yeeyo. Ela enataphulela wi onahaala weereya muteko mutokotoko wa ohusiha. Chiryene, ‘atxhu aya, yawo anamuhuserya echu eneriwa wokololowa.’ (Isaiya 26:9) Nyenya, tahi wi achu oothene anahaala ochuna okhala mwawiiwanana ni yookhwela ya Muluku. Isaiya 26:10 onii: “Namwi nyuwano muri orèra murima, amutakhali hanahuserya wokololowa. Mwa elapo y’atxhu aphama awo anera sonanararu, nave hanatxhuna owinnuwihani.” Achu yaala oonanara anahaala wiiphiwa khuluwi mu Nihiku na Othoriha.—Isaiya 65:20.

Omakuchuwelo wa Nihiku na Othoriha, achu oovuluwa anahaala okhala “akumi” ntoko achu oophaameya. (Wupulula 20:5) Mwawiihiiha mu nihiku na Othoriha, achu anahaala okookiheryiwa mukhalelo woophaameya. (1 Korinto 15:24-28) Voocharela yaweeha yookuchula enahaala weereya. Satana onahaala okumihiwa mukariposo mwawe nave onahaala weemereryiwa wi eererye waahuweliha achu elukuluku emoha yookuchula. (Wupulula 20:3, 7-10) Achu oothene anahaala ovilela anahaala opuha okhwaaniheryeya moomalela wa yoolaiherya ya Piipiliya: “Atxhu awokololowa anamwakhela elapo, anamukhala wa mahiku othene.” (Salumu 37:29) Ahee, Nihiku na Othoriha nnahaala okhala mareeliho wa achu oothene oororomeleya!

[Nsu na vathi]