Mukhaviherye Muloko Anyu

Orukurerya elapo, amilyawu a achu annamurumeela Yehova moohakalala mmiloko soohiyanahiyana. Achu yaawo annavaha esisapo mahusiheryo ni ohoolela anaakhelaaya nave annachuna okhaviherya muloko. Ti hiihaa munoonaanyu vooloca sa muloko anyu?

1. Muni mpharihele hai elukuluku ni ikuru sanyu wi mukhaviherye muloko?

Oothene ahu nnanwerya okhaviherya mmulokoni. Ntoko yootakiherya, apwanne nyuwaano munanwerya waakuxa awuuluvala naari yaawo anachuna nikhaviheryo na ophiya mmithukumanoni? Naari akhweya nyuwo munanwerya waakhaviherya ni ichu ikina, ntoko othuma ichu naari orehererya vaate vaya. (Mwaalakhanye Tiyako 1:27.) Hiyaano tho nnanwerya wiivaha wi nikhaviherye weeliha ni orehererya Empa ya Omwene. Haavo onakhinyereryiwa weerano ichu seiha. Osivela nryaahuno ntakhara Muluku ni annihu tonanceenyerya ‘wiiperekha aneenaahu.’—Salumu 110:3.

Anamoona a Yehova oopatisiwa ananwerya tho okhaviherya mmulokoni mmikhalelo mikina. Ntoko yootakiherya, anna ananwerya wiilipixerya orumeela ntoko arummwa oorumeela ni atokweene a mmulokoni. Anna ni arokora ananwerya tho okhaviherya muteko woolaleerya ntoko mapiyoneero. Anamoona a Yehova akina annawerya okhaviherya mu oteka mapuro a omulapelamo Yehova. Akinaaku annathaamela mmapuro orimomo miloko inachuna nikhaviheryo.

2. Nni nipharihele hai sookhalano sahu wi nikhaviherye muloko?

Nnanwerya ‘waacicimiha Apwiya [Yehova] ni muhakhu ahu.’ (Masiposipo 3:9) Wa hiyo ekari etokweene opaka sooveleela wi nikhaviherye muloko ni muteko woolaleerya wa elapo yoothene. (Mwaalakhanye 2 Korinto 9:7.) Sooveleela sahu tho sinnaphariheliwa mmuteko wookhaviherya sakhumelela ipahu. Akina annalakelela ‘wiikuherya makupa aya,’ naari wi, okuha ikhorowa esumana ti esumana naari mweeri ti mweeri wi epake yooveleela. (Mwaalakhanye 1 Korinto 16:2.) Nnanwerya weerano yeeyo mu ikaaxa sa sooveleela iri mu Ipa sa Omwene naari mu site donate.jw.org. Mukhalelo nnapharihelaahu sookhalano sahu onnanivaha ekari ya wooniherya wa Yehova osivela nryaahuno wa yene.

OHUSERYA MWAWIISEELA

3. Mukhaviherye muloko ni sooveleela sanyu

Yehova ni Yesu annaasivela yaale anavaha ni murima woothene. Ntoko yootakiherya, Yesu aamoona naamukhwele ohaawa avahaka yooveleela. Mwaalakhanye Luka 21:1-4, nave voocharela muthokororye makoho ala:

• Apwanne nnaphwanela oveleela ikhorowa sincipale wi nimuhakalalihe Yehova?

• Ti mwawihai Yehova ni Yesu anoonaaya sooveleela nnapakaahu ni murima woothene?

Wi musuwele mukhalelo sooveleela inaphariheliwaaya, moone EXILEMA. Nave voocharela muthokororye nikoho nla:

EXILEMA: Yamahala ya Omvaha Yehova (4:47)

• Sooveleela inaphariheliwa hai wi ikhaviherye miloko orukurerya elapo?

4. Nnanwerya wiivaha wi nikhaviherye

Alapeli a Yehova a elukuluku yakhalai yaanasiveliwa vancipale okhapelela mapuro yaawo yamulapelaayamo Yehova. Nyenya wi ewerye weerano yeeyo waanachuneya ichu ikina opwaha ikhorowa. Mwaalakhanye 2 Matharihelo 34:9-11, nave voocharela muthokororye nikoho nla:

• Aisarayeli yaakhaviherya hai okhapelela empa ya Muluku?

Wi moone ti mwawihai Anamoona a Yehova anacharihaaya yootakiherya yeela ya Mpiipiliyani, moone EXILEMA. Nave voocharela muthokororye makoho ala:

EXILEMA: Okhapelela Mapuro Ahu a Malapelo (3:31)

• Ntakhara heeni eryaaya yoochuneya ilukuluku soothene weeliha Empa ya Omwene ni ohiya mmukhalelo woophwanelela?

• Mmikhalelo taani nyuwaano muneeraanyu mukhaviherye?

5. Anna ananwerya opaka sincipale ntakhara muloko

Piipiliya onnaaceenyerya alopwana ari Akristu wiilipixerya wi ekhaviherye muloko. Wi moone yootakiherya emoha, moone EXILEMA. Nave voocharela muthokororye nikoho nnacharela.

EXILEMA: Irmãos—Trabalhem para Jeová (5:19)

• Mu exilema yeela, tiheeni Ryan aapankeiye wi akhaviherye muloko moopwahaxa?

Piipiliya onnaloca mikhalelo seiyo anna anaphwanelaaya okhalano wi ewerye orumeela ntoko arummwa oorumeela ni atokweene a muloko. Mwaalakhanye 1 Timóteo 3:1-13, nave voocharela muthokororye makoho ala:

• Mikhalelo taani anna yaawo anachuna orumeela ntoko arummwa oorumeela ni atokweene a mulokoni anaphwanelaaya okhalano?

• Mikhalelo taani achu a veemusini vaya anaphwanelaaya okhalano?—Moone iversikulu 4 ni 11.

• Vaavaa anna aniilipixeryaaya wi ekhaleno mikhalelo seiya, ti mwawihai akina mmulokoni anaphuraaya?

MUKWASU

Yehova onnavaha esisapo yawaaca wiilipixerya wahu wa okhaviherya muloko nipharihelaka elukuluku, ikuru ni sookhalano sahu.

Makoho awuuluulela

• Nni nipharihele hai elukuluku ni ikuru sahu wi nikhaviherye muloko?

• Nni nipharihele hai sookhalano sahu wi nikhaviherye muloko?

• Mmukhalelo taani nyuwaano mwaahaalaanyu osiveliwa okhaviherya muloko?

OTHOLATHOLA

Moone ntakhara heeni Muluku hanaveka yaneekhumi.

“O que a Bíblia diz sobre o dízimo?” (Artigo do jw.org)

Mwawiiwanana ni Piipiliya mirici mikina ennavahereryiwa alopwana oopatisiwa. Vano hanka wakhala wi muthiyana opatisiwe annachuna okhapelela mirici seiho?

“Owerya Yoowo Atokweene Aryaayano Mmulokoni” (Mulipeleli, Fevereru a 2021)

Mwaasuwele Anamoona a Yehova akina yaawo moolipa murima epanke owetha waya otokweene wi ekuxe soolaleeryiwa ntakhara annaya.

Publicações bíblicas viajam até a parte mais distante do Congo (4:25)

Moohiyana ni malapelo makina, hiyaano nnakhapelela hai ikhorowa ntakhara muteko ahu?

“Muteko wa Anamoona a Yehova Onaliveliwa Hai?” (Mwaha wa mu jw.org)