Mutokweene a anakhoco Onnooniherya Nroromelo Ntokotoko

Ovinre mwaha wa va mwaakoni, Yesu onaya nipooma no Kafarnau. Vaava atokweene akina a Ayuta annamwaacamela. Awo arumihiwe ni mulopwana a nloko nikina—mutokweene a anakhoco o Roma.

Namalapa a mutokweene a anakhoco yoowo onamusiveleiye vancipale onamwiiceliwa nave ohanle vakhaani okhwa. Naamwi ahiri Muyuta, mutokweene a anakhoco onnaavya nikhaviheryo wa Yesu. Ayuta annamuleela Yesu wi namalapa a mutokweene “orimukona owani òrakalene ahawaka vatoko vene.” (Mateu 8:6) Atokweene a Ayuta annamuleela Yesu wi mutokweene a anakhoco onnaphwanela nikhaviheryo, nave annaloca: “Onnatxitximiha elapo ahu, nave ti yowo ontekenle sinagoga ahu.”—Luka 7:4, 5.

Moohilekela Yesu onnakhuma ni atokweene eyaaka owannyawe mutokweene a anakhoco. Yaacamelaka vachokoni, mutokweene a anakhoco onnaarumiha asinthamwene wi eloce ni yoowo: “Pwiya, ntakhara nkinaphwanela wi ovolowe mpa mwaka, nari mano wi kiphiye wa weyano.” (Luka 7:6, 7) Ola chiryene mukhalelo wa wiiyeviha wa yoowo aarino owerya ovaha olamulela! Ela ennooniherya wi mutokweene ola toohiyana ni Aroma yaawo anaakhaliha akapuro aya moonanara.—Mateu 8:9.

Moohikhwa minikwa, mutokweene a anakhoco oosuwela wi Ayuta anniikasopa waataana ni yaale ahiri Ayuta. (Saweriwa T’arummwa 10:28) Akhweya uupuwelelaka yeela, mutokweene a anakhoco ookhalano asinthamwene awe anamveke Yesu: “Olotxe nsu nimoharu wi mulapeli aka apenuwe.”—Luka 7:7.

Vawiiwa yeela Yesu onnatepa otikhiniheya, nave onnaloca: “Kinnolèlani wi nari mano w’Isarayele nkiphwannyevo nroromelo ntokotoko si nenla.” (Luka 7:9) Asinthamwene a mutokweene a anakhoco ekookelaka veechokoni, yaahisuwela wi namalapa iiceliwa vano oopenuwa.

Amanle opaka openusa yoola, owo onnapharihela elukuluku yeela wi ooniherye wi yaale ahiri Ayuta nto arino nroromelo anahaala oreelihiwa. Owo onnaloca. “Anamurwa atxhu antxipale onakhumawo ni onavolowawo nsuwa ni anamukirathi mwa omwene wa wirimu.” Hanka vooloca wa Ayuta ahinooneiha nroromelo? Yesu onnaloca wi awo “anamwikareliwa mwepiphini ya vate oni okhalemo wunla ni owurawura mìno.”—Mateu 8:11, 12.

Mwawiihiiha, Ayuta yaaheemerenrye ekari yaavahiwaaya woopaceryani, wi epake makupa mu Omwene vamoha ni Kristu enarwa ekhoociwa. Nyenya ale yahaari Ayuta anarwa yeemereryiwa wi ekirathi vameesa vawe, eyo ti wi, mu “omwene wa wirimu.”