Tiheeni Chiryene Enanvirikanya Muchu?

Paskha a eyaakha ya 32 E.K. onnaacamela, Yesu ootepa oweiwa ahusihaka o Kalileya. Voocharela owo onnaya o Yerusalemu nthowa na Paskha, ntoko Nlamulo naalocaaya. Nyenya, Yesu oneerano moovitheya nthowa nawi Ayuta annamwaavya wi emwiiphe. (Yohani 7:1) Nave ohoolo waya, owo onnakookela o Kalileya.

Woonaru Yesu ori o Kafarnau vaavaa Afarisi ni alipa oorepa anamphwanyaaya erwaaka o Yerusalemu. Ntakhara heeni awo apankaaya mukwaha yoola? Awo anachuna waavya mathowa wi emootherye Yesu wi hanachariha sookhovelela sa malapelo. Awo annamukoha: “Amuhuserya à ahinatxharelani sa makholo? Wona wi hananyawa yalyaka?” (Mateu 15:2) Muluku haantonko waalamulela achu wi echariheke muhapo yoola wa ‘onyawa phama’ ophiyerya mukookwino. (Marko 7:3) Wa Afarisi, oheerano yeela, yaari yoonanara.

Opwaha waakhula nikoho naya mookwakwaleya, Yesu onooniherya ophiyerya mweeryo taani avirikannyaaya Nlamulo na Muluku. Owo onnaakoha: “Nka nyuwo muhinatxharelani malamulo a Muluku wa nthowa na ikano sanyu? Muluku àhi: ‘Waatxitximihe atithi-à ni amai–à, nave yole oni anyemule àtithinya nari amannya txhiryene akhwe.’ Nto nyuwo muni: ‘Yole oni àlotxele atithi ni amannya masu ala: “Yele werawe wakhele wa miyo, yovahiwa wa Muluku,” owo hanaphareliwa watxitximiha atithi ni amannya.’”—Mateu 15:3-6; Mukwaha 20:12; 21:17.

Afarisi anuupuwela wi ikhorowa, sookhalano, naari echu ekina enaveleeliwa wa Muluku enaphwanela okhala mu empa ya Muluku, nave wi henaphwanela ophariheliwa mu echu ekina. Nyenya, nlelo muchu onnakhalano echu eyo eveleeliwe wa Muluku. Ntoko yootakiherya, mwaana onanwerya oloca wi ikhorowa sawe naari sookhalano ti “Korbán,” yoovahiwa wa Muluku naari empa ya Muluku, ntoko wi empa ya Muluku terino oophwanelelaxa wa waakhela soovahiwa waahiya asitiithi. Ikhorowa naari yookhalano yeeyo nlelo enaphariheliwa ni mwaana, owo onaloca wi henaphwanela ophariheliwa wi ekhaviheryiweno asitiithi awe awuuluvala. Owo onakhooca murici oreiyeno wa waakhaviherya.—Marko 7:11.

Yesu ootepa otikhiniheya mmukhalelo awo anachekelaaya Nlamulo na Muluku nave onnaloca: “Nyuwo mònanariha masu a Muluku wa nthowa na ikano sanyu. Anawisotherye, àlotxa phama wa nyuwo mulipa a miririmu Isaiya, ariki: ‘Atxhu ala anakitxitximiha ni eyanoru, nto murima aya ori otxiwene wa miyo. Awo anakepesa siyo, ntakhara malamulo aya anakhuma mwa atxhu.’” Afarisi haanono masu a omwaakhulano Yesu. Nave Yesu onnawiichana achu wi emwaacamele, nave onnaaleela: “Mwiwe ni musuwele! Tahi etxhu yele enavolowa mwano enanvirikanya mutxhu, nto yele enakhuma mwano t’enanvirikanya mutxhu.”—Mateu 15:6-11; Isaiya 29:13.

Ohoolo waya eri mpa, amuhuserya annamukoha Yesu: “Wòsuwela wi Afarisi, iwalaya yeyo olontxawe, àkwatxuliwa?” Owo onnawaakhula ariki: “Miri sothene, ihaliwe t’Atithi awirimu, inampholiwa. Mwahiyeni! Ari alipa èvasi anawetxiha alipa èvasi. Vano, mulipa èvasi onamwetxiha mulipa èvasi, oweli anammorela munlitxini.”—Mateu 15:12-14.

Yesu onnakhala ootikhiniheya, vaavaa Petro alocaka mu nsina na amuhuserya oothene, onavekeiye othariheliwa vooloca sa echu enanvirikanya muchu. Yesu onnaakhula: “Himunasuwela wi sothene inavolowa mwano inaya mmirimani nave, sakhumà mwemmo, inariheliwa osalani? Nto, inakhuma mwano, inarwa mmurimani, nave ti seiha inanvirikanya mutxhu. Eparipari ti mmurimani onakhumamo mupuwelo ònanara, wipha, oraruwa, wetxa pure, wiya, wotherya, wapa. Ti seiha itxhu inanvirikanya mutxhu, nto olya, mutxhu ahinyan’we, honanvirikanya mutxhu.”—Mateu 15:17-20.

Tahi wi Yesu onachuna ohiiha esipanti naari onyawa, muchu ahaakumve orehererya yoolya naari olya. Ohiya yeeyo, owo onachuna ovaanya wiisootherya wa ahooleli a malapelo yaawo aneererya waakanyerya malamulo awookololowa a Muluku ni mihapo sa achu. Moohikhwa minikwa, muupuwelo woonanara onarweela mmurimani, tonanvirikanya muchu.