Yesu Onnampenuxa Mwaana Ni Mulopwana Ohiniiwa

Amanle wuupulula mihapo naari sookhovelela sa Afarisi, Yesu vamoha ni amuhuserya awe annakhumavo. Awo annapaka mukwaha eyaaka makupa o Tiro ni o Sitoni o elapo yo Fenisiya.

Yesu onnaphwanya empa wi akhalevo nave hanachuna wi achu esuwele wi ori vaava. Naamwi hiiha, achu annasuwela wi owo oophiya. Muthiyana mmoha makholo awe ari o Kresiya, oyariwe mu elapo yeele onnamphwanya Yesu nave onnalocano ariki: “Mukimorele miyo ikharari Apwiya, mwana a Davide; mwanaka mwamuthiana óphariwa wawopiha ti nsololo.”—Mateu 15:22, Nlakano Nahihano; Marko 7:26.

Evinre elukuluku, amuhuserya a Yesu annamveka: “M’muléle arowe; ntakhara annakhuwela vachuli vahu.” Awaakhulaka, Yesu onnaloca ntakhara heeni ohinamwaakhuleiye: “Nkárummwe wa akina nyenya wa ipuchepuche sorimela sa emusi ya Israyeli.” Muthiyana hanavelavela. Owo onnamwaacamela Yesu nave onnakokhora vamiithoni vawe, alocaka ariki: “Apwiya, kikhaviheryeni.”—Mateu 15:23-25, NN.

Akhweya achunaka woona nroromelo na muthiyana ole, Yesu onnaloca niphwanaphwaniho nnaloca sa nthalu Ayuta aryaayano ni maloko makina, ariki: “Heri yaphama okusha epau ya anamwane, ni ovonyerya asanapwa.” (Mateu 15:26, NN) Nthowa na opharihela masu awi “asanapwa,” naari asaana a anapwa, Yesu onnooniherya wi onnaapwacha achu ahiri Ayuta. Mukhalelo onaloceiye ni opharihela masu a ikharari annooniherya chiryene wi owo tooreera murima.

Ohiya okhala oonyeenyeya, muthiyana onniiwexexa phaama wi Yesu onaloca sa nthalu na Ayuta, nave mwawiiyeviha onnaloca: “Ai, Apwiya, vawi’tho asanapwa enalya inyenyeri somora va ehasari va apwiya’ya.” Yesu asuwelaka mukhalelo waphaama wa murima wa muthiyana ole, onnaloca: “Muthiana we, nroromelo ná ti ntokotoko: ekhale wa weyo ntoko mummo onakhwelelá.” (Mateu 15:27, 28, NN) Nave eyo enneereya, naamwi mwaana ahiri vaavale! Vaavaa muthiyana onakookeleiye owaani, onamphwanya mwanawe amwaamuthiyana akonaka, apenunwe nave “munepa wotakhala okhumale”!—Marko 7:30, NN.

Yesu ni oohuserya awe annakhuma o epooma yo Fenisiya nave anaya makupa a Muhice Yortano. Akhweya annamulapuwa Yortano eyaaka omokoni wa Eniya yo Kalileya nave annaphiya elapo ya Tekapole. Weiwo, awo annawela omwaako, nave muloko wa achu onnaaphwanya. Muloko wa achu ale onnamuruuhela Yesu achu oorakala, oopororowa, oohoona ni oohiloca. Awo annaakuha areca aya vakhiviru va Yesu, nave owo onnaapenuxa. Achu etikhinihen’ye ni ichu seiha, annamucicimiha Muluku a Isarayeli.

Yesu onnampwacha phaama mulopwana yoowo orino makacamiho a wiiwa ni oloca. Nkaanyiheryani mukhalelo mulopwana owo onooneiye veeri va achu ancipale. Akhweya Yesu asuwelaka mukhalelo mulopwana ole oreiye oosarasareya, onnamukuxa amukerihaka nipuro nikina ocai wa muloko ole. Eri apiili pahiru, Yesu onnooniherya yeeyo onayeiye ompakela mulopwana owo. Yesu onnavoliiha ikatha sawe owaruni wa mulopwana ole nave, amanle otapha mara, owo onnaphara nlumi na mulopwana ole. Voocharela onnaweha wirimu, nave aloca masu ala “Effathá” yaawo anataphulela “huleyá.” Mu elukuluku yeele, iwaru sa mulopwana sinnahuleya nave onnawerya oloca ohirivo makacamiho. Yesu hanachuna wi avuwihiweke, onachuna wi achu emweemereryeke yoowo moorweela wa seiho awo anoonaaya ni aniiwaaya.—Marko 7:32-36.

Owerya wa Yesu wa opaka ichu seiha onnaavolowela vancipale achu yaawo anoona. “Etikhinaka vatokovene” awo annaloca eriki: “Onera phama itxhu sothene. Onnawiwiha alipa òhiwa nave onnàlotxiha alipa òhilotxa.”—Marko 7:37.