“Muwuupuweleke Ahooleli Anyu”

MASU yaala a murummwa Paulo, anaphwanyeya mu Ahebri 13:7, ananweryatho otaphuleliwa ha: “Muwuupuweleke yaale anoolamulelaani.” Ovinyerya mu Pentekoste a 33 E.K. oya ohoolo, arummwa oororomeleya a Apwiya Yesu Kristu yaahaakhwaniherya olamulelo yoola ntoko nikhuuru noolamulela naavaha malakiheryo mmiloko mivyaani saatikitheryiwe. (Saw. 6:2-4) Opacerya mu eyaakha ya 49 E.K., nikhuuru nenla noolamulela naanaphitaanyerya ohiya pahiru arummwa a Yesu. Vaavaa waalakeleliwaaya mwaha wa oxileiwa, nikhuuru noolamulela naaphitaanyerya “arummwa vamoha ni asitokweene.” (Saw. 15:1, 2) Owo waari murici aya othokororya phaama mwaha waavolowela Akristu mmapuro oothene. Awo yaahirumiha ikaarata ni sooleeliherya, wi elipihe miloko soothene ni weeriha wi oomuchara ekhale awiiwanana mmuupuwelo ni saweera. Miloko saahichariha ni wiiwelela ohoolela wa nikhuuru noolamulela, nave ntoko yookhumelela, awo yaahaakhela mareeliho a Yehova ni waacereryeya.—Saw. 8:1, 14, 15; 15:22-31; 16:4, 5; Ahe. 13:17.

² Emanle okhwa arummwa, omwareya waahipacerya. (2 Tes. 2:3-12) Ntoko Yesu aalohenryeiye mu niphwanaphwaniho nawe vooloca sa tiriku ni ntakataka, tiriku (Akristu oothanliwa) aaliwe vamoha ni ntakataka (Akristu ootakiherya). Moovira wa iyaakha, makhuuru oomeeli yaaheemereryiwa winnuwa vamoha ophiyerya elukuluku ya ohepha o “makuchuwelo a ilukuluku.” (Mat. 13:24-30, 36-43) Mmoha ti mmoha a Akristu oothanliwa aahititelela opuha mahala a Yesu mweelukuluku yeeyo, nto hinaarivo nikhuuru noolamulela, hiyaarivo yawooniherya veelaponi yeeyo Yesu aaphariheleiye wi avahe ohoolela wa oomuchara awe. (Mat. 28:20) Nto, owo aaloherya wi otorokeya waahaala weereya elukuluku ya ohepha.

³ “Taani ori namuteko oororomeleya ni amiruku?” Nnikoho nenlo, Yesu Kristu aapaceryihano niphwanaphwaniho, ntoko nikupa na “eneneeryo” avahaka yawooniherya ya “makuchuwelo a ilukuluku.” (Mat. 24:3, 42-47) Yesu aahiloca wi namuteko yoowo oororomeleya aahaala okhala ooweiwa aavahaka achu a Muluku yoolya yoomunepani “mu elukuluku yoophwanelela.” Hiiha ntoko Yesu aapharihenleiye nikhuuru na alopwana—ohiya mmoha ti mmoha—wi ahoolele mu nsana noopacerya, namuteko oororomeleya yoowo Yesu onamphariheleiye o makuchuwelo wa ilukuluku, tahi muchu mmoha.

OMUSUWELA “NAMUTEKO OOROROMELEYA NI AMIRUKU”

⁴ Taani Yesu aathanlileiye waalyiha oomuchara awe? Ti yawooneya wi aahaala waapharihela pahiru Akristu oothanliwa veelaponi ya vathi. Piipiliya onaaloca awo ntoko “omwene wa alipa a mukucho” yaawo arino murici wa ‘olokoha soomucicimihano yoowo owiichanne [yaawo] yaaryaaya mwiipiphini wi ekhale muumwaleela wawe wootikiniha.’ (1 Ped. 2:9; Malak. 2:7; Wup. 12:17) Apwanne oothanliwa oothene ari veelaponi annapaka makupa a namuteko oororomeleya? Hooye. Vaava Yesu aacelekhenleiye mucici muncipale wa alopwana amiile athanu waahiya athiyana ni anamwane mootikhiniha, owo aahaakawela oomuchara awe, nave oomuchara yaahaakawela achu. (Mat. 14:19) Owo aahaacelekhela ancipale moorweela wa achu avakhaani. Mmahiku ahu, owo onavaha yoolya yoomunepani mmukhalelo mmohamoha.

⁵ Mwawiihiiha “namuteko oororomeleya ni amiruku,” nikhuuru nikhaani na anna oothanliwa yaawo anapaka makupa a orehererya ni okawiha yoolya yoomunepani variyari va orwa wa Kristu. (Luka 12:42) Variyari va mahiku ookuchula, anna oothanliwa yaawo anapaka makupa a “namuteko oororomeleya ni amiruku” anarumeela vamoha o nipuro ntokweene na anamoona a Yehova. Olelo, anna yaala oothanliwa anapaka makupa a Nikhuuru Noolamulela na Anamoona a Yehova.

⁶ Kristu onapharihela nikhuuru nenla wi avuwihe michaka vooloca sa waakhwanela wa sooloherya sa Mpiipiliyani ni ovaha ohoolela mweelukuluku aya ni ophariheleya wa Malakiheryo a Piipiliya a nihiku ti nihiku. Yoolya yeela yoomunepani enakaiwa mmilokoni sa Anamoona a Yehova. (Isa. 43:10; Gal. 6:16) Mu ilukuluku sakhalai, namuteko oororomeleya, aari kapuro, aavareryela sa vaate. Moolikana, namuteko oororomeleya ni amiruku oovahiwa murici wa ohoolela emusi ya nroromelo. Nave tho namuteko oororomeleya onnavareryela ichu soomwiilini, muteko woolaleerya, marehereryo a muthukumano wa ekulucu ni wa muceche, waathanla anna wi erumeeleke mmakupa oohiyanahiyana mmarehereryo, ni opakiwa soolaleeryiwa sa Piipiliya, soothene inapakiwa wi okhaviheryiwe “muhuwo.”—Mat. 24:45, TNM.

⁷ Vano taani ori “muhuwo”? Oloca mookwasa, ti yaale anacelekheliwa. Wuupaceryani, muhuwo yaari yaale oothanliwa. Vahoolo vaya, muhuwo onapaka makupa a muloko mutokweene wa “ipucepuche ikina.” (Yoh. 10:16) Makhuuru oomeeli analya yoolya yoomunepani enakaiwa ni namuteko oororomeleya.

⁸ Variyari va yoohooxa etokweene, vaavaa Yesu oneereiye arwe ni othoriha elapo ela yoonanara, owo onahaala omunnyererya namuteko ororomeleya “muhakhu awe woothene.” (Mat. 24:46, 47) Oothene anapaka makupa a namuteko oororomeleya anahaala waakhela nchuwelo naya wirimu. Oohalela a 144.000, anahaala wuuka olamulelo wa Kristu wirimu. Naamwi ahihaalaka okhalavo namuteko oororomeleya veelaponi ya vathi, Yehova ni Yesu anahaala ovaha ohoolela mu Omwene wa Mesiya moorweela wa yaale oothanliwa wi erumeele ntoko ‘alamuleli.’—Sal. 45:16.

NTAKHARA HEENI ‘OWUUPUWELA AHOOLELI’?

⁹ Nookhalano mathowa mancipale a ‘owuupuwela ahooleli’ ni wooniherya waaroromela wahu yaawo. Ntakhara heeni weerano yeela ti yamphurelo ahu? Murummwa Paulo oriye: “Ti yaawo anaweherya okumi anyu ewaakhulelakaani, muwiiweleleke wi muteko aya okhale woohakalaliha ohiya wawiikhupanyerya. Yiikhupanyeryaka, nyuwo hamunaphuravo echu.” (Ahe. 13:17) Ti yoochuneya wa hiyo okhala awiiwelela ni ochariha ohoolela onarweela wa anna yaawo nthowa nawi awo annavareryela okhapeleleya wahu ni okhala wahu phaama woomunepani.

¹⁰ Ntoko erempwaaya mu 1 Korinto 16:14, Paulo oriye: “Mweereno soothene ni osivela.” Soolakelela inapakiwa ni achu a Muluku inathipeleya mmukhalelo yoola woochuneya wa osivela. Elociwaka sa osivela, yoorepa ya 1 Korinto 13:4-8 eriye: “Osivela onnavilela, osivela ti wooreera murima, honakhalela nrima; osivela honiithamala, honiikushererya. Honeerano soohiphwanelela, honaavya yoomureerela mwaneene, honasarasareya murima, honiithukumanyerya mathowa. Honahakalalela sootakhala, nto onnahakalalela yeeparipari. Onnawethano soothene, onnaroromela soothene, onnaweherya soothene, onnavilelano soothene. Osivela honamalaru.” Woona wi osivela mathipelo a soolakelela soothene inapakiwa wi saakhaviherye alapeli a Yehova, nookhalano mathowa oothene a wiisoona okhala ookhapeleleya wa ohoolela ntoko yoola. Chiryene, ela yawooniherya ya osivela wa Yehova.

¹¹ Hiiha ntoko mu nsana noopacerya, yaale Yehova onaaphariheleiye wi yaahoolele achu awe toohiphaameya. Naamwi hiiha, Yehova aahaapharihela achu oohiphaameya khalai wi ekhwaaniherye yookhwela awe. Nowa aahimuteka mwaaceya nave aahilaleerya vooloca sa otoloxiwa wa elapo mmahiku awe. (Map. 6:13, 14, 22; 2 Ped. 2:5) Mose aahithanliwa wi aahoolele achu a Yehova okhuma o Yikuputu. (Muk. 3:10) Achu oohiphaameya yaahiveereliwa wi emurepe Piipiliya. (2 Tim. 3:16; 2 Ped. 1:21) Nthowa na Yehova waapharihela achu oohiphaameya mmahiku ahu wi ehoolele muteko woolaleerya ni wapaka oohuserya henaceecheiha nroromelo nahu mmarehereryo a Muluku. Moohiyana, ninnalipihiwa woona wi noosuwela wi nihirivo nikhaviheryo na Yehova, marehereryo hiyi ekhwaaniherye miteko soothene anapakaaya. Moorweela wa owetha vancipale ni mavyakelo, namuteko oororomeleya onnooniherya wi munepa wa Muluku onnahoolela phaama. Mareeliho annayeeheryiwa makupa awooneya a mmarehereryo a Yehova olelo. Mwawiihiiha, hiyaano ninnakhaviherya ni murima woothene ni wooniherya ororomela.

NNOONIHERYA HAI WAAROROMELA WAHU?

¹² Yaale athanliwe okhalano mirici mmulokoni annooniherya ororomeleya waya moorweela wa weemererya moohakalala ni okhwaaniherya malakiheryo vooloca sa mirici saya. (Saw. 20:28) Ntoko alaleeryi a Omwene, ninnakhwaaniherya moolucuwa muteko woolaleerya, opaka oxekurya, ni weeciha soohuserya sa Piipiliya. (Mat. 24:14; 28:19, 20) Wi nikhaviheryeye phaama moorweela wa yoolya yoomunepani enavahereryiwa ni namuteko oororomeleya, ninniirehererya ni oya mmithukumano Seekristu, ophitaanyerya mithukumano sa ekulucu ni sa muceche. Ninnaphura vancipale moorweela wa olipihana nnakhalaahuno vaavaa nnathukumanaahu ni annihu Eekristu.—Ahe. 10:24, 25.

¹³ Vaavaa nnakhaviheryaahu marehereryo ni muhakhu ahu, nnooniherya wi ninnaroromela. (Masi. 3:9, 10) Vaavaa nnoonaahu wi annihu aathoiwa, ninnaakhaviherya moohilekela. (Gal. 6:10; 1 Tim. 6:18) Nneerano yeela mu osivela wa onna, ni ovareryela ekari yoothene wi nooniherye wa Yehova ni marehereryo awe wi ninnathamalela mahala awe.—Yoh. 13:35.

¹⁴ Ninnooniherya tho wi ninnaroromela marehereryo moorweela wa okhaviherya soolakelela inapakiwa. Ela enaphitaanyerya ochariha mwawiiyeviha ohoolela wa yaale arino murici, ntoko ooweherya a ekulucu ni asitokweene a mmulokoni. Anna yaala anaphitaanyerya yaale ari “ahooleli,” nnaphwanelaahu owiiwelela. (Ahe. 13:7, 17) Naamwi nihiiwexexaka mathowa oothene a soolakelela inapakiwa, noosuwela wi waakhaviherya yaawo enahaala okhala ya mphurelo ahu. Ntoko yookhumelela, Yehova onamureeliha wiiwelela wahu wa Masu awe ni marehereryo awe. Ninnooniherya tho wiiwelela wahu wa Mutokweene, Yesu Kristu.

¹⁵ Chiryene, nookhalano mathowa oothene a omuroromela wahu namuteko ororomeleya ni amiruku. Satana, muluku a mutano, onnapaka owetha woothene wi anyemulihe nsina na Yehova ni marehereryo awe. (2 Kor. 4:4) Nihicociwe ni mavyakelo oonanara a Satana! (2 Kor. 2:11) Owo oosuwela wi “elukuluku awe ehanle vakhaani” pahiru wi awaleliwe, nave ori oolakelela waahuweliha achu ancipale a Yehova. (Wup. 12:12) Nto, vaavaa Satana onooniheryeiye owetha wawe, nnaphwanela omwaacamela Yehova. Nnaphwanela omuroromela Yehova mu ephiro yeeyo onaphariheleiye wi aahoolele achu awe mmahiku ahu. Naaneerano hiiha enamukumiherya wiiwanana wa onnaahu.