Mmalihe Owanawana Mmukhalelo Woosivela

“Mukhale ni muretxhele mukina ni mukhwawe.”—MARKO 9:50.

MACIPO: 39, 77

MWAAHAALA WAAKHULA HAI?

Ekano taani Yesu ovanheiye wi enikhaviherye omaliha owanawana moosivela?

Makoho taani Mukiristu onaphwaneleiye wiipakela vaavaa onalakeleleiye omaliha owanawana ni akina?

Ti mwawiihai mikhalelo miraru silociwe mu Mateu 18:15-17 inaphwanelaaya ophariheliwa wi omalihiweno owanawana?

1, 2. Owanawana taani onalociwa mu Maphatxuwelo, nave ntakhara heeni ti yaphaama othokororya?

MONTOKO wuupuwela vooloca sa owanawana wa achu onaphwanyeya Mpiipiliyani? Pahiru mu liivuru a Maphatxuwelo, ninnaalakhanya wi Kayine aamunyoka Havele (Maphatxuwelo 4:3-8); Lameke aamunyoka mmiravo nthowa nawi mmiravo owo amphoreiha yene (Maphatxuwelo 4:23); akukhula a Aaparahamu yaanawanawana ni akukhula a Looti (Maphatxuwelo 13:5-7); Hakari aahiisunnuwiha vamiithoni va Sarai, nave Sarai aananariwa ni Aaparahamu (Maphatxuwelo 16:3-6); Isimayeli aari oonanariwa ni muchu ori oothene, nave achu oothene yaari oonanariwa ni yene.—Maphatxuwelo 16:12.

² Ntakhara heeni mikhalelo iha sa owanawana sinnaromoliwa Mpiipiliyani? Nthowa nawi hiyaano nnanwerya ohuserya sootakiherya iha sa achu oohiphaameya yaawo yaarino makacamiho aya. Hiyaano tho naachu oohiphaameya, nave vaavaa nnakhalaahuno makacamiho oolikana mu okumi ahu, nnaphwanela ochariha sootakiherya saphaama sinaphwanyeya Mpiipiliyani ni osepa soonanara. (Aroma 15:4) Ela enahaala onikhaviherya ohuserya mukhalelo wa okhala a murecele ni akina.

3. Tiheeni mwaha ola onahaalaaya othokororya?

³ Mmwaha yoola, nnahaala ohuserya ntakhara heeni nnaphwanela omaliha owanawana naari ohiiwanana, ni mukhalelo nnahaalaahu weerano. Nnahaala tho ohuserya malakiheryo a Mpiipiliyani yaawo anahaala onikhaviherya omaliha makacamiho ni otitelela okhalano onthamwene waphaama ni Yehova ni akina.

NTAKHARA HEENI TI WOOCHUNEYA AKAPURO A MULUKU OMALIHA OWANAWANA?

4. Moonelo taani omwalamwanle mweelaponi yoothene, nave ni sookhumelela taani?

⁴ Satana toneeriha wi okhalevo okawanyeya ni owanawana. Ntakhara heeni nnalocaahu hiiha? Mu Eeteni, Satana aalonce wi muchu ti muchu onanwerya olakelela mukhateiye weera yaphaama ni yoonanara ohiya olamuleliwa ni Muluku. (Maphatxuwelo 3:1-5) Nyenya vaavaa nnavareryaahu elapo olelo, ninnoona wi moonelo ola pahiru onaruuha makacamiho. Achu ancipale anoona wi aakhalano owerya wa olakelela mukhataaya weera yaphaama ni yoonanara. Awo tawiirumiha, a nrima ni a mapokha, nave haniikasoopa wakhala wi soolakelela saya sinnaaphoreiha akina. Moonelo ntoko yoola onnakumiherya owanawana. Piipiliya onnanleela wi wakhala wi ninnaakuvela okhalano esara, nnahaala okhala oowanawana ni akina ni opaka soocheka sincipale.—Masiposipo 29:22.

5. Yesu aahusinhe hai achu vooloca sa omaliha ohiiwanana?

⁵ Variyari va Mwaha wa Vamwaakoni, Yesu aahaahusiha oohuserya awe opaka murecele ni osepa ohiiwanana, naamwi weerano hiiha waahaala okhala woovila. Ntoko yootakiherya, owo aahaaleela okhala oopisa murima, opaka murecele ni akina, ohinanariwa, waakuvela omaliha ohiiwanana, ni waakhwela amwiicani aya.—Mateu 5:5, 9, 22, 25, 44.

6, 7. (a) Ntakhara heeni ti wookhweleya omaliha ohiiwanana mwawaakuveya? (b) Makoho taani akapuro oothene a Yehova anaphwanelaaya wiipakela?

⁶ Olelo, ninnamulapela Yehova vaavaa nnavekelaahu, olaleerya, ni oya mmithukumano sahu. Wakhala wi hannapaka murecele ni annihu, Yehova heemererya omulapela wahu. (Marko 11:25) Wi nikhale asinthamwene a Yehova, nnaphwanela waalevelela yaale ananchekela.—Mwaalakhanye Luka 11:4; Éfeso 4:32.

⁷ Yehova onaweherya wi akapuro awe oothene ekhale oolevelela ni okhalano waataana ni akina. Nnaphwanela wiikoha: ‘Mano kinnaakuvela waalevelela annaka? Kinnasiveliwa okhala ni yaawo?’ Wakhala wi mohoona wi ti woochuneya okhala oolevelela, mvekele wa Yehova nave mumveke wi ookhaviheryeeni. Tiithi ahu a wirimu onahaala wiiwa ni waakhula mavekelo ntoko yaawo.—1 Yohani 5:14, 15.

MANO MUNANWERYA OLEVELELA WAKHALA WI MOOPHUCIWA?

8, 9. Tiheeni nnaphwanelaahu weera wakhala wi noochekeliwa?

⁸ Oothene hiyo naachu oohiphaameya, mwawiihiiha nnaphwanela oweherya wi achu anahaala oloca naari weera echu enahaala oninyeenyeiha. (Eklesiyaste 7:20; Mateu 18:7) Munahaala woona hai? Nnanwerya ohuserya echu yookhweleya mu yootakiherya enacharela: Murokora aahaalocela anna eeli va muthukumano. Nyenya munna mmoha aananariwa ni mukhalelo murokora aamulocenleiye. Vaavaa anna ala yaaryaayavo eeli pahiru, munna ananariwe aapacerya omwaapa murokora ole. Nyenya, munna mukina aamupuxerya wi murokora ole aanamurumeela Yehova mu iyaakha 40 naamwi akumana ni sawuukhula. Yene aasuwela wi murokora haachuna omunyeenyeiha. Munna ole onne hai? Owo aaloca: “Wooloca eparipari.” Voocharela owo aathanla ocuwala yeeyo yeeren’ye.

⁹ Yaweereya ela enanihusiha eheeni? Wakhala wi muchu ooniphuca, nnaphwanela othanla echu yaweera. Muchu oosivela onnalevelela. (Mwaalakhanye Masiposipo 10:12; 1 Pedro 4:8.) “Olevelela sotxhekeliwa” echu yaphaama wa Yehova. (Masiposipo 19:11; Eklesiyaste 7:9) Vano elukuluku ekina muchu aloca naari eera echu enahaala woonyeenyeihaani, mwiikohe: ‘Kinnaphwanela olevelela echu ela? Apwanne ti woochuneya otitelela wuupuwelelaka sa yeela?’

10. (a) Moonelo taani murokora mmoha aareiyeno wuupaceryani vaavaa aaphwanyeriweiye mathowa? (b) Yoorepa taani yaamukhavihenrye murokora ola okhapelela murecele?

¹⁰ Vaavaa akina analocaaya echu yoonanara wa hiyo, onamukhala woovila ocuwala masu aya. Muthokororye yeeyo yeeren’ye ni piyoneera oniichaniwa Lucy. Akina mmulokoni yaanaloca masu oonanara vooloca sa mukhalelo awe wa olaleerya ni opharihela wawe elukuluku. Owo aatepa onyeenyeya nave aaveka miruku wa atokweene. Tiivi yaari yookhumelela? Owo ooloca wi awo yaampharihela Piipiliya wi emukhaviherye omaala wuupuwelelaxa vooloca sa masu oonanara a akina nave apacerya wuupuwelela sincipale vooloca sa Yehova. Owo aalipiheya vaavaa aamwaalakhanyeiye Mateu 6:1-4. (Mwaalakhanye.) Iciciri iha saamuupuxerya wi omuhakalaliha Yehova echu yookhweleyaxa. Hiiha owo aathanla ocuwala masu oonanara. Vano, wakhala wi akina annamulocela masu oonanara vooloca sa muteko awe wa olaleerya, owo onnahakalala nthowa nawi oosuwela wi onachuna omuhakalaliha Yehova.

VAAVAA MUHINAPHWANELAANYU OCUWALA ECHU MWEERELIWAANYU

11, 12. (a) Mukiristu onaphwanela weera eheeni asuwela wi ‘munna [awe] omutxhekela?’ (b) Tiheeni nnahuseryaahu orweela wa mukhalelo Aaparahamu aamalinheiye ohiiwanana? (Moone eruku yoopacerya.)

¹¹ “Ntakhara tinnakwachuliwahu othene hi va itchu sinchipale.” (Yakobo 3:2, Nlakano Nahihano) Mwaanyiherye wi moosuwela wi munna oonyeenyeya wa nthowa na echu mwenraanyu naari muloncaanyu. Tiheeni mwaahaalaanyu weera? Yesu ooloca wi “wavelèlaka vanipuroni na mukutxho yovaha-à, nto wupuwelà wi munna ohotxhekela, hiyà vava yovaha-à, okòkele otxhuli, wapatxerye watàna ni munna-à, nave hawè wavelèle yovaha-à.” (Mateu 5:23, 24) Mwawiihiiha muloce ni munninyu. Vaavaa muneeranyuno yeeyo, yoolakelela anyu okhale opaka murecele ni yoowo. Munaphwanela weemererya yoohesa anyu nave muheererye omvaha nthowa. Murecele ni annihu echu yookhweleyaxa.

¹² Piipiliya onnooniherya mukhalelo akapuro a Muluku anaphwanelaaya opaka murecele wakhalavo ohiiwanana. Ntoko yootakiherya, Aaparahamu ni musulwawe Looti, oopiili ala yaakhalano axinama ancipale, nave akukhula aya yaapacerya owanawana nthowa nawi hiyaaphwanya munyepu wawaakhwanela. Woona wi Aaparahamu aachuna murecele, owo aamweemererya Looti othanla elapo yaphaama. (Maphatxuwelo 13:1, 2, 5-9) Ela chiryene yootakiherya yaphaama wa hiyo! Apwanne Aaparahamu aayeleela moomalela ichu sawe nthowa na mahala awe? Hooye. Moohilekela, Yehova aamulaiherya omureeliha Aaparahamu ni ichu sincipale opwaha seiye aayeleenleiye. (Maphatxuwelo 13:14-17) Tiheeni nnahuseryaahu? Wakhala wi nooyeleela ichu ikina, Yehova onahaala onireeliha vaavaa nnamalihaahu owanawana mmukhalelo woosivela.^[1]—Moone masu a vathi omakuchuwelo.

13. Muhooleli mmoha onne hai ni masu oonanara, nave tiheeni nnahuseryaahu orweela wa yootakiherya awe?

¹³ Muthokororye yootakiherya ya hiihaanoru. Muhooleli muvyaani a nikupa na muthukumano wa muceche aamwiichana munna wi amveke waakhanle wi ahaala owerya olapa mu nikupa nenla. Munna ole aaloca ichu sincipale soohithariheya nave anwala telefoni nthowa nawi aari oonyeenyeya ni muhooleli oopacerya a nikupa. Muhooleli muvyaani haanyeenyen’ye, nyenya haaphwanela ocuwala yeeyo yeeren’ye. Voovira wa ewora emoha, owo aamwiichana munna wanaawiili nave amveka wi ekumane. Esumana yoocharela, anna ala yaakumana mu Empa ya Omwene, nave emanle ovekela wa Yehova, awo yaachekula mu ewora yantero. Munna aamutharihela yeeyo yeeren’ye ni muhooleli oopacerya. Muhooleli muvyaani ananwiriyana phaama nave yaathokororya soorepa sookhaviherya. Ntoko yookhumelela, anna ala yaapaka murecele nave yaalapa vamoha mmuthukumano wa muceche. Munna ari oohakalala woona wi muhooleli aaloca ni yene mmukhalelo waphaama.

APWANNE MUNNAPHWANELA WAALEELA ATOKWEENE?

14, 15. (a) Elukuluku taani nnaphwanelaahu opharihela enaphwanyeya mu Mateu 18:15-17? (b) Mikhalelo taani miraru silociwe ni Yesu, nave tiivi enaphwanela okhala yoolakelelaahu mu opharihela?

¹⁴ Makacamiho mancipale variyari va Akiristu eeli anaphwanela omalihiwa weephiini. Nyenya ikwaha ikina honakhala wookhweya. Sawuukhula ikina onnachuneya nikhaviheryo na akina mwawiiwanana ni Mateu 18:15-17. (Mwaalakhanye.) ‘Yotxheka’ Yesu oromonleiye tahi ohiiwanana vakhaani ni Akiristu akhwiihu. Nnasuwela hai? Yesu olonce wi wakhala wi mulipa oocheka onnakhooca ocharuwa amanle oloca ni munnawe, ni anamoona, nave ni atokweene, owo onnaphwanela wooniwa ‘ntoko mmalapo nari mulipa musokho.’ Olelo, eyo enataphulela wi onaphwanela wiikariwa mmulokoni. ‘Yotxheka’ yeeyo yaaphitaanyerya ichu ntoko wiiya naari onyemula, nyenya hiyaaphitaanyerya soocheka ntoko ocapaheya, okonihana wa achu a mwiikho woolikana, ovaanya, naari olapela soophwaniherya. Soocheka sa mukhalelo yoola sinaphwanela othokororyiwa ni atokweene.

¹⁵ Yookhwela ya Yesu avahaka ekano yeela waari onooniherya mukhalelo wa omukhaviherya munna nthowa na omusivela. (Mateu 18:12-14) Nnii ncharihe hai ekano yeela? (1) Nnaphwanela weererya opaka murecele ni munnihu nihaawompe achu akina. Ti woochuneya waavya elukuluku wi nloce ni munnihu. Nyenya tiheeni nnaphwanelaahu weera wakhala wi nlelo hiwaavo murecele? (2) Nnaphwanela oloca ni munnihu ninwompe muchu mukina yoowo osuwenle mwaheene naari yoowo onahaala woona waakhanle wi yookhalavo echu yoonanara yeeren’ye. Wakhala wi nikacamiho nlo nooreheryeya “womukòkiherya munphironi mwaphama.” Nyenya wakhala wi mooloca ni munninyu nave hamunawerya opaka murecele ni yene munaphwanela (3) waaleela atokweene.

16. Tiheeni enooniherya wi ochariha ekano ya Yesu ti yamphurelo ni yoosivela?

¹⁶ Ikwaha ikina, tahi woochuneya opharihela mikhalelo iha miraru sinaphwanyeya mu Mateu 18:15-17. Eyo ennanilipiha. Ntakhara heeni nnalocaahu hiiha? Nthowa nawi ikwaha sincipale, namacheka onneemererya yoocheka awe nave onnacharuwa, mwawiihiiha tahi woochuneya omwiikara mmulokoni. Muchu ochekeliwe onaphwanela omulevelela munnawe wi ekhaleno murecele. Mwawiihiiha ti yookwakwaleya ekano ya Yesu wi tahi woochuneya waaleela atokweene mwawaakuveya. Nnaphwanela waaleela atokweene pahiru wakhala wi noochariha mikhalelo miili soopacerya nave sakhalavo sawooniherya wi yoopakiwa echu yoonanara.

17. Mareeliho taani nnahaalaahu opuha wakhala wi ‘ninnasya muretxele’ ni akina?

¹⁷ Woona wi nlelo naachu oohiphaameya, nnahaala otitelela waachekela akina. Yakopo oorepa: “Akhala mutxhu ohitxhenke ni malotxelo, mutxhu owo t’orera murima wakhwanela. Owo onnawerya wetxiha mwili awe ni makhalelo aphama.” (Tiyako 3:2) Naachunaka omaliha owanawana, ti woochuneya weeravo echu wi ‘nasyeke muretxele ni otxharelelaka yowo.’ (Salumu 34:15) Natitelela opaka murecele ni akina, nnahaala okhalano onthamwene waphaama ni anna vamoha ni arokora, nave eyo enahaala onikhaviherya okhala vamoha. (Salumu 133:1-3) Echu yookhweleyaxa, nnahaala okhalano onthamwene ni Yehova, “Muluku a muretxele.” (Aroma 15:33) Nnahaala opuha mareeliho oothene wakhala wi noomaliha owanawana moosivela.

[Endnote]

[Ekaaxa va epaaxina 12]

MASU ATHARIHIWE

Wiiya: Omunyenka muchu ni yoolakelela ya omwiiyerya naari okuxa echu awe yasisapo

Onyemula: Oloca echu yoonanara naari ehiri yeeparipari wa muchu yeeyo enananariha ophwanelela wawe

[Eruku va epaaxina 11]

Ti wookhweleya waavya elukuluku ya oloca ni munninyu wi mpake murecele (Moone eparakrafo 15)