Masana Annamoona Omapacereryo wa Pentekoste

Amanle oviihiwa, Yesu onnaphakana ni arummwa awe khumi nammoha wi yakumane o mwaako wo Kalileya. Arummwa akina ari weiwo tho, awaakhwana masana mathanu, akina a yaawo woopaceryani yaakhwile minikwa. (Mateu 28:17; 1 Korinto 15:6) Koma yeeyo Yesu onaloceiye hiihaano ennamweeriha mmoha ti mmoha a yaawo olekecheya wi owo mukumi chiryene.

Yesu onnaatharihela wi Muluku omvaha owerya woothene wirimu ni vathiva. Yesu onnaalamulela: “Haweni, mwahusihe atxhu othene, mwapatisaka wa nsina na Atithi, na Mwana ni na Munepa Wawela, nave mwahusihaka wera sothene korummakani.” (Mateu 28:18-20) Chiryene, ohiya pahiru wi Yesu mukumi, nto owo nlelo ookhalano nchuno nawi muchaka waphaama olaleeryiwe.

Oomuchara a Yesu oothene—alopwana, athiyana, ni amiravo,—ahaakhela muteko yoola wa waapaka oohuserya. Amwiicani akhweya anamweererya ohiiha olaleerya waya ni ohusiha, nto Yesu onnaroromeliha: “Kòvahiwa ikuru sothene, wirimu ni vathiva.” Ela enataphulela eheeni wa oomuchara awe? Owo onnaaleela: “Miyo kini kinakhala ni nyuwano mahiku othene ophiyerya ophiyerya nihiku nomaliha elapo.” Yesu halonce wi oothene yaale anapaka makupa mmuteko woolaleerya anahaala owerya opaka miteko sootikhiniha. Ohiya yeeyo, awo anahaala okhalano nikhaviheryo na munepa waweela.

Arummwa a Yesu annamoona owo mu ikwaha sincipale mu “mahiku makhumi masese” amanle oviihiwa mookhwani. Awo hanamusuwela naamwi iisoonihale “ wa yawo awonene ni ineneryo sintxipale sohivanyeya.” Owotho aahaahusiha awo vooloca “sa Omwene wa Muluku.”—Saweriwa T’arummwa 1:3; 1 Korinto 15:7.

Mwawooneya vaavaa arummwa aryaaya o Kalileya, Yesu onnaathoonyerya awo okookele o Yerusalemu. Vaavaa onakumaneiye ni yaawo mu epooma, Yesu onnaloca: “Muhipwahewo o Yerusalemu, nto n’wehererye wereya wa nroromeliho na Atithi mukiwalanyu kilotxaka. Paripari Yohani Mpatisa ovan’he opatiso ni mahi, nto nyuwano muni mpatisiwe ni Munepa Wawela, nihanle vakhani ophiya nihiku nene.”—Saweriwa T’arummwa 1:4, 5.

Ohoolo waya Yesu onnakumana ni arummwa awe. Owo onnaahoolela yaawo “ophiyerya o Betaniya,” onakhala oseresere wa mwaako Olivera. (Luka 24:50) Moohipwacha echu eri yoothene Yesu aaleenleiye arummwa awe vooloca sa owela wawe wirimu, nlelo awo aneemererya wi mmukhalelo mukina Omwene awe onahaala okhala veelaponi yavathi.—Luka 22:16, 18, 30; Yohani 14:2, 3.

Arummwa annakoha: “Pwiya, tivano onerawe wemese wiliwili omwene wa Isarayele?” Owo onnaakhula mookhweya: “Tahi wawinyu osuwela mahiku Atithi athanlelaya mokhwelani mwaya.” Voocharela, Yesu onnaceenyerya muteko arummwa awe anaphwanelaaya opaka, alocaka: “Nto onamokhuruwelani Munepa Wawela ni munamwakhela ikuru saya. Vanonto munamukhala anamona aka o Yerusalemu, o Yudeya wothene ni o Samariya, ophiyerya okhomoni wa elapo.”—Saweriwa T’arummwa 1:6-8.

Arummwa ari va mwaako Olivera vamoha ni Yesu omanle oviihiwa mookhwani vaavaa onapaceryeiye owela ayaaka wirimu. Moohilekela neeku ninniikicha woona waya. Amanle oviihiwa mookhwani, Yesu aaniitatusa mu mwiili woomuchu. Koma hiihaano Yesu onnatoroka mwiili aapharihenleiye mu elukuluku yeele, nave owo onnawela wirimu ntoko yoopatusiwa yoomunepani. (1 Korinto 15:44, 50; 1 Pedro 3:18) Vaavaa arummwa oororomeleya anamvareryaaya awelaka, “alopwana eli ewanre sawela” annaphiya wa yaawo. Awo ankeelo atatunse mwiili, yaawo anakoha: “Atxhu nyu o Galileya, mutiteleleni oweha wirimu? Yesu opwan’he akerihiwaka wirimu, nihiku nikina onamukòka, ntoko mmonnanyu ayaka wirimu.”—Saweriwa T’arummwa 1:10, 11.

Pahiru arummwa oororomeleya a Yesu tamonne awelaka wirimu. Vaavaa onahaaleiye orwa wi alamule mu Omwene awe onahaala orwa hiiha ‘ntoko amonnaya ayaka wirimu,’ eyo anataphulela wi pahiru arummwa awe oororomeleya tanahaala osuwela.

Arummwa annakookela o Yerusalemu. Variyari va mahiku oocharela, awo annathukumana vamoha ni arummwa akina ophitaanyerya “Maria amannya a Yesu, ni asinna awe.” (Saweriwa T’arummwa 1:14) Nikhuuru nenla ninnatitelela ovekela. Mwaha mmoha wa nivekelo naya ori omuthanla murummwa mmoha wi amuraceele Yutasi Isikariote nave wi naakhwanele nunturu na arummwa khumi napiili. (Mateu 19:28) Awo anamuchuna muhuserya yoowo eerenle onamoona miteko ni ovinya mookhwani wa Yesu. Ela ekwaha yookuchula Piipiliya onaloceiye sa ovonyeriwa ekari wi esuweliwe yookhwela ya Muluku. (Salumu 109:8; Masiposipo 16:33) Matiya, yoowo akhweya aari mmoha a makhumi mathanu ni meeli yaawo Yesu aaruminheiye, onnathanliwa nave “àkuhiwa mmulokoni wa Arummwa ala khumi na pili.”—Saweriwa T’arummwa 1:26.

Mahiku khumi Yesu amanle owela wirimu, yaaheereya Efesta ya Pentekoste ya Ayuta ya 33 E.K. oohuserya awaakhwana nsana ni makhumi meeli yaahithukumana mu ekwartu ya osulu o Yerusalemu. Mootutusa, oruma ntoko ole wa echeku etokweene waahisareya empa yoothene. Malocelo ntoko mooro yaahikhala awooneya, nave yaahimmorela mmoha ti mmoha aari vaava. Oohuserya oothene yaahipacerya oloca mu ilocelo soohiyana hiyana. Ola muhakalaliha naari munepa waweela yoowo Yesu aalaihenryeiye!—Yohani 14:26.