Mwaavye Omwene, Ohiya Ichu

“Mpatxerye toko wasya omwene wa Muluku, nave itxhu ikina iha inamwatxereriwa wa nyuwo.”—LUKA 12:31.

MACIPO: 40, 98

TIHEENI MUNUUPUWELAANYU?

Ohiyana taani orivovo variyari va yeeyo enanthowa ni yeeyo nnachunaahu?

Ntakhara heeni ninnaphwanela ovareryela nchuno nahu na okhalano ichu soomwiilini?

Ntakhara heeni muryaanyu oolekecheya wi Yehova onanwerya ovaha soothowa sanyu sa nihiku?

1. Ohiyana taani orivovo variyari va yeeyo enanthowa ni yeeyo nnachunaahu?

IRIVO ichu vakhaani sinanthowa wi nikhale akumi. Ntoko yootakiherya, yoolya, yoowara, ni mpuro wa okhalavo. Nyenya ninnachuna ichu sincipale. Nave achu ancipale hanasuwela wi chiryene hasinaathowa ichu soothene awo anachunaaya.

2. Ichu taani achu anachunaaya?

² Akina anakhala mu ilapo soohaawa annachuna ichu soohiyana ni yeeyo muchu onakhala mu elapo yooreela onachuneiye. Mmakupa makina a elapo, achu yaamusiveliwa okhalano telefoni, ecika, naari mpuro wa okhalavo. Mapuro makina, achu anachuna okhalano soowara soowalamela, empa etokotoko, naari okhalano yoowela yakhorowa. Nyenya moohipwacha weiwo nnakhalaahuwo naari waaca wa ikhorowa nryaahuno, nnampacerya ochuna ichu sincipale seiyo sihinanthowa naari nihinaphwanelaahu okula.

WIITHUKUMANYERYA ONANWERYA ONIVOLOWELA

3. Wiithukumanyerya tiheeni?

³ Wiithukumanyerya tiheeni? Moonelo wa muchu yoowo onacicimiha okhalano ichu sincipale opwaha onthamwene awe ni Muluku. Owo hanahakalala ni yeeyo enamuthowa, moohiyana, owo mahiku oothene onamuchunaru. Ophiyerya wi yaale ahirino ikhorowa sawaaca naari yoowo ohinakula ichu soowalamela onanwerya okhala nawiithukumanyerye. Awo anamuhiya ohela Omwene mu nipuro noopacerya mu okumi aya.—Ahebri 13:5.

4. Satana onapharihela hai “minkhela sa mìtho”?

⁴ Satana onachuna wi neemereryeke wi nnampuha okumi moorweela wa okhalano ichu sincipale. Mwawiihiiha owo onnapharihela elapo awe ni “minkhela sa mìtho” wi eererye oneeriha ochuna ichu sincipale. (1 Yohani 2:15-17; Maphatxuwelo 3:6; Masiposipo 27:20) Wiiliwiili ninnawiriyana naari ninnoona mu raatiyu naari mu televisau soolokoha seiyo sineererya onlekecha wi nakule ichu ivyaani. Apwanne montoko okula echu pahiru nthowa nawi moonne mulooxa naari mu televisau naari nwiriyanne mu raatiyu? Wakhala wi tihiiha, akhweya ohoolo waya mwaahuupuwela wi ichu iho chiryene hisoothowaani. Vaavaa nnatitelelaahu okula ichu seiyo sihinanthowa, pahiru nnakacamiha okumi ahu. Ichu iho inanwerya oniweiha mu omurumeela wahu Yehova. Ntoko yootakiherya, akhweya hinikhalano elukuluku yawaakhwanela wi nimuhuserye Piipiliya, orehererya ni ophiya mmithukumano, naari okhuma mmuteko wa olaleerya. Muupuwele, murummwa Yohani oolopola: “Elapo enanvira, vamoha ni minkhela saya.”

5. Tiheeni enahaala weereya wa yaale anapharihela vancipale ikuru saya wi ekhalano ichu sawaaca?

⁵ Satana onachuna wi nipharihele ikuru sahu wi nikhaleno ikhorowa ni ichu sawaaca ohiya opharihela mu omurumeela Yehova. (Mateu 6:24) Nyenya wakhala wi nookhalano nchuno na okhalano ichu sincipale, okumi ahu hokhalano yootaphulela. Nnahaala okhala oosooseya naari okhalano makacamiho a ophwanya ikhorowa. Echu yawoopihaxa, nnahaala oyeleela nroromelo nahu wa Yehova ni Omwene awe. (1 Timóteo 6:9, 10; Wupulula 3:17) Yesu olonce wi “muhaku wa mwilaponi” onakhala ntoko miiwa sinakukuca winnuwa wa mmiso ni ovaha sawiima.—Marko 4:14, 18, 19.

6. Tiheeni nnahuseryaahu orweela wa Parukhi?

⁶ Muupuwele vooloca sa Parukhi, namarepa a mulipa miririmu Yeremiya. Vaavaa Parukhi aapacenryeiye “oloha wera itxhu itokotoko,” Yehova aamuupuserya wi moohilekela Yerusalemu ahaala otolosiwa. Nyenya Yehova aamulaiherya Parukhi wi aahaala ovuluxa okumi awe. (Yeremiya 45:1-5) Parukhi haaphwanela wiilipixerya waavya ichu ikina. Yehova haahaala ovuluxa ichu achu yaaryaayano. (Yeremiya 20:5) Olelo, nnakhala omakuchuwelo wa elapo ya Satana. Vano, ela tahi elukuluku ya otitelela waavya ichu sincipale. Nave hannaphwanela oweherya wi emanle ekoi etokotoko, nlelo nnahaala okhalano ichu nryaahuno hiihaano, naamwi siri sa esisapo wa hiyo.—Masiposipo 11:4; Mateu 24:21, 22; Luka 12:15.

7. Tiheeni nnahaalaahu othokororya, nave ntakhara heeni?

⁷ Vano nnii niwerye hai othokororya ekumi ahu ni ya emusi ahu nave nikhale ootikitheryeya mwa yeeyo eri yookhweleya mu okumi? Nnii niwerye hai osepa wiithukumanyerya? Nave tiheeni enahaala onikhaviherya ohikhala awuukhuwa vooloca sa okhalano yeeyo enanthowa? Yesu aavaha ekano yaphaama va Mwaha wa Vamwaakoni. (Mateu 6:19-21) Hankooni naalakhanye nave nthokororye Mateu 6:25-34. Ela enahaala onlekecha wi nnaphwanela otitelela waavya Omwene, ohiya ichu.—Luka 12:31.

YEHOVA ONNANIVAHA YEEYO ENANTHOWA

8, 9. (a) Ntakhara heeni hannaphwanela oteteiwa ni ichu sinanthowa? (b) Tiheeni Yesu osuwenleiye vooloca sa soothowa sa achu?

⁸ Mwaalakhanye Mateu 6:25. Yesu aasuwela wi oohuserya awe yaari awuukhuwa vooloca sa yeeyo yaaphwanelaaya olya, owurya ni owara, mwawiihiiha va Mwaha wa Vamwaakoni, owo ahaaleela: “Muhitetiwe ni ekumi anyu.” Yesu aachuna waakhaviherya wi yiiwexexe ntakhara heeni yahaaphwanelaaya okhala awuukhuwa ni ichu seiya. Owo aanasuwela wi wakhala wi annateteiwa vancipale, naamwi ni ichu awo chiryene saathowa, yaahaala ocuwala echu yookhweleya mu okumi. Yesu aanakhapelela oohuserya awe ophiyerya waalopola awo ikwaha sese vooloca sa yawoopiha yeela mmwa awe.—Mateu 6:27, 28, 31, 34.

⁹ Vano ntakhara heeni Yesu onanileeleiye ohikhala ooteteiwa ni yeeyo nnahaalaahu olya, owurya, naari owara? Mano, hinnachuna yoolya naari soowara? Chiryene ninnachuna! Nave wakhala wi hinaano ikhorowa sawaakhwana wi nikhaleno ichu seiya, ti woophwanelela okhala awuukhuwa. Yesu aasuwela yeela. Owo aanasuwela soothowa sa achu. Nave aanasuwela wi ‘mmahiku òmaliherya,’ oohuserya awe yaahaala okhalaka mu ilukuluku sookacamiha. (2 Timóteo 3:1) Chiri achu ancipale olelo hanaphwanya muteko, nave ichu inamvira iwalamelaka. Mmapuro mancipale, achu aatepa ohaawa nave arino ichu vakhaani naari wi haanono echu yoolya. Nyenya Yesu tho aasuwela wi okumi wa muchu ti wookhweleya opwaha yoolya nave mwiili opwaha yoowara.

10. Vaavaa Yesu aahusinheiye oomuchara awe ovekela, tiheeni aalonceiye yeeyo yaaphwanela okhala echu yookhweleya mu okumi aya?

¹⁰ Wuupaceryani, Yesu aahaahusiha oohuserya awe wi mmavekeloni mwaya, yaaphwanela omveka Tiithi aya awirimu wi aavahe yeeyo yaathowa. Awo yaaphwanela ovekela: “Munivahe olelo yolya ahu yolelo.” (Mateu 6:11) Mu elukuluku ekina, Yesu aahaaleela wanaawiili wi yaaphwanela ovekela ntakhara soothowa saya sa nihiku. (Luka 11:3) Nyenya ela henataphulela wi nnaphwanela wuupuwelelaka vooloca sa okhalano ichu sinanthowa. Mweeparipari, Yesu aahaaleela oomuchara awe wi ovekela ntakhara orwa wa Omwene wa Muluku echu yookhweleyaxa opwaha ovekela ntakhara ichu saathowa. (Mateu 6:10; Luka 11:2) Wi aakhaviherye oohuserya awe ohiteteiwa, Yesu voocharela aahaahakararya moorweela wa owuupuxerya mukhalelo Yehova onakhapeleleiye soopatuxiwa sawe soothene.

11, 12. Tiheeni nnahuseryaahu orweela wa mukhalelo Yehova onakhapeleleiye ipalame? (Moone eruku yoopacerya.)

¹¹ Mwaalakhanye Mateu 6:26. Nnaphwanela ‘wona ipalame sa wirimu.’ Naamwi ipalame siri soopatuxiwa ikhaani, iho sinnatepa olya. Nave waakhanle wi ipalame sohunnuwa ntoko muchu, saahaala olyaaka ompwaha muchu onalyeleiyevo. Ipalame sinalya sawiima, inuku ni nyuuku. Nyenya iho hasinamisa naari othukumanya yoolya aya. Yehova onnavaha soothene inaathowa. (Salumu 147:9) Chiryene, owo hanahela yoola mminupini mwaya! Iho sinnapaka mukwaha wi saavye, nave sinnaphwanya.

¹² Yesu haakhwa minikwa wi waakhanle wi Tiithi awe onnakhapelela ipalame, owo tho aahaala waakhapelela achu.^[1] (Moone masu avathi omakuchuwelo.) (1 Pedro 5:6, 7) Mweeparipari, hiiha ntoko ipalame, hannaphwanela okhala amankoonya. Nnaphwanela olapa wi nthukumanye yoolya ahu naari waavya ikhorowa wi nikuleno. Yehova onamureeliha wiilipiherya wahu. Nave wakhala wi hinaano ikhorowa naari yoolya yawaakhwanela, owo nlelo onamunivaha yeeyo enanthowa. Ntoko yootakiherya, akina ananwerya wuuka ni hiyo yeeyo aryaayano. Yehova tho onnavaha ipalame nipuro na okhalavo. Owo oovaha mavyakelo a opaka ipuuru saya, nave onnapaka ichu ipalame sinapharihelaaya wi itekeno ipuuru saya. Moolikana Yehova onamunikhaviherya ophwanya nipuro noophwanelela wi emusi ahu ekhalekevo.

13. Tiheeni enooniherya wi naachu asisapo opwaha ipalame sa wirimu?

¹³ Yesu amanle owuupuxerya oohuserya awe wi Yehova onnalyiha ipalame, owo aahaakoha: “Nyuwo himpwan’he ipalame?” (Mulikanyihe ni Luka 12:6, 7.) Vaavaa aalonceiye ela, Yesu akhweya uupuwela mukhalelo aahaaleiye ovaha okumi awe ntakhara achu oothene. Mweeparipari Yesu haakhwile ntakhara ipalame naari mwaasina vyakala. Owo okhwile ntakhara hiyo wi nikhaleno ekumi yoohimala.—Mateu 20:28.

14. Tiheeni muchu ooteteiwa ohinaweryeiye weera?

¹⁴ Mwaalakhanye Mateu 6:27. Tiheeni Yesu aachuneiye oloca vaavaa aalonceiye wi haavo onawerya waaceererya mahiku a okumi awe moorweela wa okhala ooteteiwa? Owo aachuna oloca wi hannawerya waaceererya okumi ahu moorweela wa okhala awuukhuwa ni ichu sinanthowa. Chiryene, wakhala wi ninnuukhuwa vancipale, nnahaala wiiceliwa ophiyerya okhwa.

15, 16. (a) Tiheeni nnahuseryaahu orweela wa mukhalelo Yehova onakhapeleleiye ithutu sa mutakhwani? (Moone eruku yoopacerya.) (b) Makoho taani nnaphwanelaahu wiipakela nave ntakhara heeni?

¹⁵ Mwaalakhanye Mateu 6:28-30. Ninnahakalala nakhalano yoowara evyaani, xaxaxa vaavaa nnayaahu mmuteko wa olaleerya naari mmithukumano sa muloko naari mitokotoko. Apwanne ninnaphwanela okhala ‘oteteiwa wa nthowa n’owara’? Wanaawiili, Yesu aawuupuserya oohuserya awe mukhalelo Yehova onakhapeleleiye soopatusiwa sawe. Yesu aapharihela yootakiherya ya “ithutu sa mutakhwani.” Hisaavo ithutu sa seiya inawerya opaka soowara saya. Nyenya ti sooreera hiiha ntoko Yesu aalonceiye wi “nari mano Salomau momwemeneni mwawe wovuwa hatonko owarela ntoko ithutu seiyo sa muthwani”!

¹⁶ Muupuwele yeeyo Yesu aalonceiye voocharela: “Vano Muluku onawariha ithutu sa mutakhwani . . . , howarihani opwaha ithutu seiyo nyuwo atxhu òroromela vakhani?” Moohikhwa minikwa onamweerano! Nyenya oohuserya a Yesu yaanachuna nroromelo nawaaca. (Mateu 8:26; 14:31; 16:8; 17:20) Awo yaaphwanela ororomela wi Yehova aanachuna waakhaviherya nave wi aahaala weerano hiiha. Hanka hiyaano? Apwanne ninnaroromela wi Yehova onahaala onikhapelela?

17. Tiheeni enahaala onanariha onthamwene ahu ni Yehova?

¹⁷ Mwaalakhanye Mateu 6:31, 32. Ancipale ahimusuwenle Yehova annateteiwa ni okhalano ikhorowa ni ichu sincipale. Nyenya wakhala wi noheerano emohamoha, nnahaala onanariha onthamwene ahu ni yene. Noosuwela wi Yehova, Tiithi ahu nave owo onnanisivela. Nave ninnaroromela wi wakhala wi noheerano yeeyo onanivekeiye ni ohela Omwene mu nipuro noopacerya mu okumi ahu, owo onahaala onivaha soothene nnachunaahu moopwahaxa. Hiyaano tho noosuwela wi onthamwene waphaama ni Yehova tonahaala oniruuhela murecele, nave enamunikhaviherya okhala oohakalala nakhalano “yolya ni yowara” enanthowa.—1 Timóteo 6:6-8.

APWANNE OMWENE WA MULUKU ONAKHALA MU NIPURO NOOPACERYA MU OKUMI ANYU?

18. Tiheeni Yehova osuwenleiye vooloca sa hiyo, nave tiheeni onahaaleiye oneerela?

¹⁸ Mwaalakhanye Mateu 6:33. Wakhala wi ninnahela Omwene mu nipuro noopacerya muukumini mwahu, Yehova onahaala onivaha soothene sinanthowa. Yesu oothariha ntakhara heeni nnaphwanelaahu ororomela yoolaiherya yeela. Owo ooloca: “Atithinyu ari wirimu ásuwela wi mórammwa itxhu seiyo.” Yehova onnasuwela echu enoothowaani naamwi muhaakumve osuwela wi ennoothowaani. (Filipi 4:19) Owo oosuwela ikuwo taani sinahaala onthowa. Owo tho oosuwela yoolya taani enahaala woothowaani. Nave oosuwela wi nyuwaano ni emusi anyu munnachuna nipuro na okhalavo. Yehova onahaala weeravo echu wi mukhaleno soothene sinoothowaani.

19. Ntakhara heeni hannaphwanela okhala awuukhuwa vooloca sa yeeyo enii yeereye muhoolo?

¹⁹ Mwaalakhanye Mateu 6:34. Wanaawiili Yesu aahaaleela oohuserya awe: “Muhiteteiwe.” Yehova onahaala onivaha yeeyo enanthowa nihiku ti nihiku. Mwawiihiiha hannaphwanela okhala awuukhuwa vancipale ni yeeyo enahaala weereya muhoolo. Wakhala wi ninnuukhuwa, nnahaala opacerya wiiroromela, nave nnahaala onanariha onthamwene ahu ni Yehova. Moohiyana, nnaphwanela omuroromela moomalela.—Masiposipo 3:5, 6; Filipi 4:6, 7.

MWAAVYE VOOPACERYA OMWENE, NAVE YEHOVA ONAHAALA WOOKHAVIHERYAANI

20. (a) Yoolakelela taani munaphwanelaanyu otikitherya mmuteko wa Yehova? (b) Tiheeni munaphwanelaanyu weera wi mukhweihe mukhalelo anyu wa okumi?

²⁰ Yaahaala okhala yoothananiha waakhanle wi hinaano ikuru sawaakhwanela wi nimurumeele Yehova moomalela nthowa nawi nneererya waavya okhalano ichu sincipale! Moohiyana, nnaphwanela omvaha Yehova owetha wahu. Ntoko yootakiherya, mwanwerya oya okhaviherya muloko yoowo orino othowa wa alaleeryi? Mwanwerya okhala Piyoneero? Naari wakhala wi mwa piyoneero, munnuupuwela ovolowa mu Exikola ya Alaleeryi a Omwene? Akhweya mwanwerya omaliha mahiku vakhaani mukhaviheryaka Opeteli naari o ekupweete yootaphulela? Akhweya munaphwanela okhala mulipa awiiveleela okhaviherya Muteko wa Oteka wa Vanipuroni ni omaliha elukuluku anyu wi mukhaviherye otekiwa wa Empa ya Omwene. Muupuwele vooloca sa yeeyo munaphwanelaanyu weera wi mukhweihe mukhalelo wa okumi anyu wi nwerye okhalano elukuluku ni ikuru sawaaca ntakhara miteko sa Omwene. Ekaaxa “Mukhalelo wa Okhweiha Okumi Anyu” ennavaha ikano saphaama. Mvekele wa Yehova wi ookhaviheryeeni olakelela yeeyo munaphwanelaanyu weera. Voocharela mpacerye opaka matorokelo anachuneya.

21. Tiheeni enahaala wookhaviheryaani omwaacamela Yehova?

²¹ Yesu oonihusiha waavya voopacerya Omwene. Vaavaa nneerahuno hiiha, ninnasepa okhala awuukhuwa vancipale ni ichu sinanthowa. Ninnamwaacamela Yehova woona wi ninnaroromela wi yene onahaala onikhaviherya. Ninnahuserya wiivareryela ni ohikula ichu soothene nnachunaahu naari ichu soothene elapo enavahaaya, naamwi nrino owerya wa okula. Wakhala wi nookhweiha okumi ahu hiihaano, enahaala onikhaviherya okhala oororomeleya wa Yehova ni ‘ophwanya ekumi yeparipari’ onlaihenryeiye.—1 Timóteo 6:19.

[Masu a vathi]

[Yooleeliherya va epaaxina 4]

Vano ela tahi elukuluku ya otitelela waavya ichu sincipale

[Yooleeliherya va epaaxina 5]

Yesu aaloca wi okumi wa muchu ti wookhweleya opwaha yoolya nave mwiili opwaha yoowara

[Yooleeliherya va epaaxina 7]

Apwanne ninnaroromela wi Yehova onahaala onikhapelela?

[Ekaaxa va epaaxina 8]

Mukhalelo wa Okhweiha Okumi Anyu

1. Murepele ichu sinoothowaani

2. Muhimaliheke ikhorowa ni ichu sihinoothowa chiryene

3. Mulakelele okula yeeyo enoothowaani isumana soothene naari vamweerini ni ikhorowa munachunaanyu opharihelakaa (Moone masu avathi)

4. Mukulihe, mvahe naari murihe ichu muhinapharihelaanyu

5. Mulive mankawu mwawaakuveya

6. Muupuwele vooloca sa omaliha elukuluku vakhaani omutekoni wanyu

7. Mpake marehereryo mmukhalelo munaphwanelaanyu opaka sincipale mmuteko wa olaleerya

[Nsu na vathi]