Ntakhara Heeni Otolosiwa wa Ayuta Ooheemererya Ori Vakhiviru?

Yesu aahiloca ichu sincipale wi eererye waaceenyerya achu wuupuwelela vooloca sa mukhalelo Muluku onawooneiye. Elukuluku ekina owo onathokororyeiye mwaha yoola amanle oloca ni achu vaate va Mfarisi mmoha.

Akina a yaawo annaloca epahu emoha. Awo annathariha vooloca sa “Agalileya, yawo [Mulamuleli o Roma Pontiyu] Pilato akanyenryeiye ephome aya ni ephome ya mikutxho yahelaya.” (Luka 13:1) Tiheeni awo anachunaaya oloca?

Akhweya Akalileya yaala yaari akina mwa yaawo yiiphiwe vaavaa macikhwi a Ayuta yaamvaanyaaya Pilato opharihela ikhorowa sarweela mmuhakhu wa empa ya Muluku wi atekeno mukoti achunaka opheruxela maahi o Yerusalemu. Akhweya Pilato aawenrye ophwanya ikhorowa iho ni achu yaalapa mu empa ya Muluku. Achu yaaloca epahu ela akhweya yaahoona wi Akalileya yaahihooxeya ni sookhumelela sene woona wi yaahikhalano nthowa mu saweera seiya soonanara. Yesu onnavaanya.

Owo onnaakoha: “Munnupuwela wi Agalileya yawo yari òtxhekasa wapwaha Agalileya akina othene, wona wi àtepa ohosiwa?” Naakhulo naya ti nawi hooye. Nyenya owo onnapharihela yaweereya wi aalopole Ayuta: “Nto mwahirukunusà murima, munamukhwatho othene ntoko yawo.” (Luka 13:2, 3) Voocharela Yesu onnaloca epahu yeeyo akhweya yeeren’ye hiihaanoru nave yiiwanana ni mwaha wa oteka mikoti seiha, akohaka:

“Nave yale khumi nathanu natxharu yaphitiwe ni mutxontxo wo Silowé ni ekhwa, muni ti yàri òtxheka wapwaha atxhu akina o Yerusalemu?” (Luka 13:4) Muloko wa achu akhweya onnupuwela wi muchu ti muchu aakhwile nthowa na saweera sawe soonanara. Wanaawiili Yesu onnavaanya. Owo onnasuwela wi “orèriwa ni otakhaliwa, honamuthanla mutxhu” nave ipahu sintoko seiha sinanwerya omphacuwela muchu ti muchu. (Eklesiyaste 9:11) Mwawiihiiha, Achu anaphwanela ohuseryavo echu orweela wa yaweereya. Yesu onnaaleela “Nto mwahirukunusà murima, munamukhwatho othene ntoko yawo.” (Luka 13:5) Nyenya ntakhara heeni Yesu onnaceenyerya nihusiheryo nenla hiihaano?

Owo oneerano yeela mwawiiwanana ni mpuro oreiyevo variyari va muteko awe woolaleerya, nave owo onnaphwanaphwaniha mwaha mmukhalelo ola: “Mutxhu mmoha àkhalano ematxa awe warimo mukùkhu, nave yole àvinya ayaka wasya sawima, nave hàphwannye. Vanonto àlotxa ni namalima, ariki: ‘Sòvira miyakha miraru kirwelaka sawima sa mukùkhu yola ni kihinaphwanya. Wuhevo! Onakamelelani etxhaya?’ Nto owo àhakhula: Pwiya, hiyà nivano muyakha yola, wi kithipele mukitxe ni kihelemo sawutxelana. Oholo waya wakhweya onanvaha sawima. Wahimà, onamuruma wi wuhiwe.”—Luka 13:6-9.

Opwaha iyaakha raru, Yesu onneererya wunnuwiha nroromelo variyari va Ayuta. Naamwi hiiha, achu avakhaani tenakhala amuhuserya nave ananwerya wooniwa ntoko sawiima sa wiilipixerya wawe. Vano, mu eyaakha yaneesese ya muteko awe, owo onnaacererya wiilipixerya wawe. Enakhala wi owo onahela manyowa variyari va Ayuta yaawo ari mwiri wa mukuukhu moorweela wa olaleerya ni ohusiha o Yuteya ni o Pereya. Ni sookhumelela taani? Pahiru Ayuta avakhaani tanaakhulela phaama. Nto nloko noothene, ninnakhooca olapha nave hiihaano nnahaawela otoloxiwa.

Mukhalelo yoola wa ohaakhulela phaama wa ancipale a yaawo woheereya mu Nawoorowa oocharela. Yesu onahusiha mu esinakooka. Owo onnamoona muthiyana yoowo ophariwe ti nsololo, onahooxeya moovira wa iyaakha khumi nathanu nararu. Amoriwaka ikharari, Yesu onnamuleela: “Muthiyana, wòvuluwa wa eretxa.” (Luka 13:12) Yesu onnamookololela moono awe, nave moohilekela muthiyana onneemela nave onnapacerya omucicimiha Muluku.

Oonanariwa ene mutokweene a esinakooka onnaloca: “Mahiku a miteko ari mathanu na Nimoha, murweleke openusiwa mahiku yala, nave muhirweke nihiku naworowa.” (Luka 13:14) Mutokweene ola hanavaanya wi Yesu ookhalano owerya wa openusa; ohiya yeeyo owo onaathoriha achu nthowa na orwa wi epenusiwe nihiku na woorowa! Yesu onnaakhula ni masu ookhweya wiiwexexa: “Anawisotherye nyu! Mutxhu ti mutxhu wa nyuwo, nihiku naworowa, hanakumiha emope awe nari puru munikholani wi awurihe? Nave mwana ola amwamuthiyana a Abraau omanle miyakha khumi ni mithanu na txharu aphariwe ti satana, hiyari yaphama omutaphula nihiku naworowa?”—Luka 13:15, 16.

Achu yaawo anamwiica Yesu annuuliwa muru, nyenya muloko wa achu onnatepa ohakalala ntakhara ichu sa ovuwa awo anoonaaya Yesu apakaka. Voocharela o Yuteya wenno Yesu onnuuluulela maphwanaphwaniho a yoolaiherya vooloca sa owehererya Omwene, nenlo owo aalonceiye woopacerya ari mmwaaceya mu eniya yo Kalileya.—Mateu 13:31-33; Luka 13:18-21.