Ahusihaka o Pereya Ayaaka o Yuteya

Mu elukuluku, Yesu ori “okhopela okina wa muhitxe Yordano” oniichaniwa Pereya. (Yohani 10:40) Vano, onnaya ohico wa Yerusalemu.

Yesu hari meekheiye. Amuhuserya awe aneeca vamoha ni yoowo, vamoha ni “atxhu antxipale,” ophitaanyerya alipa musokho ni anamacheka. (Luka 14:25; 15:1) Afarisi ni alipa oorepa, yaawo aniica yeeyo Yesu onaloceiye ni onapakeiye, aritho vaava. Awo aakhalano sincipale sa wuupuwelela seiho Yesu omanleiye othariha vooloca sa niphwanaphwaniho na epucepuche yoorimeela, mwaana aarimenle, navetho mulopwana ooreela ni Lasaro.—Luka 15:2; 16:14.

Akhweya Yesu uupuwelelaka onyemuliwa ni wootheryawa amwiicani awe, owo onnaavaha kasope amuhuserya awe. Yesu onnahusiha miyaha mikina seiyo aahusinheiye wuupaceryani ari o Kalileya.

Ntoko yootakiherya, Yesu onnaloca: “Mahiku othene honaweryeya ohikhalavo sokwatxuliha, nto otxulu ti wa yole onarwawo sokwatxuliha . . . Mwikosopeke! Munna-à atxhekà omutxaruse. Nave owo alaphà, omulevelele. Nave owo arwà otxhekela othanu na pili vanihikuni, nave akòkà othanu na pili ariki: Kòlapha, weyano omulevelele.” (Luka 17:1-4) Masu ookuchula akhweya annamuupuserya Petro nikoho nenlo owo aakonheiye vooloca sa olevelela ikwaha thanu napiili.—Mateu 18:21.

Apwanne arummwa anahaala opaka ichu mwawiiwanana ni masu a Yesu? Vaavaa arummwa analocaaya ni Yesu eriki “atxereryà mwa hiyo nroromelo,” owo onnawaakhula ariki: “Mwarino nroromelo nnalikana ni enuku ya mele, mwamulotxa ni mwiri ola muriki: pholeyá ni oye withipele ophareya, mwiri yole wahawela owemereryani.” (Luka 17:5, 6) Chiryene, moohipwacha mukhalelo wa nroromelo nnanwerya waakhwaniha ichu itokotoko.

Yesu achunaka ohusiha ochuneya waya okhala awiiyeviha, ni moonelo woophimelela vooloca sa muchu mukhateiye onnaloca ni arummwa: “Tani wa nyuwo oni arino namalapa awe alimaka nari akukhulaka mihuwo, arikimphiyaru vate, amulèla ariki: ‘Akuvá okirathi vamesa?’ Nto vohiyana vaya, hanapatxerya omulela wi: ‘Kaserye yolya, wará ekuwo yokilapano vamesa, miyo kilyaka ni kiwuryaka, wi hiha onerawe olyeke ni owuryeke?’ Onaya amuthamale namalapa owo, vawera yele arummweiye. Nyuwotho mwerà itxhu sothene murummwanyu, mulotxeke muriki: nri anamalapa asiyo; hiyo nenre yeyo yakhweleya weriwa.”—Luka 17:7-10.

Nnaphwanela wiiwexexa wi omulapela Muluku onaphwanela okhala mu nipuro noopacerya mu okumi ahu. Opwaha yeeyo, nnaphwanela othamalela ekari nryaahuno ya omulapela Muluku ntoko achu aveechokoni vawe.

Vahilekelen’yevo, namichaka orumihiwe ni Mariya vamoha ni Marta onnaphiya. Mariya ni Marta arokora a Lasaro, nave awo anakhala o Petaniya o Yuteya. Namichaka onnaloca: “Pwiya, nthamwene anyu onamwitxeliwa.”—Yohani 11:1-3.

Naamwi asuwelaka wi nthamwene awe Lasaro onamwiiceliwa, Yesu hanahaleeliheya wanthowa na yeeyo. Moohiyana, owo onnaloca: “Eretxa yeyo tahi yokhwano, nto ti yonvuwihano Muluku, wi Mwana avuwihiwe wa nthowa na yeyo.” Owo onnatitelela okhala weiwe oreiyewo mu mahiku meeli nave voocharela onnaaleela arummwa awe ariki: “Hankoni, n’ye wiliwili o Yudeya.” Arummwa awe annaloca: “Muhusiha, mahiku ene yale Ayuda yànasya wovonya ni maluku, nave onnakhwela okòkelawo?”—Yohani 11:4, 7, 8.

Yesu onnaakhula: “Othana horino iwora khumi na pili? Mutxhu onetxa othana hanakwatxuliwa, ntakhara onnona ekamama ya elapo yela. Nto mutxhu onetxa ohiyu onnakwatxuliwa, ntakhara ekamama heri mwa yowo.” (Yohani 11:9, 10) Owo akhweya onaloca wi hiyaakumve ophiya elukuluku Muluku eemerenryeiye okhwaaniheryeya muteko wa Yesu. Ophiyerya vaava, Yesu onachuna opharihela mwawaakhwanela elukuluku vakhaani emuhalenle.

Yesu onnaaceererya: “Ntamwene ahu Lázaro onamukona, nto kinaya onvìha.” Yuupuwelaka wi Lasaro onamwiichuuwa nave onahaala oviinya, amuhuserya annaloca: “Pwiya, arikimukona, onanvuluwa!” Yesu onnaleela mookwakwaleya: “Lázaro òkhwa . . . Nto hankoni wa yowo!”—Yohani 11:11-15.

Asuwelaka wi Yesu aahaala wiiphiwa o Yuteya, vano achunaka omukhaviherya, Tome onnaaceenyerya amuhuserya akina: “Hankoni hiyotho, nakhwe ni yowo.”—Yohani 11:16.