Yesu Onnamviiha Mwaana a Naamukhweli

Amanle ompenusa namalapa a mutokweene a anakhoco, Yesu onnaya o Nayini epooma opwaha mastatiya 32 ohico wo Kafarnau. Owo hari meekheiye. Amuhuserya awe ni achu akina ari vamoha ni yoowo. Ohanle vakhaani wiilavo vaavaa anaacamela o Nayini. Weiwo annaphwanya nikhuuru na Ayuta nteense muruchu. Muruchu wa mmiravo onakerihiwa omahiye wi wavithiwe.

Muchu oothananaxa wa oothene ti mai a mmiravo. Owo naamukhweli, nave vano mwanawe mmoharu ookhwa. Elukuluku iyawe okhwileiye, vaiye nlelo aahanle ni mwanawe aamusiveleiye. Nkaanyiheryani mukhalelo owo aatanneiye ni mwanawe. Navetho ewehereryo awe ni okhapeleleya wawe vooloca sa omwaahiyu aamuroromela mwanawe yoowo. Vanotho mwanawe ookhwa. Taani ani akhaleke ni vaiye ni omukhaviherya?

Voonweha naamukhweli ola, Yesu onnathanana nthowa na ohooseya ni othanana otokotoko wa naamukhweli. Mweepewe nave amuroromelihaka, owo onaloca moosivela ni yoowo: “Ohinle!” Mwawiihiiha owo onnapaka echu ekina. Owo onnaacamela nave onnatannya ntethe orivo muruchu. (Luka 7:13, 14) Mukhalelo awe onnaatikiniha achu nave anneemela. Akhweya achu ancipale anniikoha: ‘Tiheeni onachuneiye oloca? Tiheeni onachuneiye opaka?’

Hanka vooloca sa ale ari ni Yesu mmukwahani, atonko omoona aapenusaka ireca sa mukhalelo woothene? Mwawooneya, awo hatonko omoona Yesu amviihaka muchu okhwa. Naamwi irivo saweereya ipakiwe khalai, apwanne Yesu onanwerya weerano hiiha? (1 Mamwene 17:17-23; 2 Mamwene 4:32-37) Owo onnalamula: “Mwammiravo, miyo kinnoruma: vinyá!” (Luka 7:14) Nave mmiravo onnavinya nave onnapacerya oloca. Yesu onnamperekha wa amannya yaawo yaari oothanana, nyenya vano oohakalalasa, woona wi naamukhweli owo vano hari meekheiye.

Achu voomoona mmiravo oonaka, annamvuwiha Yehova, namavaha a ekumi. Akina anii: “Òhoneya wa hiyo mulipa a miririmu mutokwene.” Akina annaloca: “Muluku òsekurya nloko nawe.” (Luka 7:16) Michaka vooloca sa yaweereya yeela yootikhiniha sinnamwaramwaseya mwawaakuveya vamucecheni nave akhweya sinnaphiya o Nasareti, nipooma na Yesu, mastatiya 10. Ophiyerya wi ohico wo Yuteya, achu annasuwela yeeyo opankeiye.

Yohani Mpatisi nlelo ori mukalaposo nave onachuna osuwela miteko Yesu onapakeiye. Amuhuserya a Yohani annamuleela vooloca sa sootikhiniha seiya. Vano tuuvi ori moonelo awe?