Yohani Mpatisi Onnarehererya Mphiro

Iyaakha 17 saahivira ovinyerya vaavale Yesu aareiyeno iyaakha 12 aapakenleiye makoho ahusiha mu empa ya Muluku. Waari variyari va elukuluku ya ephovo ya 29 E.K. Achu ancipale anamuloca mmusi a Yesu, Yohani, yoowo onalaleerya mu elapo yoothene o makupa a Muhice Yortano.

Yohani mulopwana oohiyana ni akina, mmawarelo ni mmalocelo. Yoowaraawe epakiwe ni mapururu a ekamelu, nave onnawara muyuununi mwawe esinto epakiwe ni nnyapara na mwaasinama. Owo onakhuura misope nave onalya enuwi. Tuuvi ori muchaka awe? “Murukunuse murima, wona wi omwene wa wirimu ori vakhiviru.”—Mateu 3:2.

Muchaka awe onnaahakalaliha oothene yaale ananwiriyana. Ancipale annooniherya nchuno naya na orukunusa mirima, eyo tiwi, otoroka muupuwelo ni meecelo, okhooca mukhalelo aya wakhalai woohiphwanelela. Oothene yaawo anaya onwiriyana anakhuma “o Yerusalemu, a elapo yothene yo Yudeya ni atxhu othene o Yordano.” (Mateu 3:5) Ancipale a yaawo anaya wa Yohani annarukunusa mirima. Owo onnaapatisa, aapwinihaka mmuhice Yortano. Ntakhara heeni?

Owo onaapatisa achu ntoko eneneeryo, naari wooniherya ocharuwa waya woorweela mmurimani ntakhara ochekela waya nlakano na Nlamulo na Muluku. (Saweriwa T’arummwa 19:4) Tahi wi oothene annaphwanelela. Vaavaa ahooleli akina a malapelo, Afarisi ni Asatuki, anarwaaya wa yoowo, Yohani onnawiichana “nloko na inowa.” Owo onnaloca: “Mphareke miteko separipari, sorukunusa murima. Muhìwokeke muriki: ‘Abrahamu ori tithihu’ wona wi kinnolèlani wi Muluku onnawerya otatusa maluku ala wi ekhale ana a Abrahamu. Vano epaso yòkuheriwa mutathari wa miri, wi miri sothene ihirino sawima saphama sùhiwe ni iriheliwe vikho.”—Mateu 3:7-10.

Woona wi Yohani ootepa osuweliwa, ookhalano muchaka wakuru, nave onnaapatisa achu ancipale, anamukucho ni Alevi annayawo wi yamukohe: “Weyano wani?”

Yohani onnalokoha: “Tahi miyo Kristu!”

“Vano wani? wa Eliya?” awo annamukoha.

Owo onnaakhula: “Hoye!”

“Mulipa a miririmu, ti yowe?” awo annamukoha, emupuwelaka Mulipa a Miririmu mutokweene yoowo Mose aamulonceiye wi aahaala orwa.—Malamulo 18:15, 18.

Yohani onnaakhula: “Hoye!”

Awo annatitelela: “Vano wani, wi nikhaleno yawalèla yawo anrumme wa weyano? Nka weyano onisera ani?” Yohani onnaloca: “Mi kà nsu nnakhuwela okulutxuni: mokole ephiro ya Apwiya, ntoko alontxeiye mulipa a miririmu Isaiya.”—Yohani 1:19-23.

Awo annamukoha: “Onapatiseryani, ohikhanle Kristu, nari Eliya, nari mulipa a miririmu?” Owo onnavaha naakhulo noophwanelela: “Mi kinapatisa ni mahi. Veri vanyu òkhalavo yowo muhimusuwenlanyu: yowo onarwa otxuli waka.”—Yohani 1:25-27.

Chiryene, Yohani aahisuwela wi aarehererya mphiro moorweela wa waapatisa achu wi erehererye murima wi emweemererye Mesiya aalaiheryiwe, yoowo aahaala okhala Mwene. Wa yoowo, Yohani onnaloca: “Yowo onarwa otxuli waka, t’ori mutokwene okipwaha miyo, nave nkinaphwanela mano opharela isapato sawe.” (Mateu 3:11) Mweeparipari, Yohani onnaloca: “Onarwa otxuli waka okipwaha, ntakhara owo àkhala, miyo kihakunve.”—Yohani 1:15.

Mwawiihiiha, muchaka wa Yohani wawi “Murukunuse murima, wona wi omwene wa wirimu ori vakhiviru” ti woophwanelela. (Mateu 3:2) Muchaka owo onnavaha onamoona wa vanlakani wi muteko wa orwa wa Mwene a Yehova, Yesu Kristu onahaala opacerya moohilekela.