Masu a Yesu Annaakwacula Achu Ancipale

Mu sinakooka o Kafarnau, Yesu onnahusiha wi owo ephaawu yeeparipari enarweela wirimu. Masu awe mwawooneya annaaceererya yeeyo aalonceiye wa achu yaakoonke orweela makupa onakhumawo nsuwa a ephareya yo Kalileya, yaale yaalyile ipau ni ihopa.

Yesu onnatitelela oloca mwaha awe, ariki: “Asitithinyu yàlya maná okulutxuni ni ekhwa.” Onnahiyaniha ariki: “Miyo ka ephau ya ekumi ekhurun’we wirimu. Yowo oni akhure ephau yeyo onamukhalano ekumi yohimala, nave ephau kineraka kivahe ori mwili aka, kinavahaka wa nthowa na ekumi ya elapo.”—Yohani 6:48-51.

Mu eyaakha 30 E.K., Yesu aahimuleela Nikotemu wi Muluku ootepa oosivela elapo yavathi, ophiyerya omurumiha Mwanawe ntoko Moopoli. Vano Yesu onaceenyerya ochuneya waya okhuura mwiili awe moorweela wa okhalano nroromelo mu woopola owo onahaaleiye opaka. Owo mukhalelo wa waakhela ekumi yoohimala.

Nyenya, achu haneemererya masu a Yesu. Nave annakoha: “Wera oni ere hai wi anivahe mwiili awe okhale olya?” (Yohani 6:52) Yesu onachuna wi awo yiiwexexe wi owo onaloca mukhalelo woosiphela ohiya mukhalelo wawooneya. Nave echu onaloceiye voocharela ennooniherya yoosiphela ene.

“Paripari txhiryene miyo kinnolèlani: mwahikhurà mwili wa Mwana a mutxhu nave mwahiwurya nikhami nawe, himukhalano ekumi . . . Mwili aka ti yolya yeparipari, nave nikhami naka ti yowirya yeparipari. Mutxhu onakhura mwili aka ni onawurya nikhami naka, onakhala mwa miyo.”—Yohani 6:53-56.

Nkaanyiheryani mukhalelo Ayuta anakhalaaya oosarasareya vaavaa aniiwaaya masu a Yesu! Akhweya anuupuwela wi Yesu onaloca sa okhuura mwiili chiryene naari ohiiwelela nlamulo na Muluku vooloca sa ohilya nikhami. (Maphatxuwelo 9:4; Onamukutxho 17:10, 11) Nyenya Yesu hanaloca sa okhuura mwiili naari owurya nikhami mmukhalelo wawooneya. Owo onooniherya wi oothene yaale anachuna ekumi yoohimala anaphwanela wooniherya nroromelo mu woopola owo onahaaleiye opaka vaavaa oneereiye avahe mwiili awe woophaameya ni oyeeha nikhami nawe. Nyenya, ancipale a amuhuserya awe haniiwexexa phaama nihusiho nla. Akina annaloca: “Masu ala t’óvilasa! Tani onawerya owiriyana?”—Yohani 6:60.

Vaava Yesu onasuweleiye wi akina a amuhuserya awe annamwaapa, owo onnaakoha: “Yela ennokwatxulihani? Hanka mwamonne Mwana a Mutxhu awelaka ni akòkelaka weiwo areiyewo? . . . Masu kolenlakani ari munepa ni ekumi. Nto variyari va nyuwano àkhala atxhu ahinemererya.” Mwawiihiiha, oohuserya ancipale annamuhiya nave hanakookela tho omuchara.—Yohani 6:61-64.

Yesu onnaakoha arummwa awe 12 ariki: “Nyuwanotho munakhwela opwahavo?” Petro onnaakhula: “Pwiya nni n’ye wawani? Weyano orino masu a ekumi. Nave hiyano nòhemererya ni nòsuwela wi weyano wà awela a Muluku.” (Yohani 6:67-69) Chiryene ola mukhalelo woororomeleya, naamwi Petro ni arummwa akina ehiiwexenxe mwawaakhwanela yeeyo Yesu ohusinheiye mu mwaha yoola!

Vaavaa onahakalaleiye ni naakhulo na Petro, Yesu onnaloca: “Nkáhothanlani khumi neli, nave mwa nyuwo mmoha ori musaserya?” (Yohani 6:70, Nlakano Nahihano) Yesu onamuloca Yutasi Iskariyoti. Akhweya ophiyerya vaava owo onnasuwela wi Yutasi oopacerya okhalano soochuna soonanara.

Naamwi hiiha, Yesu onnahakalala osuwela wi Petro vamoha ni arummwa akina hahin’ye omuchara owo ni ophara vamoha muteko wa woopola ikumi.