“Vano Mwa Atchu a Muluku”

“Khalai mwahári atchu, nyenya vano mwa atchu a Muluku.”​—1 PET. 2:10.

MUNNAWERYA WAAKHULA?

Taani yaari achu avyaani a Yehova mu nsana noopacerya?

Akiristu eeparipari yaahaala wooniherya hai okhala “atchu a nsina [na Yehova]”?

Taani ari achu a Yehova olelo, nave “Ipuchepuche sikina” inaphwanela weera eheeni wi ephwanye naakiho variyari va “ekoi etokotoko”?

1, 2. Otorokeya taani weeren’ye mu Pentekoste a 33 E.K., nave taani yaakhanle achu a nloko nivyaani na Yehova? (Moone eruku yoopacerya.)

PENTEKOSTE a 33 E.K. yaari yaweereya etokweene mmwaha wa achu a Yehova veelaponi yavathi. Waaheereya otorokeya otokweene. Mu nihiku nenle, moorweela wa munepa waweela, Yehova aapaka nloko nivyaani​—Isarayeli oomunepani, “Israyeli a Muluku.” (Akal. 6:16) Mu ekwaha yoopacerya ovinyerya mmahiku a Aaparahamu, vano achu a Muluku hiyaahaala osuweliwa nthowa na othikiliwa wa alopwana aya. Ohiya yeeyo, vooloca sa muchu ti muchu a nloko nivyaani, Paulo aarepa: “Othikiliwa ori wa murima m’munepani.”​—Arom. 2:29.

² Achu oopacerya a nloko nivyaani na Muluku yaari arummwa ni masaneene a oohuserya a Kiristu yaawo yaathukumanne vamoha mpa o Yerusalemu. (Saw. 1:12-15) Waakheliwa munepa waweela wuuwu, yaaweeriha okhala anamwane a Muluku oothanliwa ni munepa. (Arom. 8:15, 16; 2 Akor. 1:21) Ela yaavaha yawooniherya wi nlakano na hiihaano naapacerya ophariheleya, nenlo naatikitheryiwe ni Kiristu nave naarino esisapo moorweela wa nikhami nawe. (Luka 22:20; mwaalakhanye Ahepri 9:15.) Mwawiihiiha oohuserya yaala yaakhala achu a nloko nivyaani na Yehova, yaakhala achu awe avyaani. Munepa waweela waahaakhaviherya olaleerya mu ilocelo soohiyana saalociwa ni Ayuuta ni aheleni yaawo yaakele o Yerusalemu erwaaka mmakupa oothene a Roma wi echapele Efesta ya Esumana naari Pentekoste, a Ayuuta. Achu yaala yaawiriyana nave yaahiiwexexa mu elocelo aya ichu “sitokotoko sa Muluku” saalaleeryiwa ni Akiristu oothanliwa ni munepa.​—Saw. 2:1-11.

NLOKO NIVYAANI NA MULUKU

3-5. (a) Tiheeni Petro aaleenleiye Ayuuta mu nihiku na Pentekoste? (b) Tiheeni yeeren’ye voocharela yeeyo yaakhavihenrye wunnuwa wa nloko nivyaani na Yehova mu iyaakha soopacerya sa okhala waya?

³ Yehova aampharihela murummwa Paulo wi ahoolele ohula mphiro wi Ayuuta ni aheleni ekhale achu a nloko nenla nivyaani, muloko Weekiristu. Mu nihiku na Pentekoste, Petro moolipa murima aahaaleela Ayuuta wi yaaphwanela omweemererya Yesu, mulopwana yoowo awo ‘yamuthomen’yaya,’ ntakhara “Muluku ámwera Apwiya Kristu.” Vaavaa muloko waakonhaaya tiheeni yaaphwanelaaya weera, Petro aahaakhula: “Tcharuwani, nave batisiwani othene nyu mu nsina na Yesu Kristu vokhurumuweliwa wa sotcheka sanyu; nave munarwa-mwakhela yamahala ya munepa wawéla.” (Saw. 2:22, 23, 36-38) Nihiku nenle, achu 3.000 yaapweseheryana ni nloko nivyaani na Isarayeli oomunepani. (Saw. 2:41) Voocharela, olaleerya wa mvai wa arummwa waatitelela ovaha sawiima sincipale. (Saw. 6:7) Nloko nlo nivyaani naanannuwa.

⁴ Ohoolo waya, muteko wa olaleerya waaphiya o Samariya, ni sookhumelela saphaama. Ancipale yaapatisiwa ni namichaka Filipi, nyenya awo hiyaakhenle munepa waweela mwawaakuveya. Nikhuuru noolamulela na o Yerusalemu naamurumiha murummwa Petro ni Paulo wa Asamariya yaala oororomela, nave “yáhiyathi mata va yawo, nave yáhákhela Munepa Wawéla.” (Saw. 8:5, 6, 14-17) Mwawiihiiha, Asamariya yaala yaakhala tho achu a Isarayeli oomunepani oothanliwa ni munepa waweela.

⁵ Mu 36 E.K., Petro wanawiili aaphariheliwa wi akina evolowe mu nloko nivyaani na Isarayeli oomunepani. Ela yaaheereya vaavaa aalaleeryeiye wa Korneliyo muhooleli a anakhoco a Roma vamoha ni emusi ni asinthamwene awe. (Saw. 10:22, 24, 34, 35) Piipiliya onnaloca: “Petro arikimulumaru, Munepa Wawéla áhamorela wa othene yawo [yaahiri Ayuuta] yíwale masu. Nave yátikhina óroromela’wo a othikiliwa othene yawo Petro árúliyeno, ntakhara va amalapo’tho váhaheliwa yamahala ya Munepa Wawéla.” (Saw. 10:44, 45) Hiiha, ekari ya opaka makupa a nloko nivyaani na Isarayeli oomunepani yaavahiwa tho achu oororomela yaawo yaari amalapo oohithikiliwa.

“ATCHU A NSINA NAWE”

6, 7. Mmukhalelo taani achu a nloko nivyaani yaahaalaaya okhala “atchu a nsina [na Yehova],” nave yaahaala weerano ophiyerya mweero taani?

⁶ Va muthukumano wa nikhuuru noolamulela na nsana noopacerya yoowo weeriweno mu 49 E.K., oohuserya Yaakopo aaloca: “Simeoni [Petro] ohulúla orachi Muluku áháweherya amalapo, wi akushe mwa yawo atchu a nsina nawe.” (Saw. 15:14) Achu yaala avyaani yaakuxa nsina na Yehova yaahaala ophitaanyerya Ayuuta ni amalapo oororomela. (Arom. 11:25, 26a) Ohoolo waya, Petro aarepa: “Khalai mwahári atchu, nyenya vano mwa atchu a Muluku.” Petro aaloca murici aya ariki: “Nyuwo mwa nloko nothanliwa, alipa-ephepa omwene, nihimo nawéla murima, anakinnya, mwawihihá wi mwahilaleya sopwaha iho sa Yowo áwítchanneni wi mukhume mwipiphini, mvolowe omwalela wawe wotikhiniha.” (1 Pet. 2:9, 10) Awo yaaphwanela omvuwiha Yoowo yaamweemelelaaya ni weeliha nsina nawe vanlakani. Awo yaahala okhala anamoona oolipa murima a Yehova, Mulamuleli a Elapo.

⁷ Hiiha ntoko Isarayeli oomwiilini, achu a Isarayeli oomunepani yiichaniwa ti Yehova ntoko “atxhu kavan’haka ekumi wi ekivuwiheke.” (Isa. 43:21, BNM.) Evaanyaka miluku soothene satheru seiye saalapeliwa elukuluku yeele, Akiristu yaale oopacerya yaalaleerya moolipa murima wi Yehova pahiru tari Muluku eeparipari. (1 Ates. 1:9) Awo yaavaha onamoona wa Yehova ni Yesu “m’Yerusalemu, ni m’Yudeya mothe mwene, ni m’Samariya, ni ophiyerya wiwo elapo ekomenlaya’wo.”​—Saw. 1:8; Akol. 1:23.

8. Olopola taani murummwa Paulo aavanheiye achu a Muluku a nsana noopacerya?

⁸ Muchu mmoha oolipa murima a nsana noopacerya ‘mutchu a nsina [na Yehova]’ aari murummwa Paulo. Alocaka variyari va akhamuluku oohuserya, moolipa murima aahaakiha olamulelo wa Yehova, “Muluku yowo ápanke elapo yavathi ni sothe sene siri mummo, Yowo, ti mwanene a wirimu ni elapo yavathi.” (Saw. 17:18, 23-25) Omakuchuwelo wa mukwaha awe waneeraru wa Omisiyonaario, Paulo aahaalopola achu a nsina na Muluku: “Kinnasuwela miyo wi, kivinnye’vo, enarwa-evolowa míchi yóhósha, yóhilevaru muloko’wo; nave mwa nyuwo mekhinyu enarwa-evinya atchu, awuluma sohithoriheya, wamwarya ohuserya wi yatchare.” (Saw. 20:29, 30) Omwaryeya yoola waalociwe waahooneya omakuchuwelo wa nsana noopacerya.​—1 Yoh. 2:18, 19.

9. Vooloca sa “atchu a nsina [na Yehova],” tiheeni yeeren’ye arummwa yaakhwilaaya?

⁹ Arummwa emanle okhwa, omwaryeya yoowo waanaaceereryeya nave waakumiherye ikerexa sawiiseera Seekiristu. Ehiweryaka okhala “atchu a nsina [na Yehova],” Akiristu oomwaryeya yaaphiyerya oviihamo nsina na Muluku mu Soorempwa saya. Awo yaakuxa meerelo a amalapo nave yaanamunyemuliha Muluku ni mahusiheryo aya oohiyana ni soorempwa, “ikhoco saweela,” ni meecelo aya oonanara. Mwawiihiiha, mu iyaakha masaneene, Yehova pahiru aarino alapeli vakhaani ororomeleya veelaponi yavathi nave hiyaari “atchu a nsina nawe” ooreheryeya.

OYARIWA WANAWIILI WA ACHU A MULUKU

10, 11. (a) Tiheeni Yesu aalohenryeiye mu niphwanaphwaniho nawe na tiriku ni nthakathaka? (b) Niphwanaphwaniho na Yesu naakhwanenle hai ohoolo wa 1914, nave ni yookhumelela taani?

¹⁰ Mu niphwanaphwaniho nawe na Tiriku ni nthakathaka, Yesu aaloherya elukuluku ya epiiphi yoomunepani yeeyo yaahaala orweela wa omwaryeya. Owo aaloca wi “atchu erikimkona,” Musaserya aahaala omisa nthakathaka mmacani mwemmo Mwaana a muchu aaminseiyemo tiriku. Soopiili saahaala wunnuwa vamoha ophiyerya “m’makutchuwelo a elukuluku ya vathi vano.” Yesu aathariha wi “mmiso waphama” oneemelela “anamwane a Omwene” nave wi “nthakathaka” ti “anamwane a ónanara.” Variyari va elukuluku ya makuchuwelo, Mwaana a muchu aahaala waarumiha ‘ókakhatcha’ awe, ankeelo, wi emwalanihe tiriku oosiphela ni nthakathaka. Anamwane a Omwene yaahaala othukumanyiwa vamoha. (Mat. 13:24-30, 36-43) Ela yeeren’ye mwawiihai, nave yaavolowenle hai achu a Yehova veelaponi yavathi?

¹¹ ‘Makutchuwelo a elukuluku ya vathi vano’ yaapacenrye mu 1914. Variyari va ekhoco yaapacenrye mu eyaakha yeela Akiristu vakhaani awoocihiwa, “anamwane a Omwene,” yaakhala akapuro oomunepani a Paapulu Mutokotoko. Mu 1919, Yehova aawoopola, yeerihaka wi ekhale oohiyana ni “nthakathaka,” naari Akiristu ootakiherya. Owo aahaathukumanya “anamwane a Omwene” ekhala achu ooreheryeya yaakhwaniheryaka yooloherya ya Yesaya: “Akhweya annayariwa atxhu awàtxa a nloko nimoha nihiku nimoharu, nave ennaphatxuwa elapo elukuluku emoha yeeyo? Vano Siyoni apatxeryaka witxeliwa, àyanre anawe vohilekela.” (Isa. 66:8, BNM.) Siyoni, marehereryo a Yehova oomunepani, ahaayara anamwane awe awoocihiwa ni munepa nave aahaarehererya okhala nloko.

12. Achu awoocihiwa anooniherya hai okhala “atchu a nsina [na Yehova]” olelo?

¹² Ntoko Akiristu oopacerya, “anamwane a Omwene” awoocihiwa anamoona a Yehova. (Mwaalakhanye Yesaya 43:1, 10, 11.) Ntoko Akiristu oopacerya, awo toohiyana moorweela wa meecelo aya Eekiristu ni olaleerya waya “mitchaka eyo ya Omwene . . . ekhale namona wa atchu a maloko othene.” (Mat. 24:14; Afil. 2:15) Mmukhalelo yoola, awo annaakeriha ancipale, macikhwi macikhweene, mu ekhaikhai vamiithoni va Yehova.​—Mwaalakhanye Taniyeli 12:3.

“NNATXHUNA OYA WEIWO NI NYUWANO”

13, 14. Wi emulapele Yehova mwaweemereryeya, tiheeni yaale ahiri achu a Isarayeli oomunepani anaphwanelaaya weera, nave eyo yaaloheryiwe hai Mpiipiliyani?

¹³ Noohuserya mmwaha ovinre wi mu Isarayeli akhalai, anamarwa yaanamulapela Yehova mwaweemereryeya, nave achu yaawo yaaphwanela ovolowa mu achu a Yehova a nlakano. (1 Mam. 8:41-43) Moolikana, yaale olelo ahiri achu a Isarayeli oomunepani annakhala vamoha ni achu a Yehova, “anamwane a Omwene”​—anamoona awoocihiwa a Yehova.

¹⁴ Waaca wa achu anamulapa Yehova vamoha ni achu awe mu elukuluku yeela yookuchula waaloheryiwa ni alipa miririmu apiili akhalai. Yesaya aaloherya: “Maloko mantxipale eni enamuyawo eriki: murwe, niwele mwako w’Apwiya, nivolowe mpa mwa Muluku a Isarayele. Owo onamunthonyerya iphiro sawe nave hiyano nnamutxhara seiho. O Siyoni t’onakhumawo mahusiho nave o Yerusalemu nsu n’Apwiya.” (Isa. 2:2, 3, BNM.) Moolikana, mulipa miririmu Sakariya aaloherya wi “atxhu antxipale ni maloko mantxipale a ikuru anamurwa o Yerusalemu wi eveke nrèliho naka, wi yasye ethoni aka.” Owo aahaaloca ntoko ‘amalapo khumi a ilotxelo sòhiyana-hiyana’ yaawo moosiphela, yaahaala ophara niveru na yoowara ya Isarayele oomunepani, eriki: “Nnatxhuna oya weiwo ni nyuwano, ntakhara nosuwela wi Muluku ori ni nyuwano.”​—Zak. 8:20-23, BNM.

15. Mmuteko taani “Ipuchepuche sikina” ‘sinayaaya ni’ Aisarayeli oomunepani?

¹⁵ “Ipuchepuche sikina” ‘sinnaya ni’ Aisarayele oomunepani mmuteko wa olaleerya michaka yaphaama sa Omwene. (Mar. 13:10) Awo annapaka makupa a achu a Muluku, ekhala “muloko mmoha” ni oothanliwa, ehooleliwaka ni “mukukhula aphama,” Kiristu Yesu.​—Mwaalakhanye Yohane 10:14-16.

MPHWANYE NAAKIHO NI ACHU A YEHOVA

16. Yehova onahaala oruuha hai makupa ookuchula a “ekoi etokotoko”?

¹⁶ Paapulu Mutokotoko amanle otoloxiwa, onahaala okhalavo ohipheliwa wa achu a Yehova, nave mweelukuluku yeeyo nnahaala ochuna naakiho nenlo Yehova onahaaleiye waavaha alapeli awe. Woona wi ohiphela yoola onahaala okhala opacerya wa makupa ookuchula a elukuluku ya “ekoi etokotoko,” ti Yehova yoowo onahaala olakelela elukuluku yoophwanelela ya weeravo echu. (Mat. 24:21, BNM; Esek. 38:2-4) Mu elukuluku yeeyo, Koki onahaala waahiphela “atxhu a elapo yeyo,” achu a Yehova. (Ezek. 38:10-12, BNM.) Ohiphela yoola enahaala okhala eneneeryo wi Yehova apake othoriha wawe wa Koki ni achu awe. Yehova onahaala wooniherya olamulelo awe ni weeliha nsina nawe. Owo onnaloca: “Kinan’woniha maloko othene wi miyano ka Muluku mutokwene ni awèla. Vanonto munamusuwela wi miyano k’Apwiya [Yehova].”​—Ezek. 38:18-23, BNM.

17, 18. (a) Vaavaa Koki oneereiye apacerye waahiphela achu a Yehova, sooleeliherya taani anahaalaaya waakhela? (b) Wakhala wi ninnachuna waakiha wa Yehova, tiheeni nnaphwanelaahu weera?

¹⁷ Vaavaa Koki oneereiye apacerye ohiphela, Yehova onahaala waaleela alapeli awe: “Atxhu nyu a nloko naka, mwiwalela mpa mwanyu. Mwipithe ophiherya elukuluku esara y’Apwiya eneraya ekhurumuwe.” (Isa. 26:20, BNM.) Mu elukuluku yeeyo, Yehova onahaala ovaha sooleeliherya soovuluxa, nave “mpa” enanwerya okhala miloko sahu.

¹⁸ Wakhala wi, ninnachuna ophura waakiha wa Yehova elukuluku ya ekoi etokotoko, nnaphwanela osuwela wi Yehova ookhalano achu veelaponi ya vathi, yaawo ari oorehererya mmilokoni. Nnaphwanela okhala ni yaawo otitelela okhalano onthamwene woolipaxa ni muloko ahu. Ni murima ahu woothene, hankooni nimutakiherye namarepa a salmo mu olaleya: “Ovulusha ti wa Yehova; Oréliha wanyu okhale va atchu anyu.”​—Sal. 3:8.

[Eruku va epaaxina 28]

Petro aalaleerya wa Korneliyo vamoha ni emusi awe (Moone eparakrafo 5)

[Eruku va epaaxina 30]

Mu elukuluku ya “ekoi etokotoko,” onahaala ochuneya otitelela okhalano onthamwene woolipaxa ni muloko ahu (Moone iparakrafo 16-18)