Mulaleye Michaka Saphaama sa Mahala a Muluku
“Wi kihele onamona wa Mutxhaka Waphama wa mahala a Muluku.”—SAWERIWA T’ARUMMWA 20:24.
MACIPO: 101, 84
MWAAHAALA WAAKHULA HAI?
Mahala a Yehova anaphwanela oniceenyerya opaka eheeni?
Ti mwawiihai “Mutxhaka ola wa omwene” onavuwihaaya mahala a Muluku?
Yehova onahaala wooniherya hai mahala awe mu elapo yahiihaano?
1, 2. Murummwa Paulo oonihenrye hai wi aanathamalela mahala a Muluku?
MURUMMWA Paulo moororomela aaloca: “Mahala Muluku okivan’heiye hiyari olapa wasiyo.” (Mwaalakhanye 1 Korinto 15:9, 10.) Paulo aasuwela phaameene wi haaphwanela ikharari itokweene sa Muluku. Owo aahiwiikara Akristu.
2 Omakuchuwelo wa okumi awe, Paulo aamurepela Timoteo: “Kinnàthamala Apwiya ahu Yesu Kristu, yale akivahile ikuru, wona wi àkòna òroromeleya vokitxhanela muteko aya.” (1 Timóteo 1:12-14) Waari muteko taani? Paulo aaloca wa atokweene a muloko wa Efeso: “Nto, wa miyano, ekumi aka tahi etxhu enevo. Kinapwatxha pahi wi kiphiye womaliheryani wa mukwaha ni muteko aka, Apwiya Yesu akivan’haya wi kihele onamona wa Mutxhaka Waphama wa mahala a Muluku.”—Saweriwa T’arummwa 20:24.
3. Muteko taani wavameekhaaya Paulo aavahiweiye? (Moone eruku yoopacerya.)
3 “Mutxhaka” taani Paulo aalaleeryeiye, nave ti mwawiihai woonihenryaaya mahala a Muluku? Paulo aaloca wa Akritu o Efeso: “Mòhiwa ilotxiwaka sa muteko Muluku okhwenleiye okivaha wa nyuwano.” (Éfeso 3:1, 2) Yesu aamuleela Paulo wi alaleerye michaka saphaama wa yaale yahaari Ayuta. Vano waari wooweryeya wi achu a maloko epake makupa a Omwene onalamuleliwa ni Mesiya. (Mwaalakhanye Éfeso 3:5-8.) Paulo aalaleerya ni mvai nave oovaha yootakiherya yaphaama wa Akristu olelo. Owo aahooniherya wi mahala a Muluku “hiyari olapa wasiyo,” naari echu yoohikhweleya wa yoowo.
APWANNE MAHALA A MULUKU ANNOOCEENYERYAANI?
4, 5. Ntakhara heeni nnalocaahu wi “mutxhaka ola wa omwene” onalikana ni muchaka waphaama wa “mahala a Muluku”?
4 Mu ilukuluku seiya sookuchula, achu a Yehova aakhalano muteko wa olaleerya “Mutxhaka ola wa omwene . . . mwelaponi yothene wi ovahe onamona wa maloko othene.” (Mateu 24:14) Nave tho muchaka waphaama wa Omwene “Mutxhaka Waphama wa mahala a Muluku.” Mwawiihai? Mareeliho oothene nnahaalaahu waakhela orweela wa Omwene wa Muluku anahaala okhala yookhumelela ya mahala a Yehova. (Éfeso 1:3) Paulo ohooniherya othamalela wawe mahala a Yehova moorweela wa olaleerya mwamvai. Mano ninnachariha yootakiherya ya Paulo?—Mwaalakhanye Aroma 1:14-16.
5 Mmwaha ovirale, noohuserya wi ntoko achu oocheka ninnaphura mahala a Yehova mmikhalelo soohiyanahiyana. Woona wi ninnatepa ophura, nookhalano murici wa waahusiha akina mukhalelo Yehova onooniheryeiye osivela wawe ni mukhalelo anahaalaaya ophura. Makhalelo taani makina nnaweryaahu waakhaviherya akina othamalela mahala a Muluku?
MULALEYE MICHAKA SAPHAAMA SA MUKUCHO WA WOOPOLA
6, 7. Nnii nlaleye hai michaka saphaama sa mahala a Muluku?
6 Olelo, achu ancipale haniisoona okhalano nthowa vaavaa anapakaaya yoocheka, mwawiihiiha awo haniiwexexa ntakhara heeni woopola oryaaya woochuneya. Awo hanasuwela yootaphulela ya yoocheka, mukhalelo enanivolowelaaya, ni yeeyo nnaphwanelaahu weera wi noopoliwe mookapuroni mwa yoocheka, nave aniiwexexa pahiru wakhala wi aaloca ni Anamoona a Yehova. Moohiyana, achu ancipale aasuwela wi mukhalelo aya wa okumi honaahakalaliha. Vano woona wi anniiwexexa yootaphulela ya yoocheka, achu akina annathamalela ohuserya wi Yehova oomurumiha Mwanawe veelaponi yavathi wi anoopole mwa yoocheka ni okhwa. Yehova onneerano yeela wa nthowa na mahala ni osivela wawe otokweene.
7 Moone yeeyo Paulo olonceiye sa Mwaana a Yehova: “Mwa yowo, wa nthowa na nikhami nawe, nòkhalano wopoliwa nave oleveleliwa sotxheka, ntoko orèla wa mahala [a Yehova].” (Éfeso 1:7) Mukucho wa woopola wa Kristu yawooniherya ya osivela wa Muluku nave onnooniherya waaca wa mahala a Muluku. Enakhala echu yaphaama ohuserya wi wakhala wi nohooniherya nroromelo mmukucho wa Yesu, soocheka sahu sinahaala oleveleliwa nave nnahaala okhalano yawuupuxerya-ya-murima yaphaama! (Ahebri 9:14) Chiryene iha michaka saphaama nnaphwanelaahu waaleela akina!
MWAAKHAVIHERYE ACHU WI EKHALE ASINTHAMWENE A MULUKU
8. Ntakhara heeni achu oocheka anaphwanelaaya waataana ni Muluku?
8 Wakhala wi achu hanooniherya nroromelo mmukucho wa Yesu, Muluku onawoona ntoko amwiicani. Mwawiihiiha, nookhalano murici wa waaleela wi awo ananwerya okhala asinthamwene a Muluku. Murummwa Yohani oorepa: “Ole onamwemererya Mwana òkhalano ekumi yohimala. Nto yowo onakhotxha omwimwelela Mwana harwa ona ekumi, nave esara ya Muluku enamukhala mwa yowo.” (Yohani 3:36) Ninnahakalala voosuwela wi mukucho wa Kristu onnaneeriha okhala asinthamwene a Muluku. Paulo oothariha mmukhalelo ola: “Nyuwotho khalai mwari òtxiwene wa Muluku nave mmurimani mwanyu mwàri amwitxana awe, wa nthowa na sonanara mweranyu. Nto vano òwàtanihani mmwilini mwawe ni okhwa.”—Kolosi 1:21, 22.
9, 10. (a) Murici taani Kristu aavanheiye annawe oothanliwa? (b) “Iputxeputxhe ikina” inaakhaviherya hai oothanliwa?
9 Kristu ohaavaha annawe oothanliwa ari veelaponi yavathi “muteko wa otheihana [naari waataanihana].” Paulo aaloca wa yaawo: “Vano sothene seiha inarwa wa Muluku onivan’he otheihana ni yowo mwa Yesu Kristu ni onivan’he muteko wa otheihana. Muluku t’àtanin’he wiliwili elapo ni yowo mwa Yesu Kristu, ahikusereryaka sotxheka sa atxhu, nave anivahaka muteko wa olaleya otheihana. Hiyo nri arummwa nnalapala mwa nsina na Yesu Kristu, nave ti Muluku onaloca ni eyano ahu. Vano, asinna, kinnovekani wi mwa nsina na Yesu Kristu mutheihane ni Muluku.”—2 Korinto 5:18-20.
10 Ekari etokweene wa “iputxeputxhe ikina” waakhaviherya oothanliwa mmuteko yoola. (Yohani 10:16) Ntoko anamichaka a Kristu, “iputxeputxhe ikina” sinnapaka makupa mmuteko wa olaleerya, waahusiha achu eparipari ni waakhaviherya okhalano onthamwene ni Yehova. Ala makupa oochuneya a olaleya mahala a Muluku.
MWAAHUSIHE ACHU WI MULUKU ONNAWIRIYANA MAVEKELO
11, 12. Ntakhara heeni enakhalaaya michaka yaphaama wa achu, ohuserya wi awo ananwerya ovekela wa Yehova?
11 Achu ancipale annavekela woona wi ennaweeriha okhala phaama. Nyenya awo haneemererya chiryene wi Muluku onnaakhula mavekelo aya. Awo anaphwanela osuwela wi Yehova ‘onniwa mavekelo.’ Tavite oorepa: “Nyuwo muniwa mavekelo ahu atxhu othene anarwa wa nyuwo, eleveleliwe sotxheka saya; sotxheka sahu sòtepa olimela, nto nyuwo munnavelela seiyo.”—Salumu 65:3, 4.
12 Yesu aahaaleela oohuserya awe ariki: “Mwaveka etxhu Atithi mwa nsina naka, yawo anamovahani.” (Yohani 16:23) Ela enataphulela wi nnanwerya oveka “etxhu” vyakala mwawiiwanana ni yookhwela ya Yehova. Yohani tho oorepa: “Nroromelo nryahuno mwa Muluku ti nla: hiyo nanveka etxhu ntoko okhwela wawe, yowo onnaniwa.” (1 Yohani 5:14) Chiryene onakhala waphaama waakhaviherya achu wiiwexexa wi ovekela tahi pahiru echu enaweeriha okhala phaama, nyenya mukhalelo wawi “nachamele munyukhu” wa Yehova! (Ahebri 4:16, Nlakano Nahihano.) Vaavaa nnaahusihaahu achu mukhalelo wa ovekela moophwanelela, wa Muchu oophwanelela, nave ntakhara echu yaphaama, ninnaakhaviherya okhala asinthamwene a Yehova nave annaphwanya nihakararyo moohaawani mwaya.—Salumu 4:2; 145:18.
MAHALA MU ILUKULUKU INARWA
13, 14. (a) Ikari taani sootikhiniha oothanliwa anahaalaaya okhalano omwaahiyu? (b) Muteko taani wootikhiniha oothanliwa anahaalaaya oweerela achu?
13 Yehova onahaala wooniherya mahala awe mu “ilukuluku inarwa.” Mwawiihai? Muluku onahaala waavaha a 144.000 yaawo anahaala olamulela ni Kristu wirimu ekari yootikhiniha. Paulo oothariha ekari ene yeeyo vaavaa aarempeiye: “Nto Muluku òrèla ikharari wa nthowa na okhwela wawe otokotoko onikhwenleiye, hiyano, narahu òkhwa motxhekani mwahu, ònikhaliha akumi mwa Kristu, nvulusiwe ni mahala awe, ònivinyiha mokhwani, nave ònikirathiha wirimu vamoha ni Kristu, wi onihe mwa ilukuluku inarwa orèla wa mahala awe, mwephamani mwawe onivan’heiye mwa Yesu Kristu.”—Éfeso 2:4-7.
14 Ti woovila waanyiherya ichu sootikhiniha Yehova oreherenryeiye ntakhara Akristu oothanliwa vaavaa aneeraaya elamuleleke ni Kristu wirimu. (Luka 22:28-30; Filipi 3:20, 21; 1 Yohani 3:2) Yehova onahaala ‘woniha mwa ilukuluku inarwa orèla wa mahala awe’ wa yaawo mmukhalelo wavameekhaaya. Awo anahaala okhala “Yerusalemu musyani,” mwaara a Kristu. (Wupulula 3:12; 17:14; 21:2, 9, 10) Anahaala olapa ni Yesu wi “epenuse ilapo.” Awo tho enarwa yaakhaviherya achu wi ekhale awoopowa mwa yoocheka ni okhwa ni okhala oophaameya.—Mwaalakhanye Wupulula 22:1, 2, 17.
15, 16. Yehova onahaala wooniherya hai mahala awe wa “iputxeputxhe ikina”?
15 Éfeso 2:7 onaloca wi Muluku onahaala wooniherya mahala awe mu “ilukuluku inarwa.” Mu elukuluku yeeyo, achu oothene veelaponi yavathi anahaala olawiha “orèla wa mahala awe.” (Luka 18:29, 30) Mukhalelo mmoha Yehova onahaaleiye wooniherya mahala awe veelaponi yavathi onii okhale waaviha achu “mmahiyeni.” (Yobi 14:13-15; Yohani 5:28, 29) Taani onahaala oviihiwa? Alopwana ni athiyana oororomeleya yaawo akhwile ahaakumve Kristu okhwa, ni yaale a “iputxeputxhe ikina” anakhwa eri oororomeleya wa Yehova mmahiku yaala ookuchula. Achu oothene yaala oororomeleya anahaala okookiheryiwa okumi wi etitelele omurumeela Yehova.
16 Achu ancipale akhwile ehimusuwenle Yehova anahaala tho oviihiwa. Yohani oorepa: “Kàwonatho alipa òkhwa atokwene ni akhani, yemenle oholo wa ehitxe. Yàhuliwa malivru ni nàhuliwatho nlivru nikina, nle na ekumi. Alipa òkhwa yàthoriwa ntoko metxelo aya ni ntoko sarempwaya mmalivruni mwemmo. Ephareya yàhavelèla alipa òkhwa aya yari mwemmo. Hiha tho okhwa ni elapo ya alipa òkhwa sàhavelèlatho alipa òkhwa aya, nave mutxhu ti mutxhu àthorihwa ntoko mwetxelo awe.” (Wupulula 20:12, 13) Alipa ooviihiwa anahaala okhalano ekari ya ohuserya sa Yehova ni weemererya olamulelo awe. Awo anamuhuserya opharihela malakiheryo a Mpiipiliyani, ni soohusiha sinaphwanyeya mu “malivru.” Mahusiheryo ala mavyaani onahaala okhala mukhalelo mukina wa Yehova wooniherya mahala awe.
MUTITELELE OLALEERYA MICHAKA YAPHAAMA
17. Tiheeni nnaphwanelaahu okuha mmupuweloni vaavaa nnapakaahu muteko wa olaleerya?
17 Olelo opwaha khalai ti wookhweleyaxa olaleerya michaka yaphaama ya Omwene, ntakhara wi makuchuwelo ahaacamela! (Marko 13:10) Nnaphwanela wuupuwela wi vaavaa nnalaleeryaahu yoolakelela ahu okhale omucicimiha Yehova. Nnii neereno hai? Nnaphwanela waaleela achu wi mareeliho oothene nnahaalaahu opuha mu elapo evyaani, anaweryeya pahiru nthowa na mahala ootikhiniha a Yehova.
18, 19. Nnii nivuwihe hai mahala a Yehova?
18 Vaavaa nnaalaleeryaahu achu, nnanwerya othariha wi Omwene wa Muluku wapacerya olamulela, achu anahaala waakhela mphurelo woothene wa woopola ni moovira wa elukuluku ekhale oophaameya. Piipiliya onnaloca “sopatusiwa seihotho inarwa sopoliwa mukapuroni mwa eyutxe, wi sakhale onethi mwa ovuwa wa ana a Muluku.” (Aroma 8:21) Ela enahaala oweryeya pahiru moorweela wa mahala a Yehova.
19 Nookhalano ekari ya waaleela achu yoolaiherya yootikhiniha enaphwanyeya mu Wupulula 21:4, 5 enii: “Muluku onanvuta mithori aya, nave horwa okhalavotho okhwa nari winla, nari ikutxho, nari witxela, wona wi sa khalai sòvira.” Nave Yehova yoowo okiranthe veehiceni, aaloca: “Onani, kinneriha isya itxhu sothene.” Owo tho aaloca: “Orepe, ntakhara masu ala t’òroromeleya ni èparipari.” Vaavaa nnaaleelaahu akina mwa mvai michaka saphaama, chiri ninnavuwiha mahala a Yehova!
[Yooleeliherya va epaaxina 24]
Nookhalano murici wa waaleela achu wi awo ananwerya okhala asinthamwene a Muluku
[Yooleeliherya va epaaxina 25]
Vaavaa nnaahusihaahu achu mukhalelo wa ovekela, ninnaakhaviherya okhala asinthamwene a Yehova
[Ekaaxa va epaaxina 27]
MASU ATHARIHIWE
Ntoko achu oohiphaameya, nnaphwanela otheihana ni Muluku, eyo ti wi, oleveleliwa soocheka sahu wi niwerye weemereryiwa ni Muluku ni okhala asinthamwene awe. Pahiru wa nthowa na mahala a Yehova ni mukucho wa Yesu nnanwerya oleveleliwa soocheka sahu
Muteko wa otheihana yoowo Kristu aavanheiye oothanliwa, muteko wa olaleerya. Muteko ola onnaahusiha achu eparipari nave onnaakhaviherya okhalano onthamwene waphaama ni Yehova