MWAHA 53
Muthanle Mathatelo Anamuhakalaliha Yehova
Yehova “Muluku oohakalala.” (1 Timóteo 1:11, TNM) Owo onachuna wi achu ehakalaleke ni epuhe okumi. Nave owo onnahakalala vaavaa nnaavyaahu elukuluku wi niichuuwe. Mmwaha yoola, nnahaala woona mukhalelo nnahaalaahu opharihela phaama elukuluku ahu ya wiichuuwa, nihicuwanle omuhakalaliha Yehova.
1. Tiheeeni nnaphwanelaahu wuupuwela vaavaa nnathanlaahu mathatelo?
Tiheeni enoosivelaani opaka vaavaa muniichuwaanyu? Akina anasiveliwa okhala owaani emwaalakhanyaka liivuru, ewiriyanaka macipo, yoonaka ixilema naari enavekaariki mu interneti. Akina hansiveliwa omaala, anasiveliwa weeca, weekha naari omvonya mphirya ni asinthamwene aya. Moohiphwacha yeeyo nthanlilaahu, nnaphwanela ororomela wi mathatelo ahu ‘annaahakalaliha Apwiya.’ (Éfeso 5:10) Ti woochuneya wuupuwela yeela woona wi mathatelo yaawo achu ancipale anathanlaaya anaphitaanyerya ichu seiyo Yehova oniiceiye, ntoko nlala, ocapaheya ni wiisaaciherya. (Mwaalakhanye Salumu 11:5.) Tiheeni enahaala onikhaviherya othanla phaama mathatelo ahu wi nimuhakalalihe Yehova?
Wakhala wi ninnaathanla asinthamwene yaawo anamusivela Yehova, awo ananwerya okhalano ovolowela waphaama mwa hiyo ophitaanyerya mathatelo yaawo nnathanlaahu. Ntoko noonnaahu mmwaha 48, “oneeca ni achu a miruku owo tho tamiruku.” Mmukhalelo mukina, wakhala wi ninnamaliha elukuluku ni achu ahinasivela malamulo a Yehova, ‘yoonanara enamuniphacuwela.’—Masiposipo 13:20.
2. Ntakhara heeni eryaaya yookhweleya ovareryela elukuluku nnamalihaahu ni mathatelo ahu?
Naamwii mathatelo ahu eri aphaama, nnaphwanela okhalano ekaasoope wi nihimaliheke elukuluku yincipale ni yaawo. Mathatelo ananwerya oneeriha wi nihipakeke miteko seiyo siri soochuneyasa. Piipiliya onnaanceenyerya opharihela “phaama elukuluku [ahu].”—Mwaalakhanye Éfeso 5:15, 16.
OHUSERYA MWAWIISEELA
Musuwele mukhalelo wa opaka soolakelela saphaama vooloca sa mathatelo anyu.
3. Musepe mathatelo oonanara
Ntakhara heeni ninnaphwanela othanla phaaama mathatelo ahu? Moone EXILEMA, nave voocharela muthokororye makoho anacharela.
Mapokha taani yaawaniwa khalai o Roma yaawo analikana ni makina olelo?
Mu exilema, tiheeni Taniyeli ohusenryeiye vooloca sa mathatelo?
Mwaalakhanye Aroma 12:9, nave voocharela muthokororye nikoho nla:
Yoorepa ela enaphwanela ovolowela hai mukhalelo munathanlaanyu mathatelo anyu?
Ichu taani ikina Yehova oniiceiye? Mwaalakhanye Masiposipo 6:16, 17 ni Galasya 5:19-21. Mmanle waalakhanya yoorepa ti yoorepa, muthokororye nikoho nla:
Ichu taani ilociwe mu iversikulu seiya iri sawunlaana mmathatelo a mutano?
Makoho anahaala wookhaviheryaani othanla phaama mathatelo anyu
Mwiikohe:
Tiheeni kinapakaka? Apwanne mathatelo yaala annaphitaanyerya echu yeeyo Yehova oniiceiye?
Ti liini kinapakaaka? Apwanne annakaakha elukuluku kaahaalaaka omaliha mmiteko sookhweleyasa?
Kinapaka naani? Apwanne annakeeriha olocihana moohihiyererya ni achu yaawo ahinamusivela Yehova?
Yoophwanelela ori okhala ocai wa yawoopiha ophiyerya nnaweryelaahuvo. Tinthowa nene nnaphwanelaahu okhala ocai wa mathatelo vyakala nnakhwaahu minikwa wi tahi aphaama wa hiyo
4. Mpharihele phaama elukuluku anyu
Moone EXILEMA, nave voocharela muthokororye nikoho nnacharela:
Munna mu exilema hoona nikacamiho naarivo. Vano tinivi naari nikacamiho wa yene?
Mwaalakhanye Filipi 1:10, nave voocharela muthokororye nikoho nla:
Yoorepa ela enii enikhaviherye hai olakelela elukuluku nneeraahu nimalihe mmathatelo?
5. Muthanle mathatelo aphaama
Eparipari wi aakhalavo mathatelo makina ahinamusivela Yehova, nyenya sookhalavo ichu sincipale saphaama nnaphwanelaahu weera wi nihakalale. Mwaalakhanye Eklesiyaste 8:15 ni Filipi 4:8, nave voocharela muthokororye nikoho nla:
Mathatelo taani aphaama anoosivelaani?
Nyuwaano munanwerya opuha mathatelo ni ochekula waphaama
ACHU AKINA ANI: “Tahi yoonanara woona ixilema naari owaalakhanya aliivuru yaawo analoca sa nlala, ocapaheya naari onamulosiwe. Echu yoochuneya ori oheerano ichu sene seiho.”
Nyuwaano munoona hai?
MUKWASU
Yehova onachuna wi nthanlele phaama mathatelo ahu ni ohakalalaka ni yeeyo eri yaphaama wa hiyaano.
Makoho awuuluulela
Mathatelo taani Akristu anaphwanelaaya osepa?
Ntakhara heeni ninnaphwanela okhalano ephoole ni elukuluku nnamalihaahu nthataka?
Ntakhara heeni munnachuna othanla mathatelo yaawo anamuhakalaliha Yehova?
OTHOLATHOLA
Mmusuwele taani orino murici wa othanla mathatelo anyu.
“As Testemunhas de Jeová proibem certos filmes, músicas ou livros?” (Artigo do jw.org)
Muthokororye mukhalelo muneeraanyu muthanle phaama yeeyo munaphwanelaanyu weera wi muhakalale.
“A sua recreação é benéfica?” (A Sentinela, 15 de outubro de 2011)
Wi moone ntakhara heeni mulopwana mmoha aatoronkeiye mukhalelo wa othanla mathatelo awe, mwaalakhanye yaweereya “Até mesmo venci o preconceito.”
“A Biblia muda a vida das pessoas” (A Sentinela, 1.º de fevereiro de 2010)
Moone ti mwawihai mai mmoha aapankeiye yoolakelela yaphaama vooloca sa iprokrama sa tv iniiwanana ni onamulosiwe.