Makoho a Alipa Waalakhanya

Apwanne “yawiima ya munepa” pahiru enavolowela mikhalelo seiho inaphwanyeya mu Galasya 5:22, 23?

Iversikulu iha sinnaloca mikhalelo mithanu naxexe Seekristu: “Yawiima ya munepa, ti ela: Osivela, ohakalala, murecele, ovilela, oreera murima, saphaama, ororomeleya, opisa murima, ni wiisuumaaliha.” Nyenya eyo henataphulela wi sawiima sa munepa ti seiharu pahi inahaala onikhaviherya.

Moone yeeyo murummwa Paulo orempeiye mu iversikulu sa muculi ariki: “Miteko sa mwiili . . . ti iha: Oraruwa, sootakhala, weeca pure, waalapa amuluku atheru, mirece, wiicana, oowana, ehace, esara, okakamela, ohiiwanana, omwalana, nrima, ohapaliwa, olyavo, ni mikina sa seiya.” (Gal. 5:19-21) Masu awi “mikina sa seiya,” enooniherya wi Paulo aahaala oloca ichu ikina mu elista ya miteko sa mwiili seiho iromoliwe mu Kolosi 3:5. Moolikana, vaavaa Paulo aarepeiye mikhalelo saphaama thanu naxexe, owo aaloca: “Nlamulo hinaavovo nnakhoociha seiya.” Mu elocelo yoopacerya, etaphuleliwaka masu awi “mikina sa seiya” enanwerya tho otaphuleliwa ntoko “ichu ntoko seiya.” Eyo ennooniherya wi Paulo haalonce mikhalelo soothene sa “yawiima ya munepa.”

Nnanwerya wiiwexexa wakhala wi elista ela noolikanyiha ni ekaarata ya Murummwa Paulo orepenleiye wa Aefeso: “Yawiima ya omwaleela yaphaama, yawookololowa ni yeeparipari.” (Éfe. 5: 8, 9) Elatho ennapaka makupa mu “yawiima ya munepa.”

Moolikana Paulo aamuceenyerya Timoteo wi iivoliherye mu “Ochara wookololowa murima, omucicimiha Muluku, ororomeleya, osivela, nthiti, ni ovilelano sawuukhula.” Iha mikhalelo mithanu nammoha saphaama. (1 Tim. 6:11) Pahiru raru sa seiho (nroromelo, osivela, ni ovilela) sinalociwa ntoko “Yawiima ya munepa.” Nyenya ti yawooneya wi Timoteo aahaala ochuna nikhaviheryo na munepa waweela wi innuwihe mikhalelo seiha miraru: wookololowa murima, omucicimiha Muluku, ni ovilelano sawuukhula.—Mulikanyihe ni Kolosi 3:12; 2 Pedro 1:5-7.

Mwawiihiiha nnaphiyerya makuchuwelo wi makhalelo analociwa mu Galasya 5:22, 23 tahi yaaworu pahi Mukristu onaphwaneleiye okhalano. Munepa wa Muluku onanwerya onikhaviherya winnuwiha mikhalelo thanu naxexe sa ‘sawiima sa munepa.’ Nyenya sookhalavo mikhalelo mikina nnaphwanelaahu okhalano wi nikhale Akristu a wiichwelavo “onwara muchu ahiihaano, opatushiwa oophwanaphwana ni Muluku, mwa wookololowa, ni weela murima woorweela mweeparipari.”—Éfe. 4:24.