Otikitherya Murecele ni Weela Mmulokoni

EYAAKHA eri yoothene masana masaneene aachu annavolowa mmalapelo aweela a Yehova, mu waakhwanela wa yooloherya ya Piipiliya. (Mik. 4:1, 2) Ninnatepa ohakalala owaakhela yaawo anapaka makupa a “muloko wa Muluku!” (Saw. 20:28) Awo annathamalela ekari ya owerya omurumeela Yehova ni hiyaano vamoha ni opuha murecele ni weela wa parataiso ahu oomunepani. Munepa waweela wa Muluku vamoha ni ikano sa miruku sinaphwanyeya Mmasu awe, sinnanikhaviherya okhapelela murecele ni weeliha muloko.—Sal. 119:105; Zak. 4:6.

² Moorweela wa opharihela malakiheryo a Mpiipiliyani, hiyaano ninnanwara “muchu ahihano.” (Kol. 3:10) Ninnahiya oculi ohiiwanana ni soohesa sa akina. Woona wi nookhalano moonelo woolikana ni wa Yehova, ninnavootha munepa wa elapo waahaala onikawanya nave ninnalapa mwawiiwanana ni onnaahu wa elapo yoothene.—Saw. 10:34, 35.

³ Naamwi hiiha, ilukuluku ikina sinnakhumelela miyaha seiho sinapahula wiiwanana wahu mmulokoni. Ntakhara heeni eyo enneereya? Mu ikwaha sincipale, eyo eneereya nthowa na ohipharihela ikano sa Mpiipiliyani. Nave tho ninnawaniha ni mathitimanelo ahu oohiphaameya, woona wi oothene hiyo naachu oocheka. (1 Yoh. 1:10) Akhweya muchu onanwerya ohuwela ophiyerya ovoliiha mmulokoni meecelo oonanara naari anariipiha omunepani. Nnawerya tho omphuca muchu mukina mmasu naari mu saweera, naari okwaculeya nthowa na saweera naari masu a muchu mukina. (Aro. 3:23) Mmikhalelo ntoko seiha, tiheeni nnaphwanelaahu weera wi nookolole ichu?

⁴ Nthowa na osivela wawe, Yehova onnathokororya ichu soothene seiha. Masu awe annanleela echu yaweera vaavaa makacamiho anakhumelelaaya. Atokweene yaawo ari akukhula oosivela oomunepani, ari ooreheryeya wi ekhaviherye. Moorweela wa opharihela ikano saya sinarweela Mpiipiliyani, nnanwerya otikitherya onthamwene waphaama ni Yehova vamoha ni akina. Wakhala wi noolakiwa naari wookololiwa nthowa na echu yoonanara nipankaahu, nnaphwanela osuwela wi olaka iwo onooniherya osivela wa Tiithi ahu awirimu.—Masi. 3:11, 12; Ahe. 12:6.

MUKHALELO WA OMALIHA SOOHESA IKHAANI

⁵ Ilukuluku ikina onnakhumelela ohiiwanana naari soohesa ikhaani variyari va yaale ari mmulokoni. Iho inaphwanela omalihiwa mwawaakuveya, mmukhalelo woosivela. (Éfe. 4:26; Fil. 2:2-4; Kol. 3:12-14) Akhweya, nyuwaano munahaala woona wi ohiiwanana yoowo onavolowela onthamwene anyu ni Akristu akhwiinyu onanwerya omalihiwa moorweela wa ochariha ekano ya murummwa Petro ya “okhwelana mukina ni mukhweiye, ntakhara osivela onnuuheela waaca wa soocheka.” (1 Ped. 4:8) Piipiliya oni: “Ninnakwaculiwa oothene mu sincipale.” (Tiy. 3:2) Moorweela wa opharihela nlamulo na Mphimo Woolikana, niweerelaka akina soothene nnachunaahu wi neereliweke, nnanwerya okhurumuwela soohesa ikhaani.—Mat. 6:14, 15; 7:12.

⁶ Wakhala wi mohoona wi moomuchekela muchu mukina nthowa na yeeyo muloncaanyu naari mpankaanyu, mweerevo echu mwawaakuveya wi murehererye mwaha. Muupuwele wi onthamwene anyu ni Yehova woovoloweliwa tho. Yesu aahaaleela oohuserya awe: “Woomwi, weerakano yooveleelaa vanipuroni na mukucho, wuupuwela wi woomuchekela munnaa, hiya vanipuroni vaavale yooveleelaa, wapacerye waataana ni munnaa. Hiihanto orwe weereno yooveleelaa.” (Mat. 5:23, 24) Akhweya onamukhumelela ohiiwanana. Wakhala wi ti hiihaa, mukhale ootaphuwa wi muchekulele. Ovaanela waphaama wa oothene a mmulokoni onnakhaviherya vancipale osepa ohiiwanana ni wookolola makacamiho yaawo anakhumelela wa nthowa na ohiphaameya wa achu.

VAAVAA ONAKHALAAYA WOOCHUNEYA OVAHA MIRUKU SA MPIIPILIYANI

⁷ Vakina vaya, atokweene anahaala woona wi ti woochuneya omvaha ekano muchu wi ookolole muupuwelo awe. Ikwaha sincipale ela tahi yookhweya. Paulo aahaarepela anna o Galasya ariki: “Asinnaka, akhalavo muchu ophariweno yoocheka, yeenyu ene muri a Munepa mmukhaviherye yoowo mwa Munepa ni opisha murima.”—Gal. 6:1.

⁸ Moorweela wa okukhula muhuwo, atokweene ananwerya okhapelela muloko wa sawoopiha sincipale soomunepani ni okwatelela okhalavo miyaha mitokweene. Atokweene anniilipixerya wi muteko aya mmulokoni okhale mwawiiwanana ni yeeyo Yehova aalaihenryeiye wa Isaiya: “Muchu tanii akhale voochawelavo echeku yoopaka, nari nipuro nawiipithavo epula yoowali. Anii akhale ntoko muhice mu elapo yawuuma nari ntoko muurushi wa mwaako achu evelavenle.”—Isa. 32:2.

MWAATHOONYE YAAWO ARI OOHIIWELELA

⁹ Murummwa Paulo oovaha olopola vooloca sa anna yaawo yaahaala ovolowelaka muloko moonanara. Owo aariye: “Ninoolamulelaani wi mwaarapele anna oothene yaawo ahinchuna ophara muteko, ehinachariha ikano seiyo nyuwo mwaakhenlaanyu wa hiyo.” Owo aathariha phaama yeela ariki: “Muchu aahiiwelela masu ahu mu ekaaratha ela, mmuthoonye nave muhaataaneno yoowo, muru omuule. Nto muhimweere mwiicani; mmulopoleke ntoko munna.”—2 Tes. 3:6, 14, 15.

¹⁰ Onamukhalavo muchu mmulokoni, onooniherya ohiiwelela malamulo ni malakiheryo a Muluku, naamwi ahipanke yoocheka etokweene yeeyo yaahaala omweeriha wiikariwa mmulokoni. Eyo enanwerya ophitaanyerya okhala muchu ooporora vancipale, a waakaaha, naari oonyala. Onanwerya tho okhala ‘oowaakanyerya akina’ mu ichu ohinaphwaneleiye. (2 Tes. 3:11) Naari tho onanwerya okhala muchu yoowo onaavya ekari wi aakhuurele akina, naari yoowo onathanla mathatelo oohiphwanelela. Ohiiwelela, mwaha mutokweene nave onanwerya onyemuliha muloko ni waavolowela Akristu akina.

¹¹ Woopaceryani, atokweene anahaala weererya omukhaviherya muchu owo oohiiwelela moorweela wa miruku sa Mpiipiliyani. Nyenya, wakhala wi nlelo onnatitelela ohiiwelela malakiheryo a Mpiipiliyani naamwi akhaviheryiwe ikwaha sincipale, atokweene ananwerya olakelela wi opakiwe mwaha wa olopola mmulokoni. Atokweene anahaala okhala a miruku vaavaa analakelelaaya waakhanle wi echu eyo muchu owo opankeiye etokweene naari hooye wi epake mwaha wi yaalopole akina. Mulipa ooperekha mwaha onahaala ovahererya miruku soophwanelela vooloca sa meecelo awo oohiiwelela; nyenya haromola nsina na muchu owo. Mwawiihiiha, yaale asuwenle mwaha owo, anahaala owerya osepa opakano onthamwene, naamwi ehaalaka otitelela ochekulakano, emukhalihaka “ntoko munna.”

¹² Enaweheryiwa wi mukhalelo waweemeleleya wa Akristu oororomeleya omukhaviherye muchu owo oohiiwelela, wuuliwa muru ni meecelo awe ni omweeriha opaka matorokelo. Vaavaa onakhalaaya wawooneya wi muchu owo ootoroka meecelo awe oonanara, hokhala woochuneya omukhalihaka ntoko muchu oolakiwa.

ECHU YAWEERA VARIYARI VA SOOCHEKA ITOKWEENE

¹³ Hiyaano ninnalevelela soohesa, nave vaavaa nnakhurumuwelaahu henataphulela wi hinnapwacha meecelo oonanara naari nnamweemererya. Tahi wi nnaphwanela wootheryaka ohiphaameya mu soocheka soothene, nave tho tahi yaphaama ohipwacha soocheka itokweene. (Onam. 19:17; Sal. 141:5) Nlakano na Nlamulo, naanaloca soocheka ikina wi saari itokweene opwaha ikina, emohamoha tho enneereya mmuloko Weekristu.—1 Yoh. 5:16, 17.

¹⁴ Yesu aaloca echu yaweera wi nimalihe mwaha mutokweene ni Akristu akhwiihu. Moone meerelo yaawo owo aalonceiye: “Munna oochekela, [1] hawe, waloceno omuleelihaka muriwo eeliru. Iiwelela, woomukookihawo. Aahiwiiwelela, [2] omuwope muchu mukina, nari eeli, wi mwaha owo walociwe vamiithoni wa anamoona eeli nari araru. Nto aahiwiiwelela anamoona yaawo, [3] hawe waleele muloko; nave aahiiwelela ni muloko ene, omweere ntoko mmalapo nari mulipa a mushokho.”—Mat. 18:15-17.

¹⁵ Mwawiiwanana nniphwanaphwaniho nenlo Yesu aalonceiye voocharela, mu Mateu 18:23-35, enakhala ntoko emoha ya soocheka aareiyeno mmuupuweloni va Mateu 18:15-17 waari mwaha wa ikhorowa naari mwaha wa ohiliva evaale naari omwiiyerya muchu. Naari tho onanwerya okhala wootha, weiwo onamvevula muchu mukina.

¹⁶ Wakhala wi mookhalano sawooniherya wi munna naari murokora ooweerelaani yoocheka ntoko seiha, muhaakuvele olokoha wa atokweene, mvekaka wi yookhaviheryeeni. Ntoko Yesu olonceiye, woopaceryani muloce ni muchu yoowo oochekenleni. Mweererye omaliha mwaha apiili anyu pahiru ahirivo muchu mukina. Muupuwele wi Yesu haalonce wi ‘hawe pahiru ekwaha emoha omuleele soocheka sawe.’ Mwawiihiiha, wakhala wi muchu owo heemerenrye yoocheka awe naari oveka nikhurumuwelo, akhweya yaahaala okhala yaphaama ovaanelano elukuluku ekina. Wakhala wi mwaha woomalihiwa mmukhalelo yoola, yoole aachenke moohikhwa minikwa onahaala woothamalelaani nthowa na ohaaleela achu akina yeeyo eenreiye naari omvuwiha mmulokoni. Nyuwaano munahaala ‘omukookiha’ munninyu.

¹⁷ Wakhala wi yoole oochekenleni oheemererya yoocheka awe, aveka nikhurumuwelo nave eeravo echu wi arehererye yoocheka awe, tahi woochuneya oyano vahoolo mwaha owo. Naamwi yoocheka eyo yaari etokweene, mwaha ntoko yoowo onanwerya omalihiwa pahiru ni achu yaawo yaachekelanne.

¹⁸ Wakhala wi hamuwenrye omukookiha munninyu moorweela wa omuleela yoohesa awe, “muriwo eeliru,” voocharela mweere yeeyo Yesu aalonceiye, “omuwope muchu mukina, nari eeli,” wi mvaanele wanaawiili ni munninyu. Yoolakelela ya yaale mwaathanlilaanyu enaphwanela okhala omukhaviherya munna naari murokora yoole. Ti yaphaama waathanla yaale yeerenle onamoona wa yaweereya eyo, nyenya wakhala wi haavo muchu eerenle onamoona, yaahaala okhala yaphaama omuthanla muchu mmoha naari apiili wa yaale yiiwale vooloca sa mwaha yoowo. Akhweya awo aasuwela phaama mwaha owo nave wi anahaala oloca waakhanle wi echu eyo yoheereya chiryene. Wakhala wi mutokweene a mmulokoni oowompwa wi awiriyane mwaha owo, tahi wi oneemelela muloko, woona wi harummwale nnikhuuru na atokweene wi eereno yeeyo.

¹⁹ Wakhala wi mwaha owo nlelo homanle naamwi mwiilipixenrye vancipale—ntoko ovaanela ni yoowo muriwo apiili anyu vamoha ni muchu mmoha naari apiili—nave nlelo muhinawerya ocuwala mwaha owo, mwawiihiiha, munaphwanela waaleela asitokweene. Muupuwele wi yoochuna aya ori otikitherya murecele ni weeliha muloko. Mmanle olokoha mwaha owo wa atokweene, muhiye mmatani mwaya nave mmuroromele Yehova. Muhirwe mweemererye wi meecelo oonanara a muchu mukina yookwaculiheeni naari omaliha ohakalala wanyu mu omurumeela Yehova.—Sal. 119:165.

²⁰ Akukhuli yaala a muhuwo anahaala otholathola mwaha. Wakhala wi ti yawooneya wi muchu owo chiryene oopaka yoocheka etokweene ntakhara nyuwaano, nave hanacharuwa naari hanachuna weeravo echu wi arehererye yoocheka awe, akhweya onamukhala woochuneya othanliwa nikhuuru na othoriha ni omwiikara muchu owo mmulokoni. Hiiha, awo annakhapelela muhuwo nave anneeliha muloko.—Mat. 18:17.

MUKHALELO WA OTHOKORORYA SOOCHEKA ITOKWEENE

²¹ Soocheka ikina itokweene, ntoko ocapaheya, oraruwa, okonihana achu a mwiikho woolikana, opwaalu, omwareya, olapela soophwaniherya ni soocheka ikina itokweene ntoko seiha sinaphwanela othokororyiwa phaama naamwi ole ochekeliwe alevelenle. (1 Kor. 6:9, 10; Gal. 5:19-21) Woona wi muchu owo oochekela malakiheryo oomunepani nave tho oonanariha weela wa muloko, soocheka iho itokotoko sinaphwanela olokohiwa wa atokweene a mmulokoni. (1 Kor. 5:6; Tiy. 5:14, 15) Muchu akhweya onanwerya owaavya atokweene a mmulokoni wi alokohe yoocheka awe naari wi alokohe yeeyo osuwenleiye vooloca sa yoocheka ya muchu mukina. (Onam. 5:1; Tiy. 5:16) Moohipwacha mukhalelo atokweene a mmulokoni anahaalaaya wiiwa vooloca sa yoocheka etokweene ya Namoona oopatisiwa mmulokoni, otholathola woopacerya onahaala weeriwa ni atokweene eeli. Wakhala wi sookhalavo sawooniherya wi yoolokoha eyo yookhalano mathipelo nave wi yoocheka eyo yoheereya chiryene, nikhuuru na atokweene nnahaala waathanla atokweene araru wi ethokororye mwaha yoowo.

²² Atokweene annathokororya phaama muhuwo, nave annaavya okhapelela wa ovolowela ori woothene onapahula makupa oomunepani. Awo tho anniilipixerya opharihela phaama Masu a Muluku wi yaasamele yaale ahense ni orehererya wanaawiili mukhalelo aya woomunepani. (Yuda 21-23) Ela enniiwanana ni ohoolela Paulo aamvanheiye Timoteo, owo aarepa: “Vamiithoni wa Muluku ni wa Kristu Yeesu, yoowo onii aathorihe achu akumi ni ookhwa, . . . Ovaanye, olopole, olipihe, waahusihaka ni nthiti noothene.” (2 Tim. 4:1, 2) Weerano yeela, akhweya onammaliha elukuluku yincipale, nyenya ela ennapaka makupa a muteko wakuru wa atokweene. Muloko onnathamalela wiilipixerya waya nave onnasuwela wi awo “annaphwanela ocicimihiwa wiili.”—1 Tim. 5:17.

²³ Mmikhalelo soothene, wakhala wi oosuweliwa muchu orino nthowa, yoolakelela yoopacerya ya atokweene ori omukhaviherya mulipa oocheka wi arehererye wanaawiili makupa awe oomunepani. Wakhala wi muchu owo oocharuwa ni murima woothene nave atokweene ewerya omukhaviherya, awo annalakelela waakhanle wi anahaala ovahererya osamela weephiini naari mmulokoni, iwo onahaala okhala olaka wa yoowo nave ntoko yoolopola wa akina. (2 Sam. 12:13; 1 Tim. 5:20) Mmikhalelo soothene sa osameliwa, mulipa oosameliwa onahaala ohiihiwa ophara miteko mikina mmulokoni. Hiiha, mulipa oocheka owo onahaala okhaviheryiwa ‘wookolola iphiro’ sa meecelo awe. (Ahe. 12:13) Moovira wa elukuluku, wakhala wi ti yawooneya wi oorehererya makupa awe oomunepani, onahaala weemereryiwa ophara miteko seiho aahiihiweiye.

YOOLOKOHA VOOLOCA SA OSAMELIWA

²⁴ Wakhala wi nikhuuru na othoriha nohoona wi mulipa oocheka oocharuwa, nyenya wi mwaha owo waasuweliwa mmulokoni naari va muceche, naari wakhala wi ti woochuneya olopola muloko vooloca sa muchu owo, enahaala opakiwa yoolokoha va muthukumano Okumi ni Muteko ahu Weekristu. Yoolokoha eyo enaphwanela okhala ha: “[Nsina na muchu owo] oosameliwa.”

WAKHALA WI YOOLAKELELA ORI WIIKARIWA MMULOKONI

²⁵ Vakina vaya, mulipa oocheka akhweya aakhovelela opaka yoocheka eyo nave ahineemererya nikhaviheryo onavahiweiye. Nave variyari va othorihiwa wawe hoonihenrye “miteko seiyo inooniha orukunuwa.” (Saw. 26:20) Tiheeni enaphwanela weeriwa? Mmikhalelo ntoko seiha, ti woochuneya omwiikara mmulokoni mulipa oocheka owo, wi ahivolowele moonanara nloko naweela na Yehova. Ovolowela woonanara wa mulipa oocheka onnaviihiwamo mmulokoni, eyo ennakhapelela meecelo ni weela woomunepani navetho ennaakiha nsina naphaama na muloko. (Malam. 21:20, 21; 22:23, 24) Vaavaa aasuwenleiye meecelo awuuliha muru a mmoha a muloko wo Korinto, murummwa Paulo aahaaceenyerya atokweene ariki: “Aveleeliwe wa Saataana muchu yoowo . . . , wi munepa . . .  [wa muloko] ovulushiwe.” (1 Kor. 5:5, 11-13) Paulo tho aaloca sa wiikariwa mmulokoni wa achu akina mu nsana noopacerya yaawo yaakhonce eparipari.—1 Tim. 1:20.

²⁶ Wakhala wi nikhuuru na othoriha nohoona wi mulipa oocheka owo oohicharuwa onaphwanela wiikariwa mmulokoni, nikhuuru na othoriha nnaphwanela omuleela muchu owo vooloca sa yoolakelela yeela, emoonihaka mookwakwaleya nthowa (naari mathoweene) orweela Mpiipiliyani. Vaavaa anamuleelaaya yoolakelela yeela, nikhuuru na othoriha nnahaala omuleela wi waakhanle wi onnoona wi mwaha awe holociwe phaama, nave anachuna wi waalikheliwe wanaawiili, owo onaphwanela orepa ekaarata alocaka mathoweene anamweeriha oveka waalikheliwa wanaawiili. Nikhuuru na othoriha, nnahaala omvaha mahiku mathanu napiili ovinyerya nihiku epakiwaaya yoolakelela eyo. Nave wakhala wi awo ahaakhela ekaarata ya mulipa oocheka avekaka wi mwaha awe waalikheliwe wanaawiili, nikhuuru na atokweene nnahaala oveleela wa ooweherya a ekulucu, yoowo onahaala waathanla atokweene oophwanelela wi epake makupa a Nikhuuru nawaalikhela wi evarerye wanaawiili mwaha yoowo. Nikhuuru nlo nnahaala opaka owetha waya wi naalikhele mwaha yoola mpuwa mwa esumana emoha ovinyerya elukuluku yaakhenlaaya ekaarata. Wakhala wi yohaakheliwa ekaarata ya mulipa oocheka avekaka wi mwaha awe waalikheliwe wanaawiili, yoolokoha vooloca sa wiikariwa mmulokoni ennahiyereryiwa. Variyari va elukuluku yeeyo, mulipa oocheka owo onanwerya oyaaka mmuteko woolaleerya, nyenya onahaala ohiihiwa ovaha maakhulo, ovekela naari miteko mikina mmulokoni.

²⁷ Yooveka yeela ya waalikheliwa wanaawiili mwaha, yamahala nave ennamvaha ekari mulipa oocheka owiriyaniwa wanaawiili. Nyenya wakhala wi heemerenrye nwopelo wa nikhuuru na waalikhela, emanle opaka wiilipixerya waya woothene, enahaala opakiwa yoolokoha mmulokoni vooloca sa wiikariwa.

²⁸ Wakhala wi mulipa oocheka harempe ekaarata ya oveka waalikheliwa wanaawiili mwaha awe, nikhuuru na othoriha nnahaala omuceenyerya ochuneya waya ocharuwa vamoha ni ichu onaphwaneleiye weera wi akookele mmulokoni moovira wa elukuluku. Ela ti yamphurelo ni ya mahala, nave enaphwanela weeriwano ni ewehereryo wi muchu owo onahaala opaka matorokelo nave mu elukuluku aya awerye okookela mmarehereryo a Yehova.—2 Kor. 2:6, 7.

YOOLOKOHA VOOLOCA SA WIIKARIWA MMULOKONI

²⁹ Wakhala wi ti woochuneya omwiikara mmulokoni mulipa oohicharuwa, yoolokoha yawaakuveya enahaala opakiwa mmukhalelo ola: “[Nsina na muchu owo] tahi Namoona a Yehova.” Eyo enahaala waakhaviherya akina a mmulokoni ohaataanano muchu yoowo.—1 Kor. 5:11.

WIIKARIWA MMULOKONI

³⁰ Masu awi “wiikariwa” anaphariheliwa wa meerelo analakeleliwa wa muchu yoowo ori Namoona oopatisiwa, nyenya mwaayiini akhooca malakiheryo awe Eekristu moorweela wa ohichuna osuweliwa ntoko Namoona a Yehova. Naari moorweela wa okhooca nipuro nawe mmuloko weekristu ni miteko sawe, ntoko opaka makupa a marehereryo a mulaponi yaawo ahiniiwanana ni mahusiheryo a Piipiliya naari anahaala othorihiwa ni Yehova Muluku.—Isa. 2:4; Wup. 19:17-21.

³¹ Alocaka sa yaawo yaakhonce nroromelo naya Neekristu mmahiku awe, murummwa Yohani aarepa: “Yaawo akhumme mwa hiyo, nto hiyaari awihu. Yaari awihu, yaamutitelela okhala ni hiyo.”—1 Yoh. 2:19.

³² Vaavaa muchu oniisikareiye mmulokoni, mukhalelo awe ni Yehova onnahiyana vancipale ni Mukristu ori ooceecheya omunepani, ti wi yoowo ohin’ye muteko woolaleerya. Muchu onanwerya okhala ooceecheya omunepani nthowa na ohiya ohuserya Masu a Muluku. Naari akhweya nthowa na makacamiho onakumaneiyeno, wiikariwa naari oyeleela mvai mmuteko wa Yehova. Asitokweene vamoha ni akina a mmulokoni anahaala otitelela omvahaka nikhaviheryo noophwanelela na omunepani wa yoowo ori Mukristu ooceecheya.—Aro. 15:1; 1 Tes. 5:14; Ahe. 12:12.

³³ Nyenya, wakhala wi Mukristu othanlile mukhateiye ovinyamo mmulokoni, enaphwanela opakiwa yoolokoha yawaakuveya, mmukhalelo ola: “[Nsina na muchu owo] oohiya okhala Namoona a Yehova.” Muchu yoowo onaphwanela okhalihiwaka mmukhalelo mmohamoha ni muchu yoowo iikariwe mmulokoni.

OKOOKELA MMULOKONI

³⁴ Muchu yoowo iikariwe naari yoowo iisiikanre mukhateiye mmulokoni onanwerya okookelamo wakhala wi sookhalavo sawooniherya sa ocharuwa wawe nave wi yooviravo elukuluku yoophwanelela ooniheryaka wi oohiya meecelo awe oonanara. Owo onnooniherya wi onnachuna okookela okhalano onthamwene waphaama ni Yehova. Atokweene anneeriha wi evirevo elukuluku yoophwanelela—miyeeri mincipale, eyaakha naari iyaakha, mwawiiwanana ni mikhalelo sawe—wi owo ooniherye ocharuwa wawe weeparipari. Vaavaa nikhuuru na atokweene nnaakhelaaya ekaarata ya oveka okookela mmulokoni, nikhuuru na okookiherya mmulokoni nnahaala oloca ni muchu yoowo. Nikhuuru nlo nnahaala waalikhela waakhanle wi muchu owo okhalano “miteko seiyo inooniha orukunuwa waya murima” nave elakelele waakhanle wi anahaala omukookiherya mmulokoni elukuluku yeeyo naari hooye.—Saw. 26:20.

³⁵ Wakhala wi muchu owo onaveka okookiheryiwa mmulokoni iikariwe mmuloko mukina, nikhuuru na vanipuroni na okookiherya mmulokoni nnahaala othukumana ni yoowo ni othokororya yooveka awe. Wakhala wi anna a nikhuuru na okookiherya mmulokoni anneemererya wi owo akookele mmulokoni, anahaala orumiha ekaarata aya ya omweemererya wa nikhuuru na atokweene yaawo yaathokoronrye mwaha awe. Makhuuru oomeeli anahaala olapa vamoha wi ekhaleno sooleeliherya soothene wi ephiyerye makuchuwelo oophwanelela. Nyenya, yoolakelela ya okookiheryiwa mmulokoni enapakiwa nnikhuuru na okookiherya mmulokoni nenlo naathokoronrye mwaha woopaceryani.

YOOLOKOHA VOOLOCA SA OKOOKIHERYIWA MMULOKONI

³⁶ Vaavaa nikhuuru na okookiherya mmulokoni nnoonaaya wi mulipa awiikariwa naari awiisiikara owo oocharuwa ni murima woothene nave wi onaphwanela okookiheryiwa mmulokoni, yoolokoha ya okookiheryiwa mmulokoni enapakiwa mmuloko yoowo waathokoronrye mwaha woopaceryani. Wakhala wi muchu owo vano ori mmuloko mukina, yoolokoha enahaala tho opakiwa weiwo. Yoolokoha eyo enaphwanela okhala ha: “[Nsina na muchu owo] oheemereryiwa okhala Namoona a Yehova.”

MIYAHA INAAVOLOWELA ANAMWANE OOPATISIWA

³⁷ Soocheka itokweene inapakiwa ni anamwane oopatisiwa inaphwanela olokohiwa wa atokweene. Vaavaa atokweene anathokororyaaya miyaha inavolowela soocheka itokweene sa anamwane, asitiithi aya ari Anamoona a Yehova anaphwanela okhalavo. Yoochuna aya ori okhaviherya nikhuuru na othoriha, ohiya omwaakiha mwanaya, yeerihaka wi ahaakhele olaka yoowo onamphwanela. Hiiha ntoko eneereryaaya wa muchu mutokweene, nikhuuru na othoriha ninniilipixerya omusamela ni omookolola namacheka. Nyenya wakhala wi mwaana owo hanooniherya ocharuwa, onaphwanela wiikariwa mmulokoni.

VAAVAA ALALEERYI OOHIPATISIWA ANAPAKAAYA SOOCHEKA

³⁸ Tiheeni enaphwanela weeriwa vaavaa alaleeryi oohipatisiwa anapakaaya yoocheka etokweene? Woona wi awo tahi Anamoona oopatisiwa, hanaphwanela wiikariwa mmulokoni. Akhweya awo haniiwexexa phaama meecelo Eekristu, vanthowa na yeela, annavahiwa miruku mmukhalelo woosivela wi ewerye ‘wookolola iphiro’ sa meecelo aya.—Ahe. 12:13.

³⁹ Wakhala wi namacheka yoowo ori mulaleeryi oohipatisiwa hanooniherya ocharuwa, atokweene eeli emanle omukhaviherya, onahaala ochuneya opaka yoolokoha wi oleeliwe muloko. Mmukhalelo yoola, ennapakiwa yoolokoha yawaakuveya, ni masu ala: “[Nsina na muchu owo] oohiya okhala mulaleeryi.” Vano muloko onahaala omoonaka namacheka owo ntoko muchu eelapo. Naamwi mulipa oocheka owo ahiikariwe, Akristu anaphwanela okhalano ephoole vooloca sa waataana ni yoowo. (1 Kor. 15:33) Mwawiihiiha, honeemereryiwa muteko awe woolaleerya.

⁴⁰ Moovira wa elukuluku, muchu yoowo oohipatisiwa ohin’ye okhala mulaleeryi wa nthowa na opaka yoocheka, akhweya onahaala ochuna okhala mulaleeryi wanaawiili. Mmukhalelo yoola, atokweene eeli anahaala ovaanelano vamoha wi ethokororye oya wawe vahoolo makupa oomunepani. Wakhala wi owo onnaphwanelela okhala mulaleeryi wanaawiili, ennapakiwa yoolokoha yawaakuveya: “[Nsina na muchu owo] vano mulaleeryi oohipatisiwa.”

YEHOVA ONNAREELIHA MALAPELO AWEELA NI A MURECELE

⁴¹ Oothene yaawo anathukumana ni muloko wa Muluku annawerya opuha ohakalala wa nthowa na mukhalelo waphaama woomunepani yoowo Yehova onaavaheiye achu awe. Nookhalano yoolya ni maahi mancipale oomunepani. Nave tho nri okhapeleliwa ni Yehova moorweela wa atokweene, yaawo anahooleliwa ni Kristu. (Sal. 23; Isa. 32:1, 2) Okhala mu parataiso yoola oomunepani mmahiku yaala ookuchula ennaneeriha okhala ookhapeleleya.

⁴² Moorweela wa otikitherya weela ni murecele mmulokoni, ninnatitelela waariha ekamaama ya eparipari ya Omwene. (Mat. 5:16; Tiy. 3:18) Ni mareeliho a Muluku, hiyaano ninnahakalala owoona achu ancipale emusuwelaka Yehova ni ekhalaka vamoha ni hiyaano mu weera yoochuna awe.