Kinnaphwanela Osiyaara Ikhorowa?

“Osiyaara ori ntoko othela; oliva ori ntoko okhweliwa.”​—Muhapo wa Suwahili.

MUHAPO ola woosuweliwa phaama ni achu a Afrika Oomoko, nave onnooniherya moonelo wa ancipale a makupa oohiyana orukurerya elapo. Nyuwaano munoona hiiha vooloca sa osiyaara ikhorowa sa nthamwene naari mukhalelo mukina? Naamwi ilukuluku ikina ti yoophwanelela, apwanne ti ya miruku? Tiivi siri sawoopiha sa osiyaara ikhorowa?

Muhapo mukina wa Suwahili onnaloca phaama mwaha yoola. Owo onii: “Osiyaara ni osiyaariha onnananariha onthamwene.” Chiri, ivaale inanwerya woopopiha onthamwene. Naamwi epakiwe marehereryo aphaama ni mathowa aphaama, ichu hasineeca ntoko nnaweheryaahu. Ntoko yootakiherya, wakhala wi elukuluku ennavira nave evaale heliviwe, mulipa oosiyaariha onnakhala oonyeenyeya. Onanwerya okhalavo ikuhu, nave onthamwene variyari va mulipa oosiyaara ni oosiyaariha onnananara—ophitaanyerya imusi saya. Woona wi ivaale sinnatannya makacamiho mancipale, nnaphwanela woona ntoko yoothanla yookuchula ohiya ntoko mukhalelo wookhweya omaliha orama wa ikhorowa.

Osiyaara tho ikhorowa enanwerya onanariha waataana wa muchu ni Muluku. Mwawiihai? Opwaha soothene, Piipiliya onnaloca wi muchu yoowo mwaayiini onakhooca oliva ivaale sawe muchu oonanara. (Salmo 37:21) Piipiliya tho onnooniherya wi “mutxhu osiyanre, kapuro a yole ompolen’ye.” (Masiposipo 22:7, BNM) Mulipa oosiyaara onaphwanela osuwela wi ookhalano murici wa yoole omusiyanreiye ophiyerya akookinhe ikhorowa. Muhapo mukina wa Afrika ti weeparipari: “Wakhala wi woopoleya mweco wa muchu, onahaala omucharaka weiwo onayeiyewo.” Mwaha ene ti wi muchu yoowo onalimeliwa ni evaale hanakhala ootaphuwa weera onachuneiye.

Okookiha yeeyo muchu opolen’yeiye, enaphwanela okhala echu yoopacerya. Moohiyana, makacamiho anahaala okhumelela. Waaceererya ivaale enahaala okumiherya wuukhuwa wawaaca, oyeleela ikhove, olapa moovirelela, ohiiwanana variyari va mulopwana ni mwaariye, ophiyerya omwaryeya wa ichoko ophitaanyerya othorihiwa naari owaleliwa. Masu anaphwanyeya mu Aroma 13:8 ta miruku: “Muhipoleye etchu wa mutchu mukina, nyenya osivelanaru.”

TI WOOCHUNEYA CHIRYENE?

Nthowa na soothene seiya, ti waphaama okhalano ephoole vooloca sa osiyaara ikhorowa. Ti yaphaama okoha: Ti woochuneya chiryene opoleya ikhorowa? Apwanne mwaha wa okhapelela sookhalano sanyu wi mukhapelele echoko anyu? Naari wi ennavolowela nrima, akhweya yoochuna ya okhala ntakhara sookhalano sa mukina? Ikwaha sincipale, yaahaala okhala yaphaama okhalano vakhaani opwaha wiihooxa orweela wa osiyaara.

Chiryene, sookhalavo miyaha savameekhaaya, ntoko vaavaa enakhumelelaaya epahu mootutuxa nave ohikhalavo mukhalelo mukina. Naamwi hiiha, wakhala wi muchu onnalakelela osiyaara, owo onaphwanela wooniherya malakiheryo aphaama. Eyo eneeriwano hai?

Yoopacerya, muhiphure moonanara pahiru nthowa na wi muchu owo onakhala ntoko ori mmukhalelo waphaama waapwaha akina. Hannaphwanela wuupuwela wi vaavaa muchu onakhaleiye ntoko ori mmukhalelo waphaama, onahaala onipoleya wi anikhaviherye. Hannaphwanela tho wuupuwela wi hinaano murici wa okhala oororomeleya ni muchu yoowo. Muhaakhalele nrima yaale anakhala ntoko ari mmukhalelo waphaama omuhakhuni.​—Masiposipo 28:22.

Nto, mwiilipixerye wi mukookihe yeeyo mpolen’yaanyu, nave mweereno yeeyo ni murima woothene. Wakhala wi mulipa oosiyaariha hatikithenrye elukuluku, nyuwaano munaphwanela otikitherya, nave mucharihe yeeyo. Ti waphaama orepela yeeyo mvaanenlaanyu wi mmusepe namvutuka. (Yeremiya 32:9, 10) Wakhala wooweryeya, mperekhe mukhatiinyu wa mulipa oosiyaariha yeeyo mpolen’yaanyu wi nwerye omuthamalela. Waakuvela okookiha yeeyo musiyanryaanyu ennalipiha onthamwene. Yesu aaloca va Mwaha wa va Mwaako: “Olocha wanyu okhale, Ahe, ahe; hoe, hoe.” (Mateyu 5:37) Mwawaacererya, elukuluku yoothene mukhaleno mmuupuwelo Nlamulo na Mphimo Woolikana: “Ichu sothene mwatchunaka wi atchu yerele nyuwo, nyuwo tho muwerele yawo sawihiha.”​—Mateyu 7:12.

OHOOLELA WOOKHAVIHERYA WA PIIPILIYA

Piipiliya onnavaha murece wookhweya wa okukuca osiyaara ikhorowa. Owo onii: “Mathamalelo vamoha ni wítchála tanaphwanyerya etchu vatokotoko.” (1 Timoteo 6:6) Mmasu makina, ohakalalela yeeyo muchu oreiyeno mukhalelo waphaama wa osepa sookhumelela soothananiha sa osiyaara. Mweeparipari, hori wookhweya okhala oohakalalela mu elapo yeela ya ochuna wiiphwanyerya. Mmukhalelo yoowo annooneya “mathamalelo”. Mwawiihai?

Ntoko yootakiherya mmuthokororye mutheli mmoha o Asiya. Mu iyaakha saya seemiravo, yaanaatikhina yaale yaawerya okhalano empa aya ene. Mwawiihiiha yaalakelela okula yawaya ni ikhorowa yaakhapelenlaaya ni yaasiyaanraaya orweela wa epanku ni asuweli. Ohoolo waya, yaapacerya woona ohokola wa soolivela sa mweeri ti mweeri. Yaapacerya olapa vancipale, emalihaka nihiku noothene, yeeyo yaaweeriha ohikhalano elukuluku wa anamwane aya. Mulopwana onnaloca: “Wuukhuwa, wiicela, ni oyeleela ikhove inakhala ntoko mucapara woolimela va muru vaka. Eyo yaari yoohooxa.”

Elukuluku ekina, awo yaahuupuwela masu a 1 Timoteo 6:6 nave yaalakelela okuliha empa aya. Yaavira miyakha miili wi etaphuwe mmirici saya. Tiheeni mutheli ola ohusenryeiye orweela wa yaweereya aya? Vaya annaloca: “Woona ichu soomwiilini mmukhalelo woomunepani ennaakiha.”

Muhapo wa Suwahili oromoliwe omapacereryo woosuweliwa ni achu ancipale. Nave honaahiiha achu osiyaara. Mwawiiwanana ni malakiheryo a Piipiliya amanle othokororyiwa, yaahaala okhala ya miruku wuupuwelela phaama nikoho nla: Kinnaphwanela osiyaara ikhorowa?

[Yooleeliherya va epaaxina 29]

“Woona ichu soomwiilini mmukhalelo woomunepani ennaakiha”