Ntakhara Heeni Waacicimiha Yaale Arino Olamulelo?

1, 2. (a) Mukhalelo taani woovila nnakumanaahuno vooloca sa waacicimiha alamuleli? (b) Makoho taani nnahaalaahu othokororya?

MONTOKO omoona mwaana vaavaa atiithi awe anamvekaaya wi apake echu yeeyo ohinachuneiye? Owo onnooniherya okacamiheya onooneya owanoni wawe. Onniiwa nsu na atiithi awe, nave onnasuwela wi onaphwanela wiiwelela olamulela wa atiithi awe. Nyenya owo, hanachuna wiiwelela. Mukhalelo yoola onnooniherya eparipari yeeyo oothene ahu nnakumanaahuno.

² Waacicimiha yaale arino olamulelo wiiliwiili tahi echu yookhweya. Ikwaha ikina munnoona okhala woovila waacicimiha yaale arino olamulelo variyari va nyuwo? Wakhala wi tihiiha, hamuri meekhinyu mmukhalelo yoowo. Nnakhala mu elukuluku yeeyo wiiwelela olamulelo onakhalaaya woovila. Nyenya Piipiliya onnaloca wi nnaphwanela wooniherya ncicimiho wa yaale arino olamulelo. (Masiposipo 24:21) Mweeparipari, weerano yeeyo ti yookhweleya wakhala wi ninnachuna wiikhapelela mu osivela wa Muluku. Nave, makoho makina annakhumelela. Ntakhara heeni ti woovila waacicimiha alamuleli? Ntakhara heeni Yehova onnaniveka eyo, nave tiheeni enahaala onikhaviherya wiiwelela? Vookuchula, makhalelo taani nnahaalaahu wooniherya ncicimiho wa alamuleli?

NTAKHARA HEENI TI WOOVILA

3, 4. Ocheka ni ohiphaameya waapacenrye hai, nave ntakhara heeni mukhalelo ahu woohiphaameya onneeriha okhala woovila ocicimiha olamulela?

³ Hankooni nthokororye mathowa meeli yaawo aneeriha okhala woovila wooniherya ncicimiho wa yaale arino owerya wa olamulela. Noopacerya, ohiphaameya wahu; nanaawiili, yaale tho arino olamulelo toohiphaameya. Ocheka ni oohiphaameya wa achu opacenrye khalai mu emaca ya Eeteni, vaavaa Aatamu ni Haava yaamwarenlaaya olamulela wa Muluku. Mwawiihiiha yoocheka yaapacerya ni omwaryeya. Ti nthowa nene olelo tho onakhalaaya woovila wiiwelela.​—Mapacereryo 2:15-17; 3:1-7; Salmo 51:5; Aroma 5:12.

⁴ Nthowa na mukhalelo ahu woohiphaameya, ti wookhweya wooniherya wiirumiha ni nrima, mmukhalelo mukina, nnaphwanela wiilipixerya vancipale wi naavye ni okhapelela mukhalelo yoowo woothowa​—wiiyeviha. Naamwi nimurumeelaka Muluku moororomeleya mu iyaakha sincipale, akhweya nnahaala omorela mmuraakho wa wiirumiha ni okhoma. Ntoko yootakiherya, muthokororye yaweereya ya Koora, yoowo moororomeleya aavonthe makacamiho mancipale ni achu a Yehova. Nyenya, owo aanachuna vancipale olamulela, nave mwawiirumiha aahoolela omwaryeya ntakhara Moose, mulopwana yoowo aari awiichacala mu elukuluku yeele. (Namarepela 12:3; 16:1-3) Mmuupuwele tho, Mwene Asa, yoowo wiirumiha waamweerinhe ovolowa mu empa ya Yehova ni opaka muteko waweela yoowo weeriwano pahiru ni alipa eephepa. (2 Matharihelo 26:16-21) Alopwana yaala yaathorihiwa nthowa na omwaryeya waya. Nyenya, sootakiherya seiha soonanara, sookhapeleliwa wi ikhale yawuupuxerya wa hiyo. Nnaphwanela ovootha wiirumiha yoowo oneeriha okhala woovila ocicimiha olamulelo.

5. Ohiphaameya wa achu onananariha hai olamulela waya?

⁵ Mmukhalelo mukina, achu oohiphaameya ari alamuleli anneeriha okhala woovila ocicimiha olamulelo. Ancipale, tookhoma, oonanara, naari oohooxa. Miyaha sa achu, soosareya ni saweereya sa ohilamulela phaama. (Mwaalakhanye Eklesiyaste 8:9.) Ntoko yootakiherya, Sawuli aari aphaama, mulopwana awiiyeviha vaavaa Yehova aamuthanlileiye wi akhale mwene. Nyenya, aahooniherya wiirumiha ni nrima; owo aaphiyerya omwiikara Tavite mulopwana oororomeleya. (1 Samuwele 9:20, 21; 10:20-22; 18:7-11) Ohoolo waya Tavite aakhala mwene aphaama mu elapo ya Isarayeli, nyenya owo aapharihela moonanara olamulelo awe vaavaa aamwiiyaleiye mwaara a Uriya, Muhitita nave eeriha wi mulopwana yoowo ahaarino nthowa akhale ohoolo wa anakhoco wi iiphiwe. (2 Samuwele 11:1-17) Mweeparipari, ohiphaameya onneeriha okhala woovila wa achu waakhwaniherya phaama olamulela. Nave vaavaa yaale arino olamulelo ahinamucicimihaaya Yehova, onnakhala woovila vancipale. Amanle oloca mukhalelo asitokweene a ikerexa sa Katolika yaapacerinhaaya ohooxa otokotoko, mulipa ooloca miyaha aarepa: “Owerya onnaahooxa, nave okhalano owerya wawaakhwanela onnaahooxa vancipale.” Ni masu yaala mmuupuweloni, hankooni nthokororye nikoho: ntakhara heeni waacicimiha alamuleli?

NTAKHARA HEENI WAACICIMIHA ALAMULELI?

6, 7. (a) Osivela wahu wa Yehova onaneeriha opaka eheeni, nave ntakhara heeni? (b) Moonelo ahu wa ocicimiha onavolowela eheeni, nave nnii nooniherye hai?

⁶ Nthowa naphaama na waacicimiha alamuleli onarweela mu osivela—osivela wahu wa Yehova, wa annihu, ni hiyo mukhatiihu. Woona wi ninnamusivela Yehova, opwaha echu eri yoothene, hiyaano nnachuna ohakalaliha murima awe. (Mwaalakhanye Masiposipo 27:11; Marko 12:29, 30.) Noosuwela wi otokweene awe, ophwanelela wawe olamulela veelaponi yoothene, onnaakaahiwa veelaponi yavathi opacerya omwaryeya mu Emaca ya Eeteni nave achu ancipale annapaka makupa a Satana ni okhooca olamulela wa Yehova. Ninnahakalala opaka makupa a Yehova nikhaviheryaka olamulela awe. Vaavaa nnaalakhanyaahu Masu ootikiniha a Yawupulula 4:11, ninnatannyeya murima. Hiyaano ninnasuwela phaama wi Yehova tonaphwanelela Olamulela veelaponi yoothene! Ninnakhaviherya olamulelo wa Yehova, ninneemererya olamulelo awe nihiku nnihiku na okumi ahu.

⁷ Ocicimiha olamulelo wa Yehova onavolowela wiiwelela woopwahiherya. Ninnamwiiwelela Yehova mwawaakuveya nthowa nawi ninnamusivela. Nyenya inahaala okhalavo ilukuluku vaavaa wiiwelela onahaalaaya okhala woovila wa hiyo. Mu ilukuluku seiho, ntoko mwaana mukhaani yoowo nimuloncaahu woopaceryani, nnahaala ohuserya okhala oocicimiha. Hiyaano noosuwela wi Yesu aaheerano yookhwela ya Atiithi awe naamwi weerano yeeyo waari woovila vancipale. Owo aaloca wa Atiithi awe: “Nyenya, tahi okhwela waka hooye, nyenya’tho wawinyu weereye.”​—Luka 22:42.

8. (a) Ocicimiha olamulelo wa Yehova olelo wiiliwiili onavolowela eheeni, nave tiheeni enooniherya moonelo wa Yehova vooloca sa yeeyo? (b) Tiheeni enahaala onikhaviherya owiriyana ni weemererya olaka? (Moone ekaaxa “Owiriyaneke Ikano, Wemeke Ohusihiwa.”)

⁸ Nyenya, olelo Yehova hanaloca ni hiyo mwawooneya; owo onapharihela Masu awe ni achu yaawo anamweemelela veelaponi yavathi. Wiiliwiili, hiyaano ninnooniherya ncicimiho wa Yehova moorweela wa waacicimiha alamuleli yaawo aavanheiye olamulelo, naari yaawo onaweemereryeiye wi etitelele, okhalano owerya. Wakhala wi nohaamwaryeela achu yaawo​—ntoko yootakiherya, moorweela wa okhooca ekano ni olaka waya onarweela mu Soorempwa​—hiyaano naahaala omunyemula Muluku ahu. Vaavaa Aisarayeli yaamwapaaya ni ommwaryeela Moose, Yehova oona meerelo aya ntoko yaamweerela yoowo.​—Namarepela 14:26, 27.

9. Ntakhara heeni waasivela annihu onnaneeriha ocicimiha olamulelo? Mvahe yootakiherya enooniherya yeeyo.

⁹ Hiyaano tho ninnooniherya ncicimiho ntakhara olamulelo nthowa nawi ninnaasivela annihu. Mwawiihai? Phaameene, nkaanyiheryani wi nyuwaano mwa mukhoco mu nikhuuru na anakhoco. Wi anakhoco ekhaleno mphurelo waphaama, ophiyerya ovuluwa, mukhoco ori oothene onaphwanela owiiwelela yaale anahoolela, owiiwelela ni waacicimiha. Wakhala wi nyuwaano himunachariha marehereryo yaawo, anakhoco oothene yaahaala okumana ni epahu. Eparipari wi anakhoco aachu annatannya makacamiho mancipale veelaponi. Nyenya, Yehova ookhalano anakhoco yaawo pahiru anapaka saphaama. Piipiliya onnamuloca Muluku ikwaha sincipale, ntoko “Yehova aanakhoco”. (1 Samuwele 1:3, Tradução do Novo Mundo NM) Owo Muhooleli a macikhwi a soopatuxiwa soomunepani sakuru. Moophwanaphwana, Yehova onnaalikanyiha akapuro awe a veelaponi yavathi ntoko anakhoco. (Salmo 68:11; Esekiyeli 37:1-10) Wakhala wi noohaamwaryeela achu yaawo Yehova onaavaheiye olamulelo variyari va hiyo, hinaahaala waahela mmakacamiho annihu, anakhoco oomunepani? Vaavaa Mukiristu onaamwaryeleiye atokweene, akina mmulokoni annahooxeya vancipale. (1 Akorinto 12:14, 25, 26) Vaavaa mwaana onamwaryeyeiye, achu oothene a veechokoni annahooxeya. Mwawiihiiha ninnooniherya osivela wa annihu moorweela wa wunnuwiha ncicimiho ni munepa wa wiiwelela.

10, 11. Nchuno naphaama na waakhela mphurelo, nnaneeriha hai wiiwelela olamulelo?

¹⁰ Hiyaano ninnacicimiha olamulelo nthowa nawi ennanikhaliha phaama. Vaavaa Yehova onanivekeiye wi ncicimihe olamulelo, wiiliwiili owo onnaloca mphurelo onarweela mu weerano yeeyo. Ntoko yootakiherya, owo onnaaveka anamwane wi ewiiwelele asitiithi aya wi ekhale phaama mu elukuluku yincipale. (Malamulo 5:16; Aefeso 6:2, 3) Yehova onnanleela wi naacicimiheke atokweene nthowa nawi oheerano yeeyo enahaala opahula waataana wahu ni yoowo. (Ahepri 13:7, 17) Owo tho onnanleela wi niwiiwelele alamuleli aachu wi nikhapeleleye.​—Aroma 13:4.

¹¹ Himuneemererya wi osuwela echu enamweeriha Yehova oniveka wi niiwelele olamulela ennanikhaviherya ocicimiha olamulelo? Hankooni vano, nthokororye mukhalelo nnahaalaahu wooniherya ncicimiho wa olamulelo mmakhalelo mararu ookhweleya a okumi.

NCICIMIHO VEECHOKONI

12. Murici taani Yehova omuthanlenleiye mulopwana ori tiithi veechokoni, nave Alopwana ancipale anaakhwaniherya hai murici yoola?

¹² Yehova mukhateiye topacerinhe marehereryo a echoko. Woona wi Muluku a marehereryo, owo oorehererya echoko wi ewerye olapa mwaphaama. (1 Akorinto 14:33) Owo omvaha mulopwana ori tiithi olamulelo wi alapeke ntoko muru wa echoko. Mulopwana onnooniherya ncicimiho wa Muru awe, Yesu Kiristu, moorweela wa otakiherya meerelo a Yesu a ohoolela muloko. (Aefeso 5:23) Mwawiihiiha, mulopwana hanaphwanela wiicuwaliha, nyenya onaphwanela waakhwaniherya ntoko muhooleli; hanaphwanela okhala oohooxa, ni ookhoma, nyenya oosivela, ooleva ni eepewe. Onnasuwela wi olamulela wawe hori woopwaha​—honavirelela olamulelo wa Yehova.

13. Muthiyana ori mai oni akhwaaniherye hai murici awe mmukhalelo yoowo oni omuhakalaliha Yehova?

¹³ Muthiyana ori mai onalapa ntoko mukhaviheryi a iyawe. Muthiyana tho ookhalano olamulela veechokoni, Piipiliya onnaloca “mahusiho amai à.” (Masiposipo 1:8, BNM) Mwawiihiiha, olamulelo wawe ori vathi va olamulelo wa aiyawe. Muthiyana ori Mukiristu onnooniherya ncicimiho wa olamulelo wa aiyawe moorweela wa omukhaviherya iyawe waakhwaniherya murici awe veechokoni ntoko muru. Owo hanamuyeviha, hanaavyaavya omuhoolela naari wiihela mu nipuro nawe. Opwaha yeeyo, owo onnamukhaviherya ni omwiiwelela. Vaavaa ohineemereryeiye yoolakelela ya iyawe, muthiyana mwa ncicimiho onnaloca moonelo awe, nyenya onnatitelela wooniherya ncicimiho. Wakhala wi iyawe toohiroromela, muthiyana akhweya onamukumana ni makacamiho matokotoko, nyenya, otitelela wooniherya ncicimiho onammweeriha iyawe omwaavya Yehova.​—Mwaalakhanye 1 Petro 3:1.

14. Anamwane enii yaahakalalihe hai asitiithi aya ni Yehova?

¹⁴ Anamwane annahakalaliha murima wa Yehova vaavaa anawiiwelelaaya asitiithi aya. Awo tho annaruuha ncicimiho ni ohakalala wa asitiithi aya. (Masiposipo 10:1) Echoko erino oohoolela mmoha, anamwane annapharihela nlakiheryo nimohamoha na wiiwelela, esuwelaka wi tiithi naari mai nlelo annachuna nikhaviheryo naya ni wiiwelela. Mu ichoko mwemmo oothene anaakhwaniheryaaya mirici seiho Muluku aavanheiye, yookhumela ori murecele ni ohakalala otokotoko. Eyo ennaruuha ncicimiho wa yoowo opacerinhe ichoko soothene, Yehova Muluku.​—Aefeso 3:14, 15.

NCICIMIHO MMULOKONI

15. (a) Nnooniherya hai mmulokoni wi ninnacicimiha olamulelo wa Yehova? (b) Malakiheryo taani anahaala onikhaviherya owiiwelela yaale anahoolela? (Moone ekaaxa “Mwawiwelelani Ahóli Anyu”.)

¹⁵ Yehova oomuthanla Mwanawe ntoko Muhooleli a muloko Weekiristu. (Akolose 1:13) Yesu tho, oomuthanla ‘kapuro óroromeleleya ni amiruku’ wi athokororyeke soothowa soomunepani sa achu a Muluku veelaponi yavathi. (Mateyu 24:45-47) Nikhuuru Noolamulela na Anamoona a Yehova nnarumeela ntoko ‘kapuro óroromeleleya ni amiruku.’ Ntoko muloko Weekiristu wa nsana noopacerya, asitokweene olelo annaakhela sooleeliherya ni ikano inarweela wa Nikhuuru Noolamulela, mwawooneya naari orweela wa yaawo anaweemelela, ntoko ooweherya aweeceeca. Vaavaa mukhatiihu nnacicimihaahu olamulela wa asitokweene a muloko, hiyaano nnamwiiwelela Yehova.​—Mwaalakhanye 1 Atesalonika 5:12; Ahepri 13:17.

16. Asitokweene anathanliwa ni munepa waweela mmukhalelo taani?

¹⁶ Asitokweene ni arummwa oorumeela tahi oophaameya. Awo tho annahesa ntoko hiyaano. Naamwi hiiha, asitokweene “samahala wa atchu,” avahiwe wi ekhaviherye muloko okhale woolipa omunepani. (Aefeso 4:8) Asitokweene anathanliwa ni munepa waweela. (Saweriwa Tarummwa 20:28) Mwawiihai? Ehaakumve othanliwa, alopwana yaawo anaphwanela wooniherya ophwanelela yoowo onaphwanyeya Mmasu ooveereliwa a Muluku. (1 Timoteo 3:1-7, 12; Tito 1:5-9) Opwaha yeeyo, asitokweene yaawo anathokororya ophwanelela wa anna annavekela evekaka ohoolela wa munepa waweela wa Yehova.

17. Ntakhara heeni ikwaha ikina athiyana Eekiristu owariha muru vaavaa anapakaaya muteko mmilokoni saya?

¹⁷ Mmulokoni, ikwaha ikina annathowa asitokweene naari arummwa oorumeela wi epake miteko ineeriwa ni yaawo, ntoko weeciha muthukumano wa muteko woolaleerya. Mmukhalelo yoola anna akina oopatisiwa ananwerya othokororya miteko seiho. Yaahikhalavo Alopwana, arokora oophwanelela ananwerya weeciha. Nyenya, vaavaa muthiyana onaphareiye muteko oneeriwa ni munna oopatisiwa, muthiyana onnakhuneela muru awe.a (1 Akorinto 11:3-10) Nlakiheryo nla hinnaayeviha athiyana. Moohiyana, ninnaavaha athiyana ekari yawooniherya ncicimiho na nlakiheryo na ohoolela wa Yehova, mmulokoni ni veechokoni.

NCICIMIHO WA ALAMULELI EELAPO NI AKINA

18, 19. (a) Munii mutharihe hai nlakiheryo nnaphwanyeya mu Aroma 13:1-7? (b) Nnooniherya hai ncicimiho wa alamuleli eelapo?

¹⁸ Akiristu eeparipari mwa miruku annachariha nlakiheryo nnaphwanyeya mu Aroma 13:1-7. (Mwaalakhanye.) Vaavaa munaalakhanyaanyu nikupa nenla, munanwerya woona wi “olamulela wa atokwene” olociwe vaava alamuleli eelapo. Vaavaa Yehova onaweemereryeiye alamuleli yaawo okhala, awo annapaka miteko sookhweleya, annavahererya malamulo ni miteko soochuneya. Hiyaano ninnooniherya ncicimiho wa alamuleli moorweela wa wiiwelela malamulo aya. Nlivaka misokho, orepela phaama soovekeliwa ikina, ni malamulo makina alamuleli ananivekaaya, vooloca sa echoko, sootumiha ni muhakhu ahu. Nyenya, hinnawiiwelela alamuleli yaala wakhala wi ananiveka ohimwiiwelela Muluku. Mmukhalelo yoowo, ninnachariha moonelo mmohamoha wa arummwa, yaalonce: “Ninnaphwanela omwiwelela Muluku wopwaha atchu.”​—Saweriwa Tarummwa 5:28, 29; Moone ekaaxa “Olamulelo wawani kinaphwanelaaka wiiwelela?”

¹⁹ Hiyaano tho ninnooniherya ncicimiho wa alamuleli eelapo moorweela wa waacicimiha yaawo anaweemelela. Ikwaha ikina akhweya nnamphiyera ovaanela ni alamuleli eelapo. Murummwa Paulo aavaanela ni alamuleli eelapo, ntoko Mwene Herote Akripa ni Mutokweene Festo. Alopwana yaale yaakhalano soohesa saya, nyenya Paulo aalocano mwa ncicimiho. (Saweriwa Tarummwa 26:2, 25) Hiyaano ninnachariha yootakiherya ya Paulo, moohipwacha mulamuleli taani nnalocaahuno, wakhala wi tooweryaxa naari mpilisa a vanipuroni. Oxikola, amiravo Eekiristu anniilipixerya wooniherya ncicimiho nimohamoha wa ahusiha aya ni ahooleli ooxikola. Moolikana, hiyaano tho hinnaphwanela wooniherya ncicimiho pahiru wa yaale aneemererya soororomela sahu; ninnaacicimiha tho yaale anawiikara Anamoona a Yehova. Chiryene, oohiroromela anaphwanela woona wi naachu oocicimiha.​—Mwaalakhanye Aroma 12:17, 18; 1 Petro 3:15.

20, 21. Mareeliho taani anakhumelela moorweela wa wooniherya ncicimiho wa alamuleli?

²⁰ Nooniheryeke ncicimiho ilukuluku soothene. Murummwa Petro oorepa: “Mwáchichimihani atchu othene.” (1 Petro 2:17) Vaavaa achu ananoonaaya wi chiryene ninnaacicimiha, awo anamutikhiniheya vancipale. Muupuwele, wi ncicimiho ti noothowa mahiku ahu yaala. Wooniherya nno, mukhalelo mmoha wa wiiwelela nlamulo na Yesu: “Mwárihe omwaléla wanyu va mithoni va atchu, wi vawona miteko anyu yaphama, yachichimihe Atithinyu a Wirimu.”​—Mateyu 5:16.

²¹ Mu elapo yeela ya epiiphi, achu a mirima saphaama annakuxeya ni omwaleela woomunepani. Mwawiihiiha, wooniherya ncicimiho veechokoni, mmulokoni, ni alamuleli enanwerya waalekecha ni waapurula akina weeca ni hiyaano mu omwaleela. Ewehereryo taani yootikhiniha! Naamwi eyo eheeren’ye, echu emoha ti yeeparipari. Waacicimiha wahu achu onnamuhakalaliha Yehova Muluku nave onnanikhaviherya wiikhapelela mu osivela wawe. Aamukhalavo phatamari mutokotoko ompwaha yoola?