Nnaphwanela Okhala Aweela Mmakhalelo Ahu Oothene

“Khalani awéla murima m’makhalelo anyu othene.”​—1 PET. 1:15.

MWAHAALA WAAKHULA HAI?

Ntakhara heeni osepa nlakano mwaha mutokweene wa Akiristu eeparipari?

Wiiwanana taani orivo variyari va olamulelo wa Yehova ni ororomeleya Weekiristu?

Mwawiiwanana ni Ahepri 5:7, 11-14, nnaphwanela woona hai ohuserya wahu Masu a Muluku?

1, 2. (a) Tiheeni enaweheryiwa wa achu a Muluku vooloca sa makhalelo? (b) Makoho taani enahaala waakhuliwa mmwaha yoola?

YEHOVA aahinveerela murummwa Petro olikanyiha weela yoowo onacicimihiwa mu liivuru a Onamukucho ni ochuneya wa okhala aweela mmakhalelo ahu ntoko Akiristu. (Mwaalakhanye 1 Petro 1:14-16.) Yehova “Awéla Murima,” onaweherya wi awoocihiwa ni “ipuchepuche sikina” yiilipixerye okhala aweela mmakhalelo aya oothene​—ohiya pahiru mmakhalelo vakhaani.​—Yohane 10:16.

² Othokororya muhakhu woomunepani onaphwanyeya mu liivuru a Onamukucho onahaala onikhaviherya vancipale, nave opharihela yeeyo nnahuseryaahu enahaala onikhaviherya okhala aweela mmakhalelo ahu oothene. Nnahaala othokororya makoho ntoko: Nnaphwanela woona hai nlakano? Liivuru a Onamukucho onanihusiha heeni vooloca sa omwiiwelela Yehova? Tiheeni nnaphwanelaahu ohuserya vooloca sa ovaha mukucho?

SOOLOPOLA VOOLOCA SA NLAKANO

3, 4. (a) Ntakhara heeni Akiristu anaphwanela osepa ochekela malamulo ni malakiheryo a Piipiliya? (b) Ntakhara heeni hannaphwanela winla ikuhu naari owiica akina?

³ Naachunaka wi nimuhakalalihe Yehova, nnaphwanela ochariha moomalela malamulo ni malakiheryo awe, nihirwe nikhaleno moonelo wooriipiheya vooloca sa yaawo. Naamwi nihiri vathi va Nlamulo na Moose, soovekeya iho sinnanikhaviherya osuwela yeeyo eri yaweemereryeya naari yooheemereryeya vamiithoni va Muluku. Ntoko yootakiherya, Aisarayeli yalamuleliwa: “Muhinleke ikuhu nari muhiwìtxe atxhu a nloko nanyu. Mutxhu ti muthxu amukhweleke mukhweiye ntoko yoowo ene. Miyano k’Apwiya.”​—Onam. 19:18, BNM.

⁴ Yehova onachuna wi nihinleke ikuhu, nave owo tho onaweherya wi nsepe wiica. (Arom. 12:19) Naahinachariha malamulo ni malakiheryo a Muluku, Musaserya taani ahakalale, nave nnahaala omunyemula Yehova. Naamwi muchu aniphunce mwaayiini, niheemererye wi nikhale mwapu wa okuhamo mathowa. Muluku oonivaha ekari ya okhala ntoko “sokuxerya sa’tchaya” wi nikhapelele muhakhu wa orummwa. (2 Akor. 4:1, 7) Okuha mathowa honapaka makupa a yookuxerya eyo!

5. Tiheeni nnahuseryaahu orweela wa yaweereya ya Aaroni vamoha ni okhwa wa anamwane awe? (Moone eruku yoopacerya.)

⁵ Yaweereya yoothananiha ya emusi ya Aaroni enaphwanyeya mu liivuru a Onamukucho 10:1-11. Awo yaatepa othanana vaava nikalume na mooro orweela wirimu naaweeyenlaaya anamwane a Aaroni Nepati ni Apihu va nipuro na mukucho. Yaari yaweeha etokotoko ya nroromelo na Aaroni vamoha ni emusi awe ohiwinlela oosiveliwa aya! Apwanne nyuwaano munniisooneiha mukhatiinyu okhala a weela moorweela wa wiiwelela nlakiheryo na ohikhala awaataana ni mmusi naari muchu mukina yoowo iikariwe mmulokoni?​—Mwaalakhanye 1 Akorinto 5:11.

6, 7. (a) Vaavaa nnalakelelaahu opaka makupa a othela wa ekerexa, miyaha taani inaphwanela othokororyiwa? (Moone enoota.) (b) Naahaala ovaanela hai ni amusi ahiri anamoona vooloca sa moonelo ahu wa othela wa ekerexa?

⁶ Hiyaano akhweya hinni nikumane ni yaweeha etokotoko ntoko ya Aaroni ni emusi awe. Nyenya hanka wakhala wi noowompwa wi niye naari nipake makupa a othela wa ekerexa wa mmusi ohiri Namoona? Hiyaavo yoorempwa yookwakwaleya enakhwatiiha opaka makupa, nyenya apwanne aakhalavo malakiheryo anavolowela yoolakelela ntoko yeeyo?a

⁷ Olakelela wahu okhala aweela vamiithoni va Yehova mmakhalelo yaala alociwe enahaala owuukhula amusi ahu ahiri Anamoona. (1 Pet. 4:3, 4) Chiryene, ninniilipixerya osepa waanyeenyeiha, nyenya ti yaphaama oloca ni yaawo moocicimiha, mooluluwanya. Akhweya eyo enanwerya weeriwano othela ohaakumve. Hiyaano nnanwerya waathamalela ni oloca wi noohakalala nthowa na oniwopa wi nipake makupa a othela. Namala nanwerya oloca wi nthowa na miyaha sa malapelo inavolowela, opaka wahu makupa waahaala ovolowela ohakalala wa nihiku naya navameekhaaya nave wi yaahaala owuukhula awo ni alipa oowompwa akina. Ola mukhalelo mmoha wa osepa onanariha sookhovelela ni nroromelo nahu.

OKHAVIHERYA OLAMULELO WA YEHOVA

8. Liivuru a Onamukucho onavuwiha hai olamulelo wa Yehova?

⁸ Liivuru a Onamukucho onnavuwiha olamulelo wa Yehova. Opwaha ikwaha 30, malamulo anaphwanyeya mu Onamukucho anamvuwiha Yehova. Moose aanasuwela yeela nave aaheera yeeyo Yehova aamurummeiye weera. (Onam. 8:4, 5) Moolikana, ikwaha soothene nnaphwanela weera yeeyo Mulamuleli ahu, Yehova onachuneiye wi neere. Mmwaha yoola, nookhalano nikhaviheryo na marehereryo a Muluku. Nave yaweeha akhweya enahaala orwa vaavaa nryaahu meekhihu, ntoko yeeren’yaaya vaavaa Yesu eehiweiye mutakhwani. (Luka 4:1-13) Wakhala wi ninnateteiwa ni olamulelo wa Muluku nave ninnamuroromela, haavo onahaala owerya onipahula naari ovoothiwa ni woova.​—Masi. 29:25.

9. Ntakhara heeni achu a Muluku anniiciwa mmaloko oothene?

⁹ Ntoko oomuchara a Kiristu ni Anamoona a Yehova, ninniiciwa ni maloko orukurerya elapo. Ela tahi yootikhiniha, woona wi Yesu aaloca wa oohuserya awe: “Enarwa-yovelélani wohoshiwani, ewiphani: nave nyuwo munarwa-mukhala awichiwa ti atchu a maloko othene, ntakhara a nsina naka.” (Mat. 24:9) Variyari va ohooxa yoowo, hiyaano ninnavilela mmuteko wa olaleerya Omwene nave ninnatitelela okhala aweela vamiithoni va Yehova. Naamwi nri eekhaikhai, a okumi waweela, ni awiiwelela malamulo a alamuleli, ntakhara heeni nniiciwaahu? (Arom. 13:1-7) Nthowa na ompaka Yehova okhala Pwiya Mulamuleli ahu! Hiyaano ninnamulapela muteko waweela wa “Yowo mekhiyeru” nave hanrwa nnanariha malamulo ni malakiheryo awe eekhaikhai.​—Mat. 4:10.

10. Tiheeni yeeren’ye vaavaa munna mmoha aananarinheiye ororomeleya wawe?

¹⁰ Hiyaano tho ‘hanri a elapo ya vathi.’ Mwawiihiiha, ninnaruna ikhoco ni miyaha sa elapo. (Mwaalakhanye Yohane 15:18-21; Yesaya 2:4.) Akina a yaawo yiiveleenle wa Muluku yaananariha ororomeleya waya. Ancipale a yaawo yaacharuwa nave ereherya onthamwene aya ni Tiithi ahu awirimu a ikharari. (Sal. 51:17) Akina hiyaacharunwe. Ntoko yootakiherya, variyari va Ekhoco Etokweene Yanawiili, atoropa yaahaathukumanya annihu 160 a iyaakha sa oyariwa ophiyerya 45 yaawo yaawaleliwe ohirivo nthowa yaakuxa mu ikariposo soothene sa Hunkriya nave yaathukumanya mu epooma emoha. Weiwo awo yaahaalamulela ophara muteko wa etoropa. Anna ale yaahiikhalelaru oororomeleya, nyenya athanu naxexe a nikhuuru nenle yaalipela nave yaaheemererya soowara seetoropa. Iyaakha piili ohoolo waya, mmoha a yaawo yeemerenrye aapaka makupa a nikhuuru na anamahita yoowo yaalamuleliwe owiipha Anamoona oororomeleya. Munna awe oomwiilini aari variyari va yaawo! Vaavaa miyaha saamalihiwaaya, woopopiha owo hiweeriweno.

MUMVAHE YEHOVA OWETHA WANYU

11, 12. Ti mwawiihai mukhalelo mikucho sa Yehova seeriweno mu Isarayeli akhalai oryaayano yootaphulela wa Akiristu olelo?

¹¹ Mwawiiwanana ni Nlamulo na Moose, Aisarayeli yaaphwanela ovahaka mikucho soorepeliwa. (Onam. 9:1-4, 15-21) Mikucho saaphwanela okhala soohiriipiheya ntakhara sasiphela mukucho woophaameya wa Yesu. Nyenya, wa mukucho ti mukucho waaphwanela ocharihiwa meerelo aweemereryiwa. Ntoko yootakiherya, muthokororye yeeyo yaavekiwa wa maai aarino nikwiya. Onamukutxho 12:6 (BNM.) onnaloca: “Yamala elukuluku yòvasiwa vomuyara mwana amwàmulopwana nari amwàmuthiyana, akerihe wa namukutxho, va milako va musakala wa muthumano, eputxeputxhe ya muyakha mmoha enaya okhala mukutxho wopahiwa vamoha ni ekakaiya emoha nari nsiya nimoha inaya oheliwa mukutxho wotxipihano sotxheka.” Nlamulo na Muluku naari nookwakwaleya, nave osivela wawe woophimelela waanooneya mmalamulo. Wakhala wi maahi haawerya ovaha epucepuche, aaneemereryiwa ovaha ikakaiya piili naari masiya meeli. (Onam. 12:8) Naamwi ari oohaawa, mulapeli owo aanasiveliwa nave aanathamaleliwa moolikana ni yoowo onaveleela mukucho woowalamela. Tiheeni nnahuseryaahu orweela wa yeela?

¹² Murummwa Paulo aahaaceenyerya asinthamwene awe a nroromelo wi emvaheke Muluku “ephepa yomuthamalano.” (Ahe. 13:15) Iyano sahu inaphwanela olokohaka nsina naweela na Yehova vanlakani. Anna ni arokora ahiniiwa annapharihela elocelo ya ineneeryo wi emucicimiha Muluku. Akiristu anakhala mu empa ya wiichuuwa annamucicimiha moorweela wa orepa ikaarata, ovaha onamoona ni telefone, ni waalaleerya yaale anaaxekurya. Mukucho ahu wa omucicimiha Yehova moorweela wa osuweliha nsina nawe ni olaleerya michaka yaphaama​—onaphwanela ovahiwa ni ekumi ni mavyakelo ahu. Yeeyo eri owetha wahu.​—Arom. 12:1; 2 Tim. 2:15.

13. Ntakhara heeni nnaphwanela olokoha muteko ahu wa mmacani?

¹³ Mikucho sahu sa ncicimiho ti soovaha soochuna sa muchu mukhateiye wa Muluku ntakhara ninnamusivela. (Mat. 22:37, 38) Nyenya ninnavekiwa olokoha muteko ahu wa olaleerya. Vano, moonelo taani nnaphwanelaahu okhalano vooloca sa marehereryo yaala? Yoolokoha ya olaleerya nnaveleelaahu mweeri ti mweeri enniiwanana ni omulapela wahu Muluku. (2 Pet. 1:7) Mwawiihiiha, haavo onaphwanela woona okhala ookhinyereryiwa omaliha iwora sincipale mu orummwa wi yoolokoha ya muteko ahu wa mmacani ekhale etokweene. Ti nthowa nene mulaleeryi a Omwene yoowo ori mu empa ya wiichuuwa naari ooceecheya mmakhalelo makina onaphwaneleiye olokoha muteko wa mmacani wa aminutu 15 ohiya iwora sawaakhwanela. Yehova onnathamalela aminutu yaala ntoko owetha wa mulaleeryi a Omwene nave ntoko yawooniherya ya omusivela ni othamalela ekari ya orumeela ntoko Namoona Awe. Hiiha ntoko Aisarayeli yaawo mikhalelo saya saaheemererya ovaha mikucho soowalamela, alapeli a Yehova yaawo ari ookotakota nlelo anaphwanela oveleelaka yoolokoha. Soolokoha sahu sa muteko wa mmacani sinnakhaviherya yoolokoha ya elapo yoothene, yeeyo enakhaviherya opaka marehereryo a muteko wa omwaahiyu wa olaleerya Omwene. Apwanne oceenya ovekiwa wi niveleeleke yoolokoha ya muteko ahu wa olaleerya?

SOOKHOVELELA SAHU SA OHUSERYA NI MIKUCHO SA OMUCICIMIHA

14. Mutharihe ntakhara heeni nnaphwanelaahu waalikhela sookhovelela sahu sa ohuserya.

¹⁴ Nimanlaahu othokororya muhakhu vakhaani woomunepani onaphwanyeya mu Onamukucho, akhweya munahaala wuupuwela, ‘Vano kinniiwexexa phaama ntakhara heeni liivuru ola oreiye makupa a Masu ooveereliwa a Muluku.’ (2 Tim. 3:16) Vano muri oolakelela okhala aweela, ohiya pahiru nthowa na wi Yehova oolamula nyenya nthowa nawi owo onnaphwanela owetha wahu wi nimuhakalalihe. Akhweya yeeyo muhusenryaanyu mmiyaha seiya miili yohinnuwiha yoochuna anyu ya othipa mwawiiseela mu Soorempwa soothene. (Mwaalakhanye Masiposipo 2:1-5.) Nnivekelo, mwaalikhele sookhovelela sanyu sa ohuserya. Nyuwaano chiryene munnachuna wi mikucho sanyu sa ocicimiha sikhale saweemereryiwa ni Yehova. Apwanne mohoona wi munneemererya iprokrama sa televisau, axooku a ikhankoonya, naari mathatelo makina wi ewuukhuleeni ni evolowele wunnuwa wanyu omunepani? Wakhala ti hiiha, onahaala okhala wa mphurelo wuupuwelela masu a murummwa Paulo yaawo arempwe mu liivuru a Ahepri.

15, 16. Ntakhara heeni Paulo aari ooluluwela vaavaa aarepenleiye Akiristu Ahepri?

¹⁵ Paulo aaloca eparipari vaavaa aarepenleiye asinthamwene awe Eekiristu Ahepri. (Mwaalakhanye Ahepri 5:7, 11-14.) Murummwa owo haaperunxe masu! Owo aahaaleela wi yaari ‘ochiyana’ mu wiiwa waya. Ntakhara heeni Paulo aari oolipa, ni ooluluwela? Owo ooniherya osivela ni wuukhuwa wa Yehova ntakhara Akiristu yaale yaamwa mapele oomunepani. Osuwela mahusiheryo matokweene a Okiristu ti woochuneya. Nyenya, “yólya yeyo enakhúriwa” ennakhaviherya wunnuwa woomunepani ophiyerya wiichwa Weekiristu.

¹⁶ Ohiya oya vahoolo wi ewerye waahusiha akina, Ahepri yaanamuchuna muchu wi aahusiheke. Ntakhara heeni? Ntakhara yaanasepa “yólya yeyo enakhúriwa.” Mwiikohe: ‘Kookhalano moonelo waphaama vooloca sa yoolya yoomunepani enakhuuriwa? Kinnakhuura yoolya yeeyo? Naari kinnoovelela ovekela ni omuhuserya Piipiliya mwawiiseela? Wakhala hiiha, apwanne sookhovelela saka sa ohuserya sinatannya nikacamiho?’ Tahi wi pahiru nnalaleeryela achu, nyenya ninnaahusiha ni waapaka oohuserya.​—Mat. 28:19, 20.

17, 18. (a) Ntakhara heeni nnaphwanelaahu olya yoolya yoomunepani yoolipa moohihiyererya? (b) Vooloca sa mithukumano Seekiristu, nnaphwanela woona hai ophariheliwa wa soowurya soohapala?

¹⁷ Omuhuserya Piipiliya tahi wookhweya wa ancipale a hiyo. Mwawiihiiha, Yehova hanaakhinyererya achu awe ohuserya moorweela wa oweeriha wiisoona okhalano nthowa. Naamwi hiiha, moohipwacha waakhanle wi na alapeli a Yehova opacerya khalai naari ahiihaanoru, nnaphwanela olyaaka yoolya yoolipa yoomunepani. Weerano yeeyo ti woochuneya wi nikhaleno meecelo aweela.

¹⁸ Wi nikhale aweela, nnaphwanela ochariha okhapelela wa Soorempwa ni weera yeeyo Muluku onanivekeiye. Mwaathokororye anamwane a Aaroni Nepati ni Apihu, yaawo yiiphiwe nthowa na ovaha mooro ‘yahirummwalaya,’ akhweya eri oohapaliwa. (Onam. 10:1, 2, BNM.) Moone yeeyo Muluku aamulenleiye Aaroni. (Mwaalakhanye Onamukucho 10:8-11.) Apwanne ela enataphulela wi hinnaphwanela owurya yoowurya yoohapala nihaakumve oya mmuthukumano Weekiristu? Muupuwele miyaha iha: Hiyaano hanri vathi va Nlamulo. (Arom. 10:4) Mu ilapo ikina, annihu annapharihela soowurya soohapala moophimelela va olya ehaakumve oya mmithukumano. Akoopho axexe a viinyu yaaphariheliwa va Mukonelo. Vaavaa aatikithenryeiye Mukonelo, Yesu aahaaruma oohuserya awe onwurya viinyu yoowo aataphulela nikhami nawe. (Mat. 26:27) Piipiliya onnakhwatiiha khuluwi owuryaxa ni ohapaliwa. (1 Akor. 6:10; 1 Tim. 3:8) Nave yawuupuxerya-ya-murima ya Akiristu ancipale enanwerya oweeriha osepa khuluwi yoowurya yoohapala ehaakumve ophwanyeya mmuteko waweela vyakala. Nyenya, mikhalelo ti soohiyana elapo ti elapo, nave echu yoochuneya eri Mukiristu awerye “ohiyaniha yaphama ni yonanara” wi akhaleno meecelo aweela anamuhakalaliha Muluku.

19. (a) Tiheeni nnaphwanelaahu okhalano mmuupuweloni vooloca sa malapelo a echoko ni yoohuserya ya muchu mukhateiye? (b) Tiheeni mulakelenlaanyu weera vooloca sa okhala aweela?

¹⁹ Onnahalela ophwanya muhakhu wawaaca woomunepani wakhala wi munnatholathola Mmasu a Muluku. Mpharihele ikaruma sa otholathola inaphwanyeya wi mureerihe malapelo a echoko ni yoohuserya anyu ya muchu mukhateiye. Mwaaceererye nsuwelelo nanyu vooloca sa Yehova ni yookhwela awe. (Yak. 4:8) Mvekele wa Muluku ntoko enreiye namarepa a salmo yoowo iipale: “Mukihule mitho, wi kone; sotikhiniha sa m’malamulo anyu.” (Sal. 119:18) Muhirwe munyemulihe malamulo ni malakiheryo a Mpiipiliyani. Ni murima woothene mwiiwelele nlamulo ntokweene na “Awéla Murima,” Yehova, nave mwa mvai mukhaviherye mu “oruméla Mitchaka Yaphama ya Muluku.” (1 Pet. 1:15; Arom. 15:16) Mooniherye okhala aweela mmahiku yaala ookuchula ni ookacamiha. Hankooni oothene hiyo nikhale aweela mmeecelo ahu nave nikhaviherye olamulelo wa Mulukeu ahu aweela, Yehova.

[Nsu na vathi]

[Eruku va epaaxina 20]

Munnahela mmakupa oopacerya a okumi anyu omuhuserya Piipiliya ni Malapelo a Echoko? (Moone eparakrafo 14)