Ankeelo Taani Nave Tiheeni Awo Aneeraaya?

Yehova onachuna wi nihuserye vooloca sa emusi awe ya wirimu. Emusi yeeyo enaphitaanyerya ankeelo, yaawo aniichaniwa “anamwane a Muluku.” (Yobi 38:7) Tiheeni Piipiliya onaloceiye vooloca sa ankeelo? Tiheeni awo aneeraaya? Apwanne ankeelo oothene annapaka makupa a emusi ya Muluku?

1. Ankeelo taani?

Yehova aahaapatuxa ankeelo ahaakumve opaka elapo. Oophwanaphwana ni Muluku, ankeelo toohooneya nave anakhala wirimu. (Ahebri 1:14) Aakhalavo macikhwi a ankeelo, nave mmoha ti mmoha ookhalano mukhalelo awe. (Wupulula 5:11) Awo “annawiriyana ni weerano masu a [Yehova].” (Salumu 103:20) Khalai, vakina vaya Yehova aanaapharihela ankeelo wi elokohe michaka, waakhaviherya achu awe, ni waavuluxa alapeli awe vaavaa yaakhalaaya va yawoopiha. Olelo, ankeelo annaakhaviherya Akristu waaphwanya achu yaawo anachuna ohuserya vooloca sa Muluku.

2. Satana ni masololo awe taani?

Ankeelo akina hiyaatitelenle okhala oororomeleya wa Yehova. Munkeelo oopacerya aamwaren’ye oniichaniwa “musaserya nari Saataana, anaawoka achu eelapo yoothene.” (Wupulula 12:9) Satana aachuna waalamulela akina, mwawiihiiha aahimvolowela Atamu ni Eva nave ohoolo waya wa ankeelo akina wi ehimwiiwelele Yehova. Ankeelo yaawo oomwaryeya aniichaniwa masololo. Yehova oowiikarawo wirimu nave vano ari veelaponi, nyenya anahaala otoloxiwa.—Mwaalakhanye Wupulula 12:9, 12.

3. Ti mwawiihai Satana ni masololo aneereryaaya onihuweliha?

Satana ni masololo anneererya waahuweliha achu ancipale moorweela wa onamulosiwe, naari wiisaaciherya, yaawo ari meerelo oonanara a weererya oloca ni minepa. Ntoko yootakiherya, achu akina annaakoha mastroloku, anahako, alipa a waanyiherya, ni anamuku. Akina annaavya oloola yoowo onavolowela minepa soonanara. Achu anneerihiwa weemererya wi awo ananwerya oloca ni alipa ookhwa. Nto Yehova onnanilopola ariki: “Muhikoheke minepa sa achu ookhwa nari waakoha yaawo analapa ni seiya.” (Onamukutxho 19:31) Owo onnanivaha olopola yoola wi anikhapelele wa nthowa na Satana ni masololo. Awo ari amwiicani a Muluku, nave anchuna oneerela yoonanara.

OHUSERYA MWAWIISEELA

4. Ankeelo annaakhaviherya achu ohuserya vooloca sa Yehova

Ankeelo a Muluku hanaalaleerya achu mwawooneya. Moohiyana awo ananwerya waakhaviherya achu a Muluku waaphwanya achu yaawo anachuna ohuserya vooloca sa Muluku. Mwaalakhanye Wupulula 14:6, 7, nave voocharela muthokororye makoho ala:

• Ntakhara heeni nnachunaahu nikhaviheryo na ankeelo wi nilaleerye?

• Apwanne ennoolipihaani osuwela wi ankeelo annawerya wookhaviheryaani waaphwanya achu yaawo anachuna ohuserya vooloca sa Piipiliya? Ntakhara heeni?

5. Musepe onamulosiwe

Satana ni masololo ari amwiicani a Muluku. Awo tho ari amwiicani ahu. Mwaalakhanye Luka 9:38-42, nave voocharela muthokororye nikoho nla:

• Tiheeni masololo anaweerelaaya achu?

Hinnachuna weemererya wi masololo enivolowele. Mwaalakhanye Malamulo 18:10-12, nave voocharela muthokororye makoho ala:

• Mmikhalelo taani Satana ni masololo aneereryaaya onivolowela ni oloca ni hiyaano? Sookhovelela taani iri mwawiiwanana ni onamulosiwe iri sawunlaana weiwo munakhalaanyuwo?

• Apwanne mwaahaala wi ti yaphaama Yehova owatiiha meerelo a onamulosiwe? Ntakhara heeni?

Moone EXILEMA, nave muthokororye makoho anacharela.

EXILEMA: “Mumvaanyeke Musaserya” (5:02)

• Apwanne munoona wi ekhulula Palesa aamakelenleiye mmoononi wa mwanawe yaari yawoopiha? Ntakhara heeni?

• Tiheeni Palesa aaphwaneleiye weera wi iikhapelele wa masololo?

Ilukuluku soothene Akristu eeparipari annavaanya masololo. Mwaalakhanye Saweriwa T’arummwa 19:19 ni 1 Korinto 10:21, nave voocharela muthokororye nikoho nla:

• Ntakhara heeni oryaaya woochuneya weeyela echu yeeyo muryaanyuno eniiwanana ni onamulosiwe?

6. Mvoothe owana wanyu ni masololo

Masololo analamuleliwa ni Satana. Nyenya ankeelo oororomeleya analamuleliwa ni mutokweene a ankeelo, Mikayeli, nenla nri nsina nikina na Yesu. Ophiyerya mweeryo taani Mikayeli oreiye oowerya? Mwaalakhanye Wupulula 12:7-9, nave voocharela muthokororye makoho ala:

• Taani ori ooweryaxa? Mikayeli ni ankeelo awe naari Satana ni masololo awe?

• Munoona wi oomuchara a Yesu annaphwanela omoova Satana ni masololo awe?

Nyuwaano munanwerya ovootha owana wanyu ni Satana ni masololo awe. Mwaalakhanye Tiyako 4:7, nave voocharela muthokororye nikoho nla:

• Muni muwerye hai wiikhapelela wa nthowa na Satana ni masololo?

MUKWASU

Ankeelo oororomeleya annanikhaviherya. Satana ni masololo awe ari amwiicani a Yehova, nave awo annapharihela onamulosiwe wi yaahuwelihe achu.

Makoho awuuluulela

• Ankeelo a Yehova anaakhaviherya hai achu ohuserya sa yoowo?

• Satana ni masololo awe taani?

• Ntakhara heeni munaphwanelaanyu osepa echu vyakala eniiwanana ni onamulosiwe?

OTHOLATHOLA

Moone ntakhara heeni nnalocaahu wi Yesu ti Arkanxu Mikayeli.

“Quem é o arcanjo Miguel?” (Artigo do jw.org)

Moone sawooniherya wi Musaserya muchu okhanle, nave ohiya echu yoonanara eri mmurimani mwa muchu.

“O diabo existe?” (Artigo do jw.org)

Moone ti mwawiihai muthiyana mmoha aataphunweiye orweela wa ovolowela wa masololo.

“Ela descobriu que a vida tem objetivo” (A Sentinela, 1.º de julho de 1993)

Moone mukhalelo Satana onaphariheleiye onamulosiwe wi aahuwelihe achu.

“Eparipari Voloca sa Wiisachiherya, Olowa ni Okhwiri” (Ephiro ya Wukumini, Mwaha 5)