Mutitelele Wooniherya “Okhwelana wa Onna”!

“Mutitele okhwelana wa onna.”—AHEBRI 13:1.

MACIPO: 72, 119

MWAAHAALA WAAKHULA HAI?

Okhwelana wa onna tiheeni?

Ntakhara heeni ti woochuneya otitelela wooniherya okhwelana wa onna?

Nnii nooniherye hai okhwelana wa onna?

1, 2. Ntakhara heeni Murummwa Paulo aarepa ekaarata wa Ahepri?

MU EYAAKHA 61, miloko sa Aisarayeli saakhalano murecele. Murummwa Paulo aawaleliwa mukariposo o Roma, nyenya aanaweherya otaphuliwa. Nthamwene awe Timoteo aataphuliwa mukariposo, nave yaanaweherya waaxekurya anna o Yuteya. (Ahebri 13:23) Mu iyaakha thanu, Akiristu o Yuteya, xaxaxa yaale yaakhala o Yerusalemu, yaaphwanela weeravo echu mwawaakuveya. Ntakhara heeni? Yesu ahaaleela oomuchara awe wi yamoona Yerusalemu arukureryiwe ni akhoco, awo yaaphwanela ochawa.—Luka 21:20-24.

² Saavira iyaakha 28 vaavaa Yesu aaloponleiye oomuchara awe. Mu elukuluku yeeyo, Akiristu yaahooniherya okhala oororomeleya naamwi yiiciwa ni wiikariwa. (Ahebri 10:32-34) Paulo aachuna waareherya wa yeeyo yaahaala weereya muhoolo. Awo yaahaala okumanano yaweeha etokotoko ya nroromelo naya. (Mateu 24:20, 21; Ahebri 12:4) Yaaphwanela okhalano nroromelo, wi ewerye wiiwelela nlamulo na Yesu na ochawa nthowa nawi okumi aya waahaala orweela mu wiiwelela. (Mwaalakhanye Ahebri 10:36-39.) Yehova aamveerela Murummwa Paulo waarepela ekaarata anna ni arokora. Ekaarata yeeyo eniichaniwa liivuru a Ahebri, yaarempwe wi yaalipihe ntakhara yaweereya.

3. Ntakhara heeni nnaphwanela omwiiwexexa liivuru a Ahebri?

³ Ntoko achu a Muluku, nnaphwanela omwiiwexexa phaama liivuru a Ahebri. Ntakhara heeni ? Nthowa nawi mukhalelo ahu onalikana ni Akiristu o Yuteya. Nnakhala mu “ilukuluku sokatxamiha,” achu ancipale annahooxeya nave anniiciwa ni wiikariwa nthowa na nroromelo naya. (2 Timóteo 3:1, 12) Nyenya hiyaano ninnasiveliwa ni mikhalelo saphaama ohirivo makacamiho. Ntoko Akiristu mu elukuluku ya Paulo, nnaphwanela okhala a wiiweherya. Ntakhara heeni? Nthowa nawi nnahaala okumanano yawoopiha etokotoko enahaala weeha nroromelo nahu!—Mwaalakhanye Luka 21:34-36.

4. Tiivi eri yoorepa ya eyaakha ya 2016, nave ntakhara heeni eryaaya yoophwanelela?

⁴ Tiheeni enahaala onikhaviherya wiirehererya ntakhara yaweereya ya omwahiyu? Mu liivuru a Ahebri, Paulo oothariha ichu sincipale sinahaala onikhaviherya olipiha nroromelo nahu. Yawuupuxerya yoochuneya enaphwanyeya mu Ahebri 13:1. Ennanicenyerya eriki: “Mutitele okhwelana wa onna.” Eciciri yeela yoothanliwa wi ekhale yoorepa ya eyaakha ya 2016.

OKHWELANA WA ONNA TIHEENI?

5. Okhwelana wa onna tiheeni?

⁵ Okhwelana, naari osivela wa onna tiheeni? Masu a Ekiriki Paulo opharihenleiye anataphulela “waasivela anna.” Okhwelana wa onna waataana woolipa variyari wa achu a emusi ni asinthamwene. (Yohani 11:36) Hiyaano hanniipaka okhala anna. Oothene ahu na anna. (Mateu 23:8) Paulo oriye: “Mukhwelaneke ntoko asinna ni nsivelo na onna, munnuwaka muntxitximihoni mukina ni mukhwawe.” (Aroma 12:10) Masu yaala annooniherya wi nookhalano osivela weeparipari ni anna. Okhwelana wa onna yoowo onathipeleya mmalakiheryo Eekiristu, onnaakhaviherya achu a Muluku okhala asinthamwene eeparipari ni wiiwanana mukina ni mukhwaawe.

6. Ti mwawiihai Akiristu eeparipari aniiwexexaaya osivela wa onna?

⁶ Masu awi “okhwelana wa onna” wiiliwiili annaphwanyeya mu soolaleeryiwa sa Akiristu. Wa Ayuuta akhalai masu awi “munna” aahiwa mwaacamani naari muchu ohiri a veemusini. Nyenya haavoliheryiwa muchu ohiri Muyuuta. Ntoko Akiristu eeparipari, “munna” ti Mukiristu ori oothene eeparipari, nihipwachaka elapo onakhumeiyewo. (Aroma 10:12) Yehova onnanihusiha okhalano osivela wa onna. (1 Tesalónika 4:9) Nyenya ntakhara heeni oryaaya woochuneya wooniherya osivela wa onna?

NTAKHARA HEENI TI WOOCHUNEYA OTITELELA WOONIHERYA OSIVELA WA ONNA?

7. (a) Nthowa taani noochuneya wi nooniherye okhwelana wa onna? (b) Nthowa taani nikina nnaphwanelaahu olipiha okhwelana wa onna.

⁷ Nthowa noochuneya na wooniherya okhwelana wa onna tiwii, Yehova oonihusiha. Hinimusivela Yehova wakhala wi hannaasivela anna. (1 Yohani 4:7, 20, 21) Nthowa nikina, hiyo ninnachuna nikhaviheryo na akina xaxaxa ilukuluku sookacamiha. Vaavaa Paulo aarepenleiye Akiristu a Aheepri, owo aanasuwela wi akina yaahaala ohiya ichu saya. Yesu aahiloca wi yaahaala okhala elukuluku yookacamiha. (Marko 13:14-18; Luka 21:21-23) Elukuluku ehaakumve ophiya, Akiristu yaaphwanela olipiha osivela waya wa onna.—Aroma 12:9.

8. Tiheeni nnaphwanelaahu weera hiihaano ehaakumve ophiya yoohooxa etokotoko?

⁸ Yoohooxa etokotoko ennaacamela. (Marko 13:19; Wupulula 7:1-3) Nnahaala ochuna wiiwelela nlamulo nna: “Atxhu nyu a nloko naka, mwiwalele mpa mwanyu. Mwipithe ophiyerya elukuluku esara y’Apwiya eneraya ekhurumuwe.” (Isaiya 26:20) “Mpa” enaahiwa muloko Weekiristu. Anna yaawo nnamurumeelaahuno Yehova. Nyenya nnaphwanela weeravo echu ohiya othukumanaru. Paulo aahiwuupuxerya Akiristu a Aheepri wi yaaphwanela oceenyeryana mukina ni mukhwaawe wi yooniherye osivela ni oweerela akina yaphaama. (Ahebri 10:24, 25) Nnaphwanela olipiha osivela wahu wa onna hiihaano wi onikhaviherye ovilela mu ilukuluku sookacamiha sinoorwa omwaahiyu.

9. (a) Ikari taani nryaahuno wi nooniherye osivela wa onna? (b) Nvahe yootakiherya ti mwawiihai achu a Muluku anooniheryaaya osivela wa onna.

⁹ Nookhalano ikari wi nooniherye osivela wa onna hiihaano, ehaakumve ophiya yoohooxa etokotoko. Annihu ancipale annahooxeya nthowa na mwaacikinye, osareya wa maahi ni ipahu sikina. Akina annavilela ni wiikariwa. (Mateu 24:6-9) Nave tho aakhalavo makacamiho a othowa wa ichu soomwiilini nthowa na okhala mu elapo yeela yookacamiha. (Wupulula 6:5, 6) Vaavaa annihu anakumanaaya ni makacamiho mancipale, hiyaano ninnakhalano ikari sa wooniherya osivela wa onna. Naamwi elapo yeela ehooniheryaka osivela, nnaphwanela waasivelaka annihu. (Mateu 24:12)^[1]—Moone masu a vathi omakuchuwelo.

NNII NUNNUWIHE HAI OSIVELA WA ONNA?

10. Tiheeni nnahaalaahu othokororya hiihaano?

¹⁰ Naamwi nrino makacamiho, nnii ntitelele hai wooniherya osivela wa onna? Nnii nroromele hai wi nookhalano osivela yoowo ni annihu? Amanle oloca, “mutitele okhwelana wa onna,” owo aaromola mikhalelo soohiya hiyana Akiristu anaphwanelaaya weerano. Hankooni nthokororye ichu thanu nammoha sa seiyo.

11, 12. Onataphulela eheeni owaakhela aleco? (Moone eruku yoopacerya.)

¹¹ “Muhitxuwale owakhela aletxo.” (Mwaalakhanye Ahebri 13:2.) Masu yaala Paulo opharihenleiye anataphulela “oweerela akina epewe.” Masu yaala annanuupuxerya yaweereya ya Aaparahamu ni Looti. Alopwana yaala yaahooniherya epewe wa aleco yaawo yahaasuwenlaaya. Ohoolo waaya, Aaparahamu ni Looti yaahoona wi aleco awo yaari Ankeelo. (Maphatxuwelo 18:2-5; 19:1-3) Sootakiherya seiya saahaaceenyerya Akiristu a Aheepri wooniherya osivela wa onna moorweela wa owaakhela aleco.

¹² Nnii nooniherye hai owaakhela aleco? Moorweela wa waawopa anna ni arokora wi nlyeno vamoha vaate vahu naari waahakararya. Naamwi nihimusuwenle ooweherya aweececa ni mwaariye nnawerya onwopa vaavaa onaxekuryeiye muloko ahu. (3 Yohani 5-8) Hori woochuneya waavya ichu sawaaca wi nimwaakheleno. Yoolakelelaahu ori waahakararya annihu, ohiya waacapariha ichu nryaahuno. Hannaphwanela waawopa yaala arino ichu niweheryaka wi eniwope. (Luka 10:42; 14:12-14) Echu yoochuneya ti yawii nihicuwale owaakhela aleco!

13, 14. Nnii ‘niwupuweleke alipa òwaleliwa mukalaposo’ mwawiihai?

¹³ “N’wupuweleke alipa òwaleliwa mukalaposo.” (Mwaalakhanye Ahebri 13:3.) Vaavaa Paulo aarempeiye masu yaala, aaloca yaawo yaari mukariposo nthowa na nroromelo naya. Paulo aahithamalela muloko ntakhara ‘yàhuka masoso a yale yari mukaliposo.’ (Ahebri 10:34) Anna akina yaamukhaviherya Paulo vaavaa aareiye mukariposo iyaakha xexe, nyenya akina yaamanke ociiwene. Awo yaahaala omukhaviherya hai Paulo? Awo yaaphwanela ovekelaka moohihiyererya ntakhara yoowo.—Filipi 1:12-14, Ahebri 13:18, 19.

¹⁴ Olelo, anamoona a Yehova ancipale annawaleliwa nthowa na nroromelo naya. Anna ni arokora awaacamela ananwerya waakhaviherya ni ichu aryaayano. Ancipale a hiyo nri oorakamela ni anna yaawo ari mukariposo. Nnii naakhaviherye hai? Waasivela anna onahaala onceenyerya ovekela moohihiyererya ntakhara yaawo. Ntoko yootakiherya, nnanwerya waavekelela anna, arokora ni anamwane yaawo ari mukariposo o Eritrea, ophitaanyerya annihu Paulos Eyassu, Isaac Mogos, ni Negede Teklemariam, yaawo ari mukariposo mu iyaakha 20.

15. Nnii ncicimihe hai othela wahu?

¹⁵ “Othelana okhale wotxitximihiwa ti atxhu othene”. (Mwaalakhanye Ahebri 13:4.) Nnanwerya wooniherya osivela wa onna moorwela wa okhalano meecelo aweela. (1 Timóteo 5:1, 2) Ntoko yootakiherya, yakhala wi noopaka mararuwo ni munna naari murokora naahaala ompahula muchu yoowo ni emusi awe. Nroromelo nryaahuno ni annihu naahaala omwaryeya. (1 Tesalónika 4:3-8) Mwaanyiherye ti mwawiihai muthiyana aahaaleiye wuupuwela waakhanle wi aiyawe annoona epwitikiri. Apwanne ahaala wuupuwela wi aiyawe annamusivela nave annacicimiha othela waya?—Mateu 5:28.

16. Ohakalala onanikhaviherya mwawiihai okhalano osivela wa onna?

¹⁶ “Muhakalale ni yeyo muryanyuno.” (Mwaalakhanye Ahebri 13:5.) Omuroromela Yehova onnanikhaviherya ohakalala, eyo tiwii, ohakalalela ni ichu nryaahuno. Eyo enakhaviherya hai okhalano osivela wa onna? Vaavaa nnahakalalaahu, nnahaala owuupuwela annihu wi toochuneya opwaha ikhorowa. (1 Timóteo 6:6-8) Hiyaano haniikhupanyeryaka nthowa na annihu naari mukhalelo wa okumi ahu. Hinikhalano nrima naari wiirumiha. Opwaha yeeyo vaavaa nnahakalalaahu, nnahaala wooniheryaka mahala. —1 Timóteo 6:17-19.

17. Olipa murima enanikhaviherya hai wooniherya osivela wa onna?

¹⁷ “Olipa murima.” (Mwaalakhanye Ahebri 13:6.) Omuroromela Yehova onnanikhaviherya okhala oolipa murima mu ilukuluku sookacamiha. Olipa murima onnaneeriha okhalano moonelo waphaama. Mukhalelo yoowo, onnanikhaviherya waaceenyerya annihu ni waalipiha. (1 Tesalónika 5:14, 15) Mu yoohooxa etokotoko, nnamukhala oolipa murima nsuwelaka wi ovuluxiwa wahu ti weeparipari.—Luka 21:25-28.

18. Nnii nlipihe hai osivela wahu ntakhara atokweene a muloko?

¹⁸ “N’wupuwele aholi anyu.” (Mwaalakhanye Ahebri 13:7, 17.) Atokweene a muloko ahu annapharihela elukuluku aya elapaka mwakuru ntakhara hiyo. Vaavaa nnuupuwelaahu ichu soothene anapakaaya, osivela ni waathamalela wahu onahaala wunnuwa. Hinnachuna weera echu enahaala waakacamiha naari waayeleeliha ohakalala waya. Ohiya yeeyo, nnaphwanela owiiwelelaka. Nnaphwanela ‘wakhapelelaka yawo ni ntxitximiho nothene ni okhwela wa nthowa na muteko aryayano.’—1 Tesalónika 5:13.

MUTITELELE WEERANO

19, 20. Nnii ntitelele hai wooniherya okhwelana wa onna?

¹⁹ Achu a Yehova aasuweliwa ntakhara osivela waya wa onna. Ti yeeyo yeren’ye mu elukuluku ya Paulo. Nyenya Paulo aahaaceenyerya anna wi yaaphwanela otitelela wooniherya osivela wa onna. Owo aaloca: “Munnuweke wopwaha.” (1 Tesalónika 4:9, 10) Chiryene, aakhalavo makupa anaphwanela orehereryiwa!

²⁰ Naawehaka yoorepa ya eyaakha mu Empa ya Omwene variyari va eyaakha, hankooni nuupuwele makoho ala: Kinii kaaceererye hai oowaakhela aleco? Kinii kaakhaviherye hai annihu ari mukariposo? Kinnacicimiha marehereryo a Muluku a othela? Tiheeni enahaala okikhaviherya waacererya ohakalala? Kinahaala omuroromela Yehova mwawiihai? Kinahaala owiiwelelaka atokweene mmukhalelo taani? Wakhala wi ninniilipixerya ochariha makhalelo yaala mathanu nammoha, yoorepa ya eyaakha hekhala eneneeryo ya exiri, nyenya enahaala onuupuxerya masu a Paulo: “Mutitele okhwelana wa onna.”—Ahebri 13:1.

[Masu a vathi]

[Yooleeliherya va epaaxina 7]

Yoorepa ahu ya eyaakha ya 2016: “Mutitele okhwelana wa onna.”—Ahebri 13:1

[Eruku va epaaxina 10]

Nyuwaano munnathamalela muteko atokweene anapharaaya ntakhara hiyo? (Moone eparakrafu 18)

[Ekaaxa va epaaxina 11]

MASU ATHARIHIWE

Okhwelana wa onna: Waataana woolipa variyari wa achu a emusi ni asinthamwene Hiyaano hanniipaka okhala anna. Oothene na anna