Mukooke Nave ‘Mwaalipiheke Asinna’ Anyu

PETRO aahinla ni osooseya murima amanle omukhooca Yesu. Naamwi murummwa owo aahaala wiilipixerya wi akookele okhala oophimelela mmunepani, Yesu aachuna ompharihela yoowo wi aakhaviherye akina. Nto, Yesu aamuleela: “Weyano, warukunusà murima, walipiheke asinna à.” (Luka 22:32, 54-62; BNM.) Petro aakhala nivaca na muloko Weekiristu mu nsana noopacerya. (Akal. 2:9) Moolikana, mulopwana yoowo aarumeela ntoko mutokweene khalai ti wooweryeya okookela wanawiili oteexa murici yoowo ni opuha ohakalala mu waalipiha anna mmunepani.

Akina yaawo yaarumeela ntoko atokweene khalai evinyaka eyeleela, eyo ennaweeriha wiisoona okhala oohiphwanelela. Yulio,a yoowo aarumeenle ntoko mutokweene iyaakha 20 o Amerika oohico, aaloca: “Orehererya miyaha, waaxekurya anna, ni waakukhula achu a mmulokoni yaanapaka makupa a okumi aka! Mootutuxa kaayeleela, eyo yaahiya nlaka ntokweene mu okumi aka. Chiryene, eyo yaari elukuluku yookacamiha.” Olelo, Yulio onnarumeela wanaawiili ntoko mutokweene.

“MONEKE NTOKO OHAKALALA WAWÀKHWANELA”

Murummwa Yaakopo aarepa: “Moneke ntoko ohakalala wawàkhwanela, asinnaka, mwaphwanyaka wereryiwa otokotoko.” (Tiy. 1:2; BNM.) Yaakopo aaloca makacamiho yaawo anakhumelela nthowa na wiikariwa ni ohiphaameya wahu. Owo aaromola minkhela sa mwiili, wooniherya nthalu, ni sikina. (Yak. 1:14; 2:1; 4:1, 2, 11) Vaavaa Yehova onanlakeiye, enakhala echu yawiicela. (Ahe. 12:11) Nyenya makacamiho yaawo hanaphwanela omaliha ohakalala wahu.

Wakhala wi nooyeleela mirici mmulokoni, nlelo nookhalano ekari ya waalikhela mukhalelo wa nroromelo nahu ni wooniherya omusivela wahu Yehova. Hiyaano nnanwerya tho wuupuwelela ntakhara heeni naarumeelaahu. Naarumeela wi niiphwanyerye mukhatiihu, naari yaaneeriha wiilipixerya waari omusivela wahu Muluku ni olekecheya wahu wi muloko onarweela wa yoowo nave muloko owo onaphwanela okhapeleliwa phaama? (Saw. 20:28-30) Atokweene ayelenle murici aya nave anatitelela orumeela moohakalala annooniherya wa oothene, ophitaanyerya Satana, wi omusivela waya Yehova ti weeparipari.

Vaavaa Mwene Tavite aalakiweiye nthowa na opaka soocheka itokotoko, owo aheemererya yoolaka eyo nave aakhurumuweliwa. Tavite aahiipa: “Óréla mutchu yowo okhurumuweliwe yotchekáwe; ekhunéliwa yonanaráwe. Óréla mutchu yoowo Yehova ohinamwalakhanyeryiye marapwáwe nave m’munepani mwawe himwamomo owoka.” (Sal. 32:1, 2) Yoolaka yaamurehererya Tavite ni omukhaviherya owo okhala mukukhula aphaama aachu a Muluku.

Wiiliwiili, anna yaawo anakookela orumeela ntoko atokweene, annakhala akukhula aphaamaxa opwaha wuupaceryani. “Vano kinniiwexexa phaama mukhalelo wa waathokororya yaale anahesa,” aaloca mutokweene mmoha. Mutokweene mukina aaloca: “Vano kinnacicimiha vancipale murici wa waarumeela anna.”

NYUWAANO MUNANWERYA OKOOKA?

“[Yehova] harwa-aványa mahiku othene,” aaloca namarepa a salmo. (Sal. 103:9) Hiyaano hinnaphwanela wuupuwela wi Muluku harwa akookela omuroromela muchu yoowo aapanke yoocheka etokotoko. “Miyaano kaasooseya murima ni oceecheya nthowa na yoohesa aka,” onnaloca Rikarto yoowo aayeleenle murici awe wa okhala mutokweene amanle orumeela mu iyaakha sincipale. “Mu elukuluku yincipale, muupuwelo woohiphwanelela waanakihiiha okookela waarumeela anna ntoko mutokweene. Miyaano kaayeleela nroromelo wi kahaala okookela okhala oororomeleya. Nyenya ovinyerya vaavaa kaanasiveliwa waakhaviherya akina, kaanawerya weeciha soohuserya sa Piipiliya, waalipiha anna mu Empa ya Omwene, ni olapa ni yaawo mmuteko wa mmacani. Eyo yaakikhaviherya olipiha nroromelo naka, nave vano kookookela orumeela ntoko mutokweene.”

Okuha mathowa enanwerya omuhiiha munna orumeela ntoko mutokweene. Ti yaphaama okhala ntoko Tavite kapuro a Yehova, yoowo aachanwe ehace ya Mwene Sawuli! Tavite aakhooca winla ikuhu ni Sawuli, naamwi aarino ikari sa weerano yeeyo. (1 Sam. 24:4-7; 26:8-12) Vaavaa Sawuli aakhwileiye okhoconi, Tavite aahinla, nthowa na okhwa wa Sawuli vamoha ni mwanawe Yonata; owo aahaaromola awo ntoko achu ‘òkhweleya ni òrèra.’ (2 Sam. 1:21-23, BNM.) Tavite haakunhe mathowa.

Wakhala wi nyuwaano munoona wi hamwiiwexexiwe naari hamweereliwe ekhaikhai, muheemererye wi okuha mathowa ovolowele muupuwelo anyu. Ntoko yootakiherya, vaavaa Wiliyamu aayeleenleiye murici awe ntoko mutokweene amanle orumeela iyaakha 30 o Krapretanya, owo aakuha mathowa wa atokweene akina. Tiheeni yaamukhavihenrye Wiliyamu okhala oophimelela? Owo aaloca, “Omwaalakhanya liivuru a Yupu waakilipiha. Wakhala wi Yehova aamukhaviherya Yupu opaka murecele ni asinthamwene awe araru, Owo onahaala okikhaviherya opaka murecele ni atokweene Eekiristu!”​—Yupu 42:7-9.

MULUKU ONNAAREELIHA YAALE ANAKOOKELA ORUMEELA NTOKO AKUKHULA

Wakhala wi nyuwaano moothanla ohiya okukhula muhuwo wa Muluku, yaahaala okhala yaphaama othokororya ntakhara heeni. Mano mwaari mulimeliwa ni makacamiho anyu? Apwanne ichu ikina saari soochuneya mu okumi anyu? Mwaari muceeceya ni soohiphaameya sa akina? Mmukhalelo ori woothene, muupuwele wi nyuwaano mwaakhalano murici wa waakhaviherya akina mmikhalelo soohiyanahiyana vaavaa mwaarumeelaanyu ntoko mutokweene. Miyaha sanyu saanaalipiha anna, yootakiherya anyu yaanaahakalaliha, nave oxekurya wanyu wa okukhula waanaakhaviherya ovootha makacamiho aya. Muteko anyu ntoko mutokweene oororomeleya waanahakalaliha murima wa Yehova, hiihaa ntoko wannyu.​—Masi. 27:11.

Yehova onnaakhaviherya alopwana wi ekookele ophwanya ohakalala waya ni nchuno naya na ohoolela mmulokoni. Wakhala wi moohiya naari mooyeleela murici wa orumeela ntoko mutokweene, nyuwaano munanwerya wiilipixerya wi mukookele okhala “mulipa-oweherya.” (1 Tim. 3:1) Paulo ‘hahiyale othamala ni ovekela’ wi Akiristu Akolose esareye ni nsuweliho nawaakhwanela na yookhwela ya Muluku ‘wi yeceke womphwanelela Apwiya omutheiha mothemwene’mmo’. (Akol. 1:9, 10) Wakhala wi nyuwo moovahiwa wanawiili murici wa orumeela ntoko mutokweene, mumveke Yehova wi oovaheeni ikuru, opisa murima, ni ohakalala. Mmahiku yaala ookuchula, achu a Muluku annachuna nikhaviheryo noomunepani na akukhula oosivela. Nyuwaano munanwerya nave munnachuna waalipiha asinna anyu?

[Nsu na vathi]