Ireferensiya Inaphwanyeya va Yoochariha ya Muthukumano Okumi ni Muteko Ahu Weekristu
7-13 A OTUPURU
MUHAKHU WA MASU A MULUKU | TIYAKO 3-5
“Mooniheryeke Miruku sa Muluku”
(Tiyako 3:17) Nto miruku yoorweela wirimu ti yaweela, voocharavo ti ya murecele, ti yooleva, yooleeleya, yoosareya ikharari ni sawiima saphaama, yoohikhalano nthalu ni yoohiwoka.
cl ipaax. 221-222 ipar. 9-10
Munnapharihela Muteko “Miruku Yoorweela Wirimu”?
“Ti yaweela.” Okhala a weela onataphulela ohikhalano nthepa naari yooriipiheya. Okhala aweela vaate vamoha ni omuchu ahu wampuwa. Piipiliya onaloca wi wookhalavo wiiwanana variyari va miruku vamoha ni murima, nyenya miruku hinnawerya ovolowa ophiyerya otannya murima yoowo ovoloweliwe ni mawuupuwelo ooripiheya, soochuna ni soolakelela soonanara. (Masi 2:10; Mat 15:19, 20) Nyenya, wakhala wi murima ahu ti waweela—ela tiwi, ophiyerya mweeryo yoowo ori woowereya wa achu oohiphaameya—nnahaala ‘omwalanano yoonanara, [ni] weera yaphaama.’ (Sal 37:27; Masi 3:7) Hamunoona wi ti woophwanelela okuha weela mu nipuro noopacerya wa elista wa mikhalelo sa miruku? Opwaha soothene, wakhala wi hinri aweela omwiilini ni omunepani, nni niwerya hai wooniherya mikhalelo mikina sa miruku inarweela wirimu?
“Voocharavo ti ya murecele.” Miruku inarweela wirimu sinnanceenyerya otikitherya murecele, yoowo ori yawiima ya munepa wa Muluku. (Gal 5:22) Ninniilipixerya wi nihinanarihe “olucelelana wa murecele” onawiiwananiha achu a Yehova. (Éfe 4:3) Nave tho ninnapaka owetha wahu wi ntikitherye murecele wakhala wi wohaakanyeryeya. Ntakhara heeni ti woochuneya? Piipiliya oni: “Khalani mmureceleni, nave Muluku a osivela ni a murecele akakhala ni nyuwo.” (2 Kor 13:11) Mwawiihiiha, wakhala wi ninnatitelela okhala a murecele, Muluku a murecele onamukhalaka ni hiyaano. Mukhalelo nnaakhalihaahu Akristu akhwiihu onnavolowela onthamwene ahu ni Yehova. Nni nooniherye hai wi naachu anaavya otikitherya murecele? Moone yootakiherya emoha.
(Tiyako 3:17) Nto miruku yoorweela wirimu ti yaweela, voocharavo ti ya murecele, ti yooleva, yooleeleya, yoosareya ikharari ni sawiima saphaama, yoohikhalano nthalu ni yoohiwoka.
cl ipaax. 223-224 epara. 12
Munnapharihela Muteko “Miruku Yoorweela Wirimu”?
“Ti yooleva.” Onataphulela eheeni okhala ooleva? Mwawiiwanana ni alipa oohuserya, masu Ekiriki awi “oleva” mu Tiyako 3:17 toovila otaphulela. Alipa ootaphulela akina apharihenle masu ntoko “wiyeviha,” ni “mahala.” Masu awaaceererya mu Piipiliya Tradução do Novo Mundo anooniherya wi yootaphulela ya masu yaala ti “oleva.” Nni nooniherye hai wi ninnapharihela mukhalelo yoola wa miruku inarweela wirimu?
cl ipaax. 224-225 ipar. 14-15
Munnapharihela Muteko “Miruku Yoorweela Wirimu”?
“Yooleeleya.” Masu Ekiriki ataphuleliwe ntoko “yooleeleya” hanaphwanyeya mmakupa makina a Soorempwa sa Nlakano Nahiihaano. Mwawiiwanana ni mulipa oohuserya mmoha, masu ala “wiiliwiili anaphariheliwa wa atoropa.” Masu ala anataphulela muchu “awaakuva olekecheya” ni “wiiwelela muchu ahaakanhe.” Muchu onahooleliwa ni miruku inarweela wirimu onniiwelela mwawaakuveya yeeyo Soorepa inalocaaya. Hanasuweliwa ntoko muchu onapacerya opaka yoolakelela awe nave anakhooca okhaviherya yoowo ohiniiwanana ni yoolakelela awe. Moohiyana, owo tawaakuveya otoroka yoolakelela awe wakhala wi Soorepa sinnooniherya vanlakani vene wi moonelo naari mukhalelo awe ti wooheseya. Apwanne achu akina oosuwenleni hiiha?
“Yoosareya Ikharari ni Sawiima Saphaama”
“Yoosareya ikharari ni sawiima saphaama.” Ikharari makupa oochuneya a miruku sa wirimu, seiho inalociwa ntoko wi “yoosareya ikharari.” Moone wi “ikharari” ni “sawiima saphaama” sinalociwa vamoha. Ela enniiwanana, woona wi Mpiipiliyani, wiiliwiili ikharari sinooniherya meerelo a waakhaviherya akina, ikharari seiho sinamweeriha muchu weera ichu sincipale saphaama. Liivuru mmoha onnathariha ntoko “okhala awuukhuwa nthowa na ohooxeya wa akina ni weeravo echu wi muchu akhaviherye.” Mmukhalelo yoola, miruku sa wirimu tahi sooriirya naari okhala ntoko miruku sa achu. Moohiyana, iho ti soolucuwa, ni soothananela. Nni nooniherye hai wi noosareyano ikharari?
(Tiyako 3:17) Nto miruku yoorweela wirimu ti yaweela, voocharavo ti ya murecele, ti yooleva, yooleeleya, yoosareya ikharari ni sawiima saphaama, yoohikhalano nthalu ni yoohiwoka.
cl ipaax. 226-227 ipar. 18-19
Munnapharihela Muteko “Miruku Yoorweela Wirimu”?
“Yoohikhalano nthalu.” Miruku sa Muluku sinnavaha ikuru wi niweryeke ovootha nthalu ni wiirumiha nthowa na nihimo. Wakhala wi ninnahooleliwa ni miruku seiho, ninnaphola mmurimani mwahu mathitimanelo oothene a wooniherya nthalu. (Tiy 2:9) Hinnahaala waakhalihaka akina mmukhalelo wavameekhaaya nthowa na ohuserya waya, makhalelo aya, sookhalano, naari mirici sa mmulokoni; naari tho hinnahaala waathanya Akristu akhwiihu, moohipwacha yaari oohaawa naari hooye. Woona wi Yehova onnooniherya osivela wawe ntakhara yaawo, moohikhwa minikwa hiyaano tho nnaphwanela wooniherya waasivela wahu.
“Yoohiwoka.” Masu awi “yoohiwoka” mu elocelo ya Ekriki annanwerya ophariheliwa wa muchu “yoole onapaka makupa mu etiyaatru.” Mmahiku akhalai, Akriki ni Aroma yaawo yaapaka itiyaatru yaanaawara amaaskara vaavaa yaaperekhaaya itiyaatru. Mwawiihiiha, masu a Ekiriki awi “yoohiiwoka” yaanaphariheliwa wa yoole oniipaka naari wiisootherya. Mukhalelo ola wa miruku sa Muluku tahi wi pahiru sinavolowela mukhalelo nnaakhalihaahu Akristu akhwiihu, nyenya tho mukhalelo nnawoonaahu.
Mphwanye Muhakhu Woomunepani
(Tiyako 4:5) Akhweya munnaanyiherya wi soorempwa inaloca mahaleene wi Munepa yoowo onakhala mwa hiyo onnanikhwela ophiyerya onanikhalela ehace?
w08 15/11 epaax. 20 epara. 6
Miyaha sa Vasulu Sinarweela mu Ekaarata ya Tiyako ni Pedro
4:5—Yoorepa taani Tiyako aaromonleiye? Tahi wi Tiyako onaromola eversikulu emoha yawooneya. Masu ala ooveereliwa ni Muluku akhweya anathipeleya mu mahusiheryo anooniheryiwa mu Soorepa ntoko Maphatxuwelo 6:5; 8:21; Masiposipo 21:10; ni Galasya 5:17.
(Tiyako 4:11, 12) Asinnaka, muhilocaneke moonanara mukina ni mukhweiye. Yoowo onamuloca mukhweiye moonanara nari omuthoriha, onaloca ni othoriha moonanara malamulo. Nto waathorihaka malamulo, honachariha; oniiseera oothoriha malamulo yaawo. Mulipa oopaka malamulo ni othoriha, ori mmoharu, ti yoowo onawerya ovulusha ni otholosha. Weyo waani, onamuthoriha mukhwaa?
w97 15/11 ipaax. 20-21 epara. 8
Nroromelo Ninnaneeriha Okhala Oovilela ni Ovekela
Ti yoocheka omuloca moonanara Mukristu mukhwiihu. (Tiy 4:11, 12) Nyenya akina annaaloca moonanara Akristu akhwaaya, akhweya nthowa na sookhovelela saya naari nthowa nawi anachuna wiirumiha moorweela wa waanyemula akina. (Sal 50:20; Masi 3:29) Masu awi ‘oloca moonanara’ mu elocelo ya Ekiriki anooniherya masu oonyemula naari omootherya muchu mukina. Ela enataphulela omuthoriha munnihu moonanara. Mmukhalelo taani iwo oryaaya “othoriha moonanara malamulo” a Muluku? Tiwi, alipa oorepa ni Afarisi hiyaathokororya malamulo a Muluku nave yaathoriha mwawiiwanana ni moonelo aya. (Mar 7:1-13) Moolikana, wakhala wi ninnamuthoriha munna yoowo Yehova aahihaaleiye omuthoriha, tahi emohamoha “othoriha moonanara malamulo” a Muluku nooniheryaka wi awo toohiphwanelela mmukhalelo woochekeya? Nave wakhala wi ninnamuthoriha munna, hiniwerya waakhwaniha nlamulo na osivela.—Aro 13:8-10.
14-20 A OTUPURU
MUHAKHU WA MASU A MULUKU | 1 PEDRO 1-2
“Mukhaleke Aweela”
(1 Pedro 1:14, 15) Ntoko anamwane awiiwelela, muhichariheke minkhela sanyu mwaaraanyuno khalayi moohisuwela. Vawi yoowo owiichanneeni ori aweela murima, nyuwo tho khalani aweela murima mmakhalelo anyu oothene,
Woopola Yoovaha ‘Yawakhwanela’ Enarweela wa Atiithi
Nnooniherya hai wi ninnasivela nsina na Yehova? Moorweela wa meecelo ahu. Yehova onakhwela wi nikhale aweela. (Mwaalakhanye 1 Pedro 1:15, 16.) Ela enataphulela wi nimulapele yooworu pahi ni omwiiwelela ni murima ahu woothene. Naamwi niikariwaka, nipake owetha wahu wi nikhale mmukhalelo Yehova onanihusiheiye. Moorweela wa okhala mwawiiwanana ni malakiheryo a Yehova, ninnaruuha ncicimiho wa nsina nawe. (Mat 5:14-16) Ninnooniherya wi malamulo awe taphaama nave Satana mulipa awootha. Hiyaano hanri oophaameya, mwawiihiiha nnahaala ohesaka. Nto wakhala wi noohesa, ninnacharuwa nave ninnawetha wi nihiye weera ichu seiyo sinanyemula nsina na Yehova.—Sal 79:9.
(1 Pedro 1:16) Ntakhara yoorempwa: “mukhaleke aweela ntakhara miyo tho ka aweela.”
Nni Nthanle Hai Mathatelo Ahu?
Yehova onnanleela: “Mukhaleke aweela ntakhara miyo tho ka aweela.” (1 Ped 1:14-16; 2 Ped 3:11) Pahiru Yehova onahaala weemererya malapelo ahu wakhala wi awo taweela naari oohiriipiheya. (Malam 15:21) Yehova heemererya malapelo ahu wakhala wi ninnapaka ichu seiho owo oniiceiye, ntoko ocapaheya, nlala, naari ichu inavolowela masololo. (Aro 6:12-14; 8:13) Nyenya tho malapelo ahu heni emuhakalalihe Yehova wakhala wi mathatelo ahu annavolowela ichu seiha. Iho inahaala weeriha wi malapelo ahu ekhale ooriipiheya naari oheemereryiwa wa Yehova nave enanwerya onanariha onthamwene ahu ni yoowo.
Mphwanye Muhakhu Woomunepani
(1 Pedro 1:10-12) Ovulusha wu, alipa miririmo yaaloncaaya sa mahala mwaahaalaanyu waakhela, yaahaanyiherya ni waavyavya osuwela. Munepa wa Kristu waari mwayaawo waaneerela onamoona khalayi sa ohooshiwa wa Kristu owo ni ovuwihiwa wawe muhoolo mwaya. Nto alipa a miririmo yaaneererya omusuwela muchu ene ni elukuluku enesha. Yaawo yaahuupululeliwa wi mwa ichu seiya hiyaalampe wi yiikhaviherye aneene nto yookhaviheryeeni nyuwo. Chiri, mwaaleeliwa seiya ti alipa oolaleerya michaka yaphaama, elocaka mwa Munepa Waweela yoowo orummwe ovinya wirimu. Ankeelo tho annachunasha ovarerya seiya!
w08 15/11 epaax. 21 epara. 10
Miyaha sa Vasulu Sinarweela mu Ekaarata ya Tiyako ni Pedro
1:10-12. Ankeelo yaanachuna woona vakhiviru khiviru ni wiiwexexa iparipari sawiixeela soomunepani seiho alipa a miririmu a Muluku akhalai yaarempaaya vooloca sa woocihiwa wa muloko weekristu. Naamwi hiihaa, iparipari iho pahiru saakhanle sookwakwaleya vaava Yehova aapacenryeiye ohoolela muloko weekristu. (Éfe 3:10) Apwanne hannaphwanela ochariha yootakiherya ya ankeelo ni wiilipixerya otholathola ‘ichu sawiisheela sa Muluku’?—1 Kor 2:10.
(1 Pedro 2:25) Nyuwo mwaari ntoko ipucepuche soohuwela, nto vano, mookookela wa mukukhula ni muhooleli a okumi anyu.
it-3 epaax. 658 epara. 3
Muhooleli
Muhooleli Mutokweene. Pedro oopacerya 2:25 woonaru onamuloca Isaiya 53:6 vooloca sa yaawo yaari “ntoko ipucepuche soohuwela,” nave Petro onnaloca: “Nto vano, mookookela wa mukukhula ni muhooleli a okumi anyu.” Yoorepa ela enamuloca Yehova Muluku, woona wi yaale Petro aarepenleiye hiyaahuwenle wa Kristu Yesu, nyenya, moorweela wa yoowo ti yaakookiheryiwaaya wanaawiili wa Yehova Muluku, yoowo ori Mukukhula Mutokweene a nloko nawe. (Sal 23:1; 80:1; Yer 23:3; Ezek 34:12) Yehova tho muhooleli, yoole onawerya weecelela. (Sal 17:3) Weeceleliwa (Gr., e·pi·sko·peʹ) onanwerya wiiwanana ni masu a othoriha wawiicela, ntoko mu nsana noopacerya E.K., vooloca sa Yerusalemu, yoowo aahithokoronrye elukuluku “ya weeceleliwa [Gr., e·pi·sko·pesʹ].” (Luka 19:44) Naari waanweryeya omoreliwa ikharari naari mahala, ntoko wa yaale anamucicimiha Muluku mu nihiku “noorwa wawe. [Gr., e·pi·sko·pesʹ].”—1 Ped 2:12.
21-27 A OTUPURU
MUHAKHU WA MASU A MULUKU | 1 PEDRO 3-5
“Makuchuwelo a Ichu Soothesene Ahaacamela”
(1 Pedro 4:7) Vano makuchuwelo a ichu soothesene ahaacamela. Hiihaa khalani awiisuwelela ni awiiwehererya wi nvekeleke.
w13 15/11 epaax. 3 epara. 1
“Khalani Awiisuwelela ni Awiiwehererya wi Nvekeleke”
“ELUKULUKU eri yoovila otitelela okhala oowehererya ori ohalaka vakhaani oxavo,” aaloca mulopwana mmoha onalapa noohiyu. Woonaru, akina tho yaawo intonko olapa ohiyu woothene anahaala weemererya masu yaala. Mmahiku ahu yaala Akristu annahoolela makacamiho oolikana, woona wi mukhalelo woonanara wa Satana, onalikana ni ohiyu woorakama, ori omakuchuweloni waya. (Aro 13:12) Chiryene, yaahaala okhala yawoopiha wa hiyaano wakhala wi noopacerya orupa mu elukuluku yeela yookuchula! Ti woochuneyaxa ‘okhala awiisuwelela’ ni wiiwelela ekano ya Mpiipiliyani ya okhala “awiiwehererya” ni ‘ovekela.’—1 Ped 4:7.
(1 Pedro 4:8) Voopwaha soothesene, mutitelele okhwelana mukina ni mukhweiye, ntakhara osivela onnuuheela waaca wa soocheka.
w99 15/4 epaax. 22 epara. 3
Nni Nsuwele Hai ni Ovootha Yooceecheiha Yoomunepani
Wookuchulani, muupuweleke olopola woosivela wa murummwa Pedro: “Vano makuchuwelo a ichu soothesene ahaacamela; hiihaa khalani awiisuwelela ni awiirehererya wi nvekeleke. Voopwaha soothesene, mutitelele okhwelana mukina ni mukhweiye, ntakhara osivela onnuuheela waaca wa soocheka.” (1 Ped 4:7, 8) Ti wookhweya weemererya wi ohiphaameya—wa achu akina ni wawihu—ovolowele murima ahu ni muupuwelo ahu ophiyerya okhala ntoko yookwaculiha, naari nluku nookwaculiha. Satana oosuwela phaama ooceecheya wa achu. Mavyakelo onaphariheleiye wi avoothe ori waakawanya achu. Va nthowa na yeeyo, nnaphwanela okhala awaakuveya wuuheela soohesa seiho moorweela wa osivelana mukina ni mukhwaawe ‘wi nihimvahe nipuro Musaserya.’—Éfe 4:25-27.
(1 Pedro 4:9) Mukina akhala muleco, mwaakhelaneke muhaapanaka.
w18.03 ipaax. 15-16 ipar. 2-3
Ti Woohakalaliha Waahayiha Aleco!
Echu emoha Petro aavenkeiye annawe opaka waari ‘ohayihana mukina ni mukhwawe.’ (1 Ped 4:9, NN) Mu Ekriki nsu nawi “ohayihana” nnataphulela “waasivela, naari wooniherya mahala wa anamarwa.” Nyenya Petro aahaaceenyerya anna ni arokorawe wi ehayihaneke “mukina ni mukhwawe,” naamwi yaasuwelanne ni opaka ichu vamoha. Mano waahayiha aleco waakhavihenrye hai?
Eyo yaahaala owaacameliha ni yaawo. Hanka nyuwaano? Apwanne munnuupuwela elukuluku yoohakalaliha vaavaa muchu mukina oowompeiyeni wi muye owannyawe? Nave vaavaa mwanwompaanyu muchu wi aphiye owannyu, mwaahisuwelana phaama. Mukhalelo waphaama wa waasuwela anna ni arokorahu ori waahayiha. Akristu yaakhala mu elukuluku ya Petro waanachuneya okhala vamoha vaavaa makacamiho yaatempaaya. Mmahiku yaala “òmaliherya” nnaphwanela opaka emohamoha.—2 Tim 3:1.
Mphwanye Muhakhu Woomunepani
(1 Pedro 3:19, 20) Mwa munepa tho aaya olaleerya minepa saaphariwe, 20 seiyo khalayi saari soohiiwelela, Muluku aavilenleno mmahiku a Noowa, arikimpakiwa mwaaceya. Yoowo achu a vakhaani, ti wi athanu nararu, tiyaavulushiwaayamo mwa maahi.
w13 15/6 epaax. 23
Makoho a Alipa Waalakhanya
Piipiliya Onnaloca wi Yesu “Olaleerya Minepa Saaphariwe.” (1 Ped 3:19) Ela Enataphulela Eheeni?
▪ Mwawiiwanana ni murummwa Pedro, minepa iho saari seiho khalai “saari soohiiwelela, Muluku aavilenleno mmahiku a Noowa.” (1 Ped 3:20) Mweeparipari, Pedro onaloca sa soopatuxiwa soomunepani seiho saathanlile okhala vamoha ni Satana mu omwareya. Yuda onnaaloca ankeelo “yaawo yahaakhapelenle makhalelo aya oopacerya, ehiya nipuro naya nenle nookhalavo,” wi Apwiya Muluku “yaahaawalela mwiipiphini, emakiwe ni mithipo soohimala ophiyerya nihiku ntokotoko na othoriha.”—Yuda 6.
Mmukhalelo taani soopatuxiwa soomunepani saamwaren’yaaya mmahiku a Nowa? Ehaakumve maahi mancipale, soopatuxiwa seiha soonanara saahiitatuxa ikhala ntoko alopwana—echu yeeyo Muluku aahilakelenleiye wa yaawo. (Map 6:2, 4) Ohiya yeeyoru, nthowa na oraruwa ni athiyana, eyo yaari echu yoothanyeya. Muluku haapatunxe ankeelo wi epakeke sa mwiikho ni athiyana. (Map 5:2) Ankeelo yaala oonanara ni oohiiwelela, anahaala otoloxiwa mu elukuluku yoophwanelela ya Muluku. Nyenya hiihaano, ntoko Yuda olonceiye, awo akhanle ntoko “mwiipiphini”—ekaripooso yoomunepani, nloce hiihaa.
Ti liini nave ti mwawiihai Yesu aalalenryeiye wa “minepa saaphariwe”? Pedro orempe wi eyo yeeren’ye Yesu ahaakumve ‘okhala mukumi mwa munepa.’ (1 Ped 3:18, 19) Woona wi Pedro opharihenle masu emanle weereya, ennooniherya wi olaleerya iwo weeren’ye Pedro ahaakumve orepa ekaarata awe yoopacerya. Mwawiihiiha, ela yeeren’ye Yesu amanle oviihiwa mookhwani, elukuluku yeeyo Yesu taalaleenryeiye wa minepa soonanara vooloca sa olakiwa woohimala anahaalaaya waakhela. Iwo tahi waari olaleerya wi yaahaala okhalano ewehereryo yaphaama. Iwo waari olaleerya wa othoriha. (Yona 1:1, 2) Woona wi Yesu aatitelela okhala ororomeleya ophiyerya okhwa ni oviihiwa mookhwani—owo aahooniherya wi yoolakelela ya Musaserya hiyaarino owerya mwa yoowo—Yesu aakhalano mathipelo a olaleya othoriha weiwo.—Yoh 14:30; 16:8-11.
Omwaahiyu, Yesu onahaala ommaka Satana vamoha ni ankeelo awe ni waavonyerya omukotini wawiisawo. (Luka 8:30, 31; Wup 20:1-3) Ophiyerya elukuluku yeeyo, soopatuxiwa iha soohiiwelela iri mmukhalelo wa epiiphi etokweene yoomunepani, nave otoloxiwa waya wookuchula onahaala weereya chiryene.—Wup 20:7-10.
(1 Pedro 4:6) Wanthowa nenla, michaka yaphaama yoolaleeriwa wa achu vano akhwile; nari ethorihiwe mmwiilini vamiithoni wa achu, yaawo enii erwe ekhale akumi mwa munepa vamiithoni wa Muluku.
w08 15/11 epaax. 21 epara. 8
Miyaha sa Vasulu Sinarweela mu Ekaarata ya Tiyako ni Pedro
4:6—“Akhwile” anaahiwa taani yaawo yaalaleereliwe “michaka yaphaama”? Ala anaahiwa yaale yaari ‘ookhweene mu ohiiwelela waya ni soocheka saya’ ela tiwi, ookhwa omunepani, ehaakumve owiriyana michaka yaphaama. (Éfe 2:1) Nyenya, emanle ororomela michaka yaphaama, awo annakhala “akumi” omunepani.
28 A OTUPURU–3 A NOVEMPURU
MUHAKHU WA MASU A MULUKU | 2 PEDRO 1-3
“‘Mwaakuviheke Orwa wa Nihiku na Muluku’”
(2 Pedro 3:9, 10) Tahi wi Apwiya anamulekela okhwaaniherya yeeyo aroromelinhaaya, ntoko akina anaanyiheryaaya. Nto awo anamoovilelaani; hanachuna wi mmoha a nyuwo atholowe, nto wi oothene ephiye wuucharuwani. 10 Nihiku na Apwiya, nnii niphiye mootutusha ntoko mpava. Nihiku nenlo erimu enamviihiwavo ni oruma otokotoko nave sa wirimu inamutothowa ni oviha wa mooro. Elapo ya vathi ni miteko seeriwemo inamuupululeya.
w06 15/12 epaax. 27 epara. 11
Yehova Onahaala ‘Waakiha ni Wookolola Ichu’
Nyenya nnaphwanela wiiwexexaka hai yoororomeliha ya Yesu wi Yehova onahaala otikitherya ekhaikhai “mwamvayi”? Masu a Muluku anooniherya wi naamwi ‘alekelakasha waakhula’ owo onahaala otikitherya ekhaikhai awe mwawaakuveya wakhala wi elukuluku awe yoophiya. (Luka 18:7, 8; 2 Ped 3:9, 10) Mmahiku a Nowa, vaavaa maahi yaaphin’yaaya, achu oonanara murima yaatoloxiwa moohilekela. Moolikana ni mahiku a Loti, vaavaa mooro waakhurunwaaya wirimu, achu oonanara murima yaarimeela. Yesu aaloca: “Onii weereye hiiha tho, nihiku na wuupululiwa mwaana a muchu.” (Luka 17:27-30) Ekwaha yeelatho, “mootutusha enamutoloshiwa” achu oonanara murima. (1 Tes 5:2, 3) Nthowa na yeela, nnaphwanela ororomela ni murima woothene wi Yehova harwa eemererya wi elapo ya Satana etitelele okhala naari mano opwahiherya nihiku nimoha mwawiiwanana ni ekhaikhai awe.
(2 Pedro 3:11, 12) Vawi ichu soothene seiha inamutothowa, nyuwo munii mukhaleke awiihayi? Mukhaleno meecelo aweela oomucicimihano Muluku, 12 muwehereryaka nave mwaakuvihaka orwa wa nihiku na Muluku, nenlo erimu eneeraaya enyewe ni mooro, sa wirimu itothowe ni oviha.
w06 15/12 epaax. 19 epara. 18
“Nookhuveela Nihiku Ntokotoko na Apwiya”
Haavo mathowa a wiikoha ntakhara heeni murummwa Pedro oniloponleeiye ariki nikhaleno mmuupuweloni “orwa wa nihiku na Muluku.” Nni neereno hai yeela? Mukhalelo mmoha ori okhalano “meecelo aweela oomucicimihano Muluku.” (2 Ped 3:11, 12) Okhala ooweiwa ni miteko seiha inahaala onikhaviherya oweherya ophiya wa “nihiku na Muluku.” Nsu Neekiriki ntaphuleliwe “mwaakuvihaka”, mwawooneya nnataphulela “ochimakiha.” Hiyaano hannawerya ochimakiha naari waakuviha elukuluku ehanle wi niphiye nihiku na Yehova. Nyenya, niweheryaka ophiya nihiku nlo, elukuluku enahaala ovira mwawaakuveya wakhala wi nri ooweiwa mmuteko wa Muluku.—1 Kor 15:58.
Mphwanye Muhakhu Woomunepani
(2 Pedro 1:19) Hiihaa, masu a alipa a miririmo annatikithereya wa hiyo. Munneerano phaama othokororya yaala, ari ntoko muthuko onamwaleela mwiipiphini, ophiyerya oshilevo, nivorosho nnaaryela mmurimani mwanyu.
w08 15/11 epaax. 22 epara. 2
Miyaha sa Vasulu Sinarweela mu Ekaarata ya Tiyako ni Pedro
1:19—Taani ori “nivorosho,” tiliini owo okhummeiye, nave nni nroromele hai wi eyo yoheereya? “Nivorosho” ti Yesu Kristu ntoko Mwene a Omwene wa Muluku. (Wup 22:16) Mu 1914 Yesu aakhala Mwene aalaiheryiwe a soopatuxiwa soothene, alaleyaka oxa wa nivorosho nawaarya wa nihiku nivyaani. Otatuxiwa wa Yesu waavaha onamoona wa yaweereya ya muhoolo vooloca sa woonihiwa ovuwa wa Yesu ni owerya wawe wa Olamulela, yooniheryaka ororomeleya wa masu ooloherya a Muluku. Wiiwexexa phaama masu yaala onnamwaleela mirima sahu, nave mmukhalelo yoola, ninnasuwela wi Nivorosho nookhuma.
(2 Pedro 2:4, Tradução do Novo Mundo) Mweeparipari, Muluku hoovelenle waalaka ankeelo yaachenke, nyenya owo ahaavonyerya mu Tartaru, emakiwe ni epiiphi wi ekhapeleliwe ophiyerya nihiku na othoriha.
w08 15/11 epaax. 22 epara. 3
Miyaha sa Vasulu Sinarweela mu Ekaarata ya Tiyako ni Pedro
2:4—“Tartaru” tiheeni, nave ti liini ankeelo oomwareya aneeraaya evonyeryiwe mummo? Tartaru ori mukhalelo yoowo onalikana ni ekariposo, mummu sinawaleliwamo soopatuxiwa soomunepani pahi, ohiya soomwiilini. Ori okhala mu epiiphi etokweene yammuupuweloni vooloca sa soochuna sootikhiniha sa Muluku. Yaawo ariheliwe o Tartaru haano ewehereryo ya muhoolo. Mmahiku a Nowa, Muluku ohaarihela mu Tartaru ankeelo oohiiwelela, nave awo ari mmukhalelo yoola ophiyerya nihiku eneeraaya etoloxiwe.