Wiicela Wa Omuyeleela Oosiveliwaahu

“Sofiyaa ni miyaano noomaliha iyaakha opwaha 39 nthelanne vaavaa ereca yaamukuserenryaaya emaliha okumi awe. Kaahikhalano nikhaviheryo nawaaca na asinthamwene, nave kaanakhala ooweiwa. Nto mu eyaakha yantero, kaahoona wiicela otokotoko. Kaahoona wi nkaawerya ovareryela moonelo aka. Naamwi hiihaano, sivinre iyaakha raru amanle okhwa, ikwaha ikina kinnavoloweliwa ni wiicela wa mmuupuweloni, nave eneereya mootutusa.”—Kosta.

Apwanne moomuyeleela oosiveliwaanyu mookhwani? Yaari yeeyo, akhweya munanwerya wiiwexexa muupuwelo wa Kosta. Ichu vakhaani sinnaneeriha okhala oothanana, nto okhwa wa iyahu, mwaarihu, makholo naari nthamwene naamusivelaahu echu eniicelaxa. Alipa ootholathola anahuserya wiicela wa muchu okhweliwe anneemererya yeeyo. Mwaha mmoha olaleeryiwe mu erevista ya pisikoloxiyab, o Estatu Unitu waahithariha wi okhwa oyeleela otokweene nthowa nawi hiyaavo nnaphwanelaahu opaka. Vaavaa nnavilelaahu wiicela wa mukhalelo yoola, akhweya ninniikoha: ‘Ophiyerya elukuluku taani kinahaalaaka okhala hiiha? Apwanne kinamukookela okhala oohakalala? Tiheeni kinaphwanelaaka opaka wi kihakalale?’

Maakhulo a makoho yaala anahaala othokororiwa mu erevista yeela Vinyani! Waakhanle wi moomuyeleela muchu mookhwani mwa hiihaanoru, tiheeni eni yookhaviherye? Mwaha onacharela onahaala wooniherya echu anaamukhwele ancipale anoonaaya ni makacamiho anakumanaayano. Miyaha sikina sinamookhaviheryaani osuwela echu yaweera wi mvoothe wiicela.

Waakhanle wi nyuwaano munneeteteya nthowa na omuyeleela muchu, ninnaweherya wi erevista ela enamoohakararyaani ni ovaha nikhaviheryo noophara muteko mu elukuluku yeela yoovila.