Masu a Muluku Aakhalano Owerya mu Okumi Anyu wa Nihiku Nnihiku?

Omwaalakhanya Piipiliya nihiku nnihiku onanwerya onikhaviherya okhala “òthipeleya” ni “òlipa munroromeloni.” (Kol. 2:6, 7) Nyenya, wi Masu a Yehova ekhaleno owerya mu okumi ahu, nnaphwanela ohuserya ni opharihela malakiheryo aya. (Ahe. 4: 12; Tiy. 1:22-25) Yosuwa 1:8, Tradução do Novo Mundo, onnaloca makhalelo mararu oochuneya a waalakhanya: (1) Waalakhanya Masu a Muluku “ohiyu ni othana.” (2) Waalakhanya “vathi vathi,” onaahiwa waalakhanya makupa oophwanelela yaawo anahaala wookhaviheryaani wuupuwelela saweereya ni makhalelo aya. (3) Waalakhanyeke ni “ochariheke iri mwemmo.” Opharihela makhalelo yaala, enahaala onikhaviherya “okhumelela phaama”ni “weera mwa miruku” mmahiku oothene a okumi ahu.