Okumi mu Paradaiso Waari wa Mukhalelo Taani?

Yehova aamvaha Aatamu ni Haava ichu sincipale saphaama. Mapacereryo 1:28

Yehova aampatuxa muthiyana oopacerya, Haava, nave aamvaha Aatamu wi akhale mwaariye.​—Mapacereryo 2:21, 22.

Yehova aahaapatuxa awo ni muupuwelo ni mwiili woophaameya woohikhalano yoocheka.

Nipuro naya na Paradaiso yaakhalaaya yaari emaca ya Eeteni​—nipuro noreera vancipale naarino muhice ni miri sa sawiima nave ni axinama.

Yehova aahaaleela awo nave ahaahusiha yaawo. Waakhanle wi awo yaamwiiwelela Yehova awo yaamukhala okhala wookhala mu paradaiso veelaponi yavathi.

Muluku aamuleela Aatamu ni Haava wi hiyaaphwanela olya mmoha wa miri. Mapacereryo 2:16, 17

Yehova aamooniha Aatamu ni Haava mwiri mmoha wa yawiima mu emaca nave aahaaleela wi wakhala wi awo aalya yawiima ya mwiri owo yaahaala okhwa.

Munkeelo mmoha aamwaryeya moovanyihana ni Muluku. Munkeelo owo oonanara ti Satana Musaserya.

Satana haachunne wi Aatamu ni Haava emwiiwelele Yehova. Mwawihiihaa owo aapharihela muteko enowa omuleela Haava wi wakhala wi oolya yawiima ya mwiri owo, haahaala okhwa, nyenya ahaala okhala ntoko Muluku. Chiryene, eyo yaari yawootha.​—Mapacereryo 3:1-5.