Echu yoothananiha wa athiyana yaala vaavaa anoonaaya wi munihiyeni hiwaamo echu. Mariya Matalena onnachimakela wa “Simoni Petro ni wa óhuserya mukina yowo Yesu ámusivenliye”—murummwa Yohani. (Yohani 20:2) Mu elukuluku yeeyo, athiyana akina yaawo ahanle va nihiye annamoona munkeelo. Nave mpuwa mwa nihiye ookhalawo munkeelo mukina, yoowo “awanre sawela.”—Marko 16:5.

Munkeelo mmoha onnaaleela athiyana awo: “Muhituthuwe! Munamwasya Yesu o Nazaré athomeyiwe [vamwirini]. Owo òvinya mokhwani, và khavo. Mone nipuro nene ataleliweiyevo. Vano muye mwalèle amuhuseryawe ni mwamulèle Pedro, mwere: owo onoholelani ayaka o Galileya. Weiwo muneranyu mmonewo, ntoko alontxeiye.” (Marko 16:6, 7) Mwawiihiiha, athiyana ala “esaren’ye wova ni ehakalanle,” annachimaka wi yaaleele arummwa.—Mateu 28:8.

Vano, Mariya onnamphwanya Petro ni Yohani. Iichaka miwiya, onnaloca: “Àhavìhamo Apwiya munihiyeni, nave hinsuwenle akun’hayawo.” (Yohani 20:2) Petro ni Yohani annapacerya ochimaka. Yohani onnatepa ochimaka nave topacenrye ophiya o nihiye. Owo onnavareryela mpuwa mwa nihiye nave onnoona ikuwo, koma hanavolowa mpuwa.

Vaava Petro onaphiyeiye, onnavolowa mu nihiye. Onnoona ikuwo sa liinyu, ni ekuwo yaahuruweliweno muru wa Yesu. Yohani onnavolowatho, nave onnaroromela yoolokoha ya Mariya Matalena. Moohipwacha yeeyo Yesu aalonceiye wuupaceryani, haavovo naari mmoha a yaawo oniiwexexa wi owo ooviihiwa mookhwani. (Mateu 16:21) Annachikela owaani eri oohaleeliheya. Nave Mariya, yoowo okookenle o nihiye onnatitelela okhala weiwo.

Mu elukuluku yeela, athiyana akina ari mphironi eyaaka waaleela arummwa wi Yesu ooviihiwa mookhwani. Vaava awo anachimakaaya wi yalokohe yeela, Yesu onnakumana ni yaawo nave onnaloca: “Moni!” Awo annuuwela vamiithoni vawe “enamwepesa.” Voocharela Yesu onnaloca: “Muhòve! Muye mwalèle asinnaka wi eye o Galileya. Weiwo anamukònawo.”—Mateu 28:9, 10.

Woopaceryani, vaavaa aakhumelenleiye mwaacikinye nave ankeelo erwa, anakhoco ale yaalipelela nihiye “yàpatxerya othukumela, nave ekhala ntoko òkhwa.” Emanle ovinya, yaavolowa mu epooma nave “yàlèla asitokwene a alipa a mukutxho sothesene seren’ye.” Voocharela anamukucho yaaya ovaanela ni asitokweene a Ayuta. Yaahipaka yoolakelela ya waavaha makhwankwa anakhoco wi ekhuwe mwaha owo nave eloce wi: “Hiyo nrupaka, àrwa ohiyu amuhuseryawe ni emwiya.”—Mateu 28:4, 11, 13.

Nlamulo na akhoco o Roma naaloca wi wakhala wi anakhoco aarupa va muteko woolipelela, awo yaaphwanela okhwa. Mwawiihiiha anamukucho yaahaaroromeliha: “Ela [wootha waya wi yaamukona] yiweya wa chamasowa, hiyo n’narwa-nimuthoríherya, nave n’narwa-niwerelani nyuwo wi muhipe murima.” (Mateu 28:14, Nlakano Nahihano) Anakhoco annaakhela makhwankwa nave anneerano yeeyo anamukucho aloncaaya. Mwawiihiiha mwaha wawootha wawi mwiili wa Yesu wohiiyiwa onnamwaramwaxeya variyari va Ayuta oothene.

Nlelo Mariya Matalena onamwiikhupanyerya o nihiye. Vaavaa oneemeleiye awehaka mpuwa mwa nihiye, onnawoona ankeelo eeli awanre saweela. Mmoha okiraanthe makupa a waamuru weiwo mwiili wa Yesu waateleliwaayawo, mmoha o inaani sawe. Awo annamukoha: “Muthiyana, oninlelani?” Mariya onnaakhula: “Àmukusa Pwiya aka, ni nkisuwenle amukun’hayawo.” Arukunuwelaka makupa makina, onnamoona muchu mukina. Owotho onnuuluulela nikoho nipakiwe ni ankeelo nave onnaaceererya: “Muthiyana, oninlelani? Onasya ani?” Mariya uupuwelaka wi mulipa eemaca, owo onnaloca: “Pwiya, warì weyano omukunsemo, okilele nipuro omukun’hawevo, nave miyo kinamuya kamukusevo.”—Yohani 20:13-15.

Mu elukuluku yeela, Mariya onaloca ni Yesu yoowo oviihiwe mookhwani, koma hanamusuwela. Nto, vaavaa Yesu onaloceiye ariki, “Maria!” Onnasuwela wi ti Yesu, amusuwelaka moorweela mwa mukhalelo woonthamwene Yesu onaloceiye ni Mariya. “Rabbuni”, ti wi, muhusiha!, Mariya onnakhuwela moohakalala. Nave, oovaka wi ohanle vakhaani owela wirimu, Mariya onnamphara Yesu mwawaakuveya. Mwa yeela, Yesu onnamulupiha Mariya ariki: “Ohikiphare, wona wi nivano nkiwenle wa Atithi. Nto hawé wa asinnaka ni walèle oriki: kinaya wa Atithi aka ni Atithi anyu, wa Muluku aka ni Muluku anyu.—Yohani 20:16, 17.

Mariya onachimakela weiwo arummwa ni akina athukumannaayawo. Owo onnaaleela yaawo ariki: “Kòwona Apwiya” onnaaceererya yoolokoha ni yeeyo awo amanlaaya wiiwa orweela wa athiyana akina. (Yohani 20:18) Naamwi hiiha, ‘masu yawo anòneya wa Arummwa ntoko masu asiyo.’—Luka 24:11.

Mu nihiku Namurunku, 16 a Nisani, amuhuserya ari ookhulumuwa. Awo haniiwexexa yootaphulela ya ohikhalamo echu mu nihiye. (Mateu 28:9, 10; Luka 24:11) Mu elukuluku ekina mu nihiku nimohamoha, Kleyopa ni muhuserya mukina annakhuma o Yerusalemu eyaaka o Emau, yoowo ori mukwaha wa mastatiya khumi nammoha.

Vaavaa awo aneecaaya, annavaanela vooloca sa yeeyo yeeren’ye. Voocharela muchu oohisuwanyeya onnakhala ni yaawo va mukwahani. Muchu owo onnaakoha: “Ti seni eyo munalotxanyu mwetxaka?” Kleyopa onnaakhula: “Wakhweya weyano mekhà ori mulipa orwa elapo yela yo Yerusalemu, wi ohisuwele itxhu seren’yewo mahiku yala?” Muchu owo onnakoha: “Sawihai?”—Luka 24:17-19.

Awo annaloca: “ltxhu simphatxuwenle Yesu munazaré.” Awo annatitelela oloca: “Hiyo nànaroromela wi ti yowo arwele wopola Isarayele.”—Luka 24:19-21.

Vano Kleyopa ni nthamwene awe annathariha echu ephacunwe mu nihiku nenle. Awo annaloca wi athiyana yaakele o nihiye weiwo aavithiweiyewo Yesu haphwannyewo echu, navetho wi athiyana aheerela onamoona ichu sootikhiniha—aawoona ankeelo yaawo alonce wi Yesu mukumi. Awo annamuleelatho wi akina yaahiyawo o nihiye nave “èphwanya ntoko athiyana yalontxaya.”—Luka 24:24.

Amuhuserya ala hasuwenle yootaphulela ya yeeyo yeeren’ye. Muchu owo oohisuwanyeya onnookolola moonelo aya wooheseya yoowo onaweeriha ohiroromela wi chiryene Yesu oovinya mookhwani. Owo onnaloca: “Atxhu nyu òhikhalano miruku, ni òlekela wemererya sothene salotxiwe t’alipa a miririmu! Vano Kristu haphwanenle ohawa wi avolowe movuwani mwawe?” (Luka 24:25, 26) Owo onnaatharihela Soorempwa sincipale vooloca sa Kristu.

Vookuchula ooraaru annaphiya o Emau. Amuhuserya ala annachuna osuwela sawaaceererya, mwawiihiiha awo annamveka mulopwana owo: “Okhale ni hiyo, wona wi onnila, nave nsuwa ninnamorelamo.” Owo oneemererya okhala ni yaawo, nave annalya vamoha. Vavaa muchu oohisuwanyeya owo onavekeleiye, akawaka ephaawu, nave aavahaka amuhuserya, awo annamusuwela, nto onnacakanela. (Luka 24:29-31) Vano awo annasuwela chiryene wi Yesu mukumi!

Amuhuserya ala eeli annasiveliwa oloca yeela yaaphacuwenle: “Murima ahu hiwananimalamo vale alotxaka ni hiyano mwimphironi, antaphulelaka sorempwa?” (Luka 24:32) Awo annakookela o Yerusalemu, weiwo anaaphwanyayawo arummwa ni akina ari ni yaawo. Kleyopa ni nthamwene awe ehaakumve olokoha, awo annawiiwa akina elocaka: “Eparipari Apwiya àvinya mokhwani ni àhisoneiha wa Simoni.” (Luka 24:34) Voocharela oopiili annathariha mukhalelo Yesu aaphiyenryeiye. Chiryene oopiili anamoona.

Vano oothene annakhala ootikhiniheya—Yesu onnaphiya mu ekwartu yeeyo! Ela enakhala ntoko yooheemereryeya woona wi aawala mikhora soothene ewoovaka Ayuta. Naamwi hiiha, Yesu oheemela variyari vaya. Owo onnaloca moomaaleleya: “Muretxele okhale ni nyuwano!” Koma awo annoova. Ntoko yenraaya woopaceryani, awo ‘anùpuwela wi ori munepa anonaya.”—Luka 24:36, 37; Mateu 14:25-27.

Wi ooniherye wi tahi munepa naari echu ekina anaanyiheryaaya, wi owo ookhalano mwiili woomuchu, Yesu onnawooniha mataawe ni inaani sawe alocaka: “Munovani, nave nthowa na seni iryayamo minikwa mmurimani mwanyu? Mone mata aka ni inani saka: ti yomi! Kiphareni, nave onani wi munepa hiwano mwili nari makhuva ntoko miyo kiryakano.” (Luka 24:36-39) Awo aatepa ohakalala nave annatikhiniheya nto nlelo annakhwa minikwa weemererya.

Mwawaaceererya eereryaka waakhaviherya wi yoone wi ti yoowo ene, Yesu onnaakoha: “Mòkhalano yolya?” Owo onnaakhela nikupa na ehopa yawoosiwa nave onnakhuura. Voocharela owo onnaloca: “Sothene iha ti masu yale kolenlakani kiri ni nyuwano [kihaakumve okhwa] wi innaphwanela wereya sothene irempwe sa miyano mmalamuloni a Mose, mwa alipa a miririmu ni mmasalmoni.”—Luka 24:41-44.

Yesu aahimukhaviherya Kleyopa ni nthamwene awe wiiwexexa Soorepa , nave ti yeeyo oneereiye hiihaano ni oothene athukumanne vaava: “Paripari yòrempwa wi Kristu onahawela ohosiwa ni nihiku naneraru naya avinye mokhwani, nave mwa nsina nawe olaleyiwe orukunusa murima wi ileveleliwe sotxheka sa atxhu a elapo yothene, opatxerya o Yerusalemu. Nyuwano muri anamona a itxhu iha.”—Luka 24:46-48.

Wa nthowa nikina, murummwa Tomasi haavovo. Mu mahiku oocharela, akina annamuleela moohakalala eriki: “Nòwona Apwiya!” Tomasi onnaakhula: “Kahonà makhwatxa a mithipo mmatani mwaya, navetho kahivolihà ntata naka vapararini vaya, nkirwa kemererya!”—Yohani 20:25.

Mahiku mathanu namararu ohoolo waya, arummwa annathukumana wanaawiili mu ekwartu ewanle milako, nto mu elukuluku ela Tomasi ori vaava. Yesu onnaphiya variyari vaya arino mwiili woomuchu nave onnaamwenyerya yaawo: “Muretxele wa nyuwano!” Amurukunuwelaka Tomasi, Yesu onnaloca: “Volihà va ekatha à, nave wone mata aka. Ovolihe ntata nà vapararini vaka, nave ohikhale òhemererya, nto owemererya!” Tomasi onnakhuwela: “Pwiya aka ni Muluku aka!” (Yohani 20:26-28) Aai, vano haanono minikwa wi Yesu mukumi ntoko yoopatusiwa yakuru yomunepani yeeyo enamweemelela Yehova.

Yesu onnaloca: “Vano okònnawe òhemererya. ‘rèriwa [naari oohakalala] ti yawo eni yemererye ehonne!’”—Yohani 20:29.