Emanle ovihiwamo mu emaca ya Eteni, Atamu ni Eva yaakhalano anamwane. Mwaana oopacerya Kayine, aari namalima, ni anawiili Apele, aari mukukhula.

Nihiku nimoha Kayine ni Apele yaapaka mukucho wa Yehova. Onnasuwela mukucho tiheeni? Enaahiwa yoovaha yaphaama. Yehova aasiveliwa ni yoovaha ya Apele, nyenya hasiveliwe ni yoovaha ya Kayine. Kayine aananariwa. Yehova aamulopola Kayine wi onanariwa wawe waahaala omweeriha echu yoonanara. Nyenya Kayine hawiriyanne.

Vanonto Kayine aaloca ni Apele: ‘Hanko neece vamoha mmacani.’ Yeecaka vamoha, Kayine aammana munnawe amwiipha. Tiheeni Yehova enreiye? Yehova aamulaka Kayine akhala ocai wa amusi awe. Kayine heemereryiwe okookela owannyawe.

Nnahuseryavo eheeni? Ti wookhweya onanariwa echu yahineeca ntoko nachunelaahu. Yakhala wi esara ennannuwa mmurimani mwahu mwawaakuveya nnaphwanela omaliha esara eyo.

Woona wi Apele aanamusivela Yehova ni weera ichu saphaama, Yehova onnamuupuwela. Yehova onahaala omukookiherya okumi elapo ekhanle parataiso.

Veelaponi yaakhalavo achu awaaca. Ancipale a yaawo yeera soonanara. Wirimu yaakhalawo tho ankeelo akina oonanara murima. Awo yaakhuruwa wirimu erwa veelaponi yavathi. Woosuwela ntakhara heeni yaaheerano yeela? Awo yachuna okhalano mwiili wa muchu wi yaathele athiyana.

Vaavaa yaathenlaaya athiyana, yaahaayara anamwane. Anamwane awo yinnuwalaaya yaakhala akuru ni ooroxa. Yaanaahooxa achu. Yehova heemerenrye wi awo etitelele waahooxa achu. Yehova aalakelela waatoloxa achu oonanara ni maahi mancipale.

Nyenya aakhalavo mulopwana yoowo aamwiiwelela Yehova. Nsina nawe ti Nowa. Owo ni mwaariye yaakhalano anamwane araru, Semi, Khami ni Yafete. Semi aakhalano mwaariye, Khami aakhalano tho mwaariye, nave tho Yafete aakhalano mwaariye. Yehova aamuruma Nowa omuteka mwaaceya wi owo ni emusi awe echawelemo. Mwaaceya yaari ekaaxa etokweene yeeyo yaahaala owerya okhala vasulu va maahi. Aamuruma tho wi aakuxe axinama wi evolowe mu mwaaceya wi evuluwe.

Nowa aapacerya omuteka mwaaceya. Saaviravo iyaakha 50 Nowa ni emusi awe emutekaka mwaaceya owo. Awo yaamuteka emwiiwelelaka Yehova. Mweelukuluku yeeyo, Nowa aanaalopola achu sa Maahi Mancipale, nyenya haavo muchu achuna onwiriyana.

Ohoolo waya, yaavolowa mmwaaceya. Hanko noone echu yeeren’ye voocharela.