Yohuserya 2

Muluku Ti Nthamwene Aphama Ophwanela Okhalano

Okhala nthamwene a Muluku ti etchu yaphama yeyo yahaala oweerelani. Muluku onahaala wohusihaani okhala oohakalala ni okhala ookhapeleleya; awakihakani wa sororomela sinchipale sootchekeya ni meerelo oonanara. Owo onahaala wiiwa mavekelo anyu nave onahaala wokhaviheryani woona murechele ni ororomela mpuwa mwa murima. (Salmo 71:5; 73:28) Muluku onahaala wosheeryani mu ilukuluku sokachamiha. (Salmo 18:18) Nave owo onahaala wovahani yamahala ya okumi wohimala.—aRoma 6:23.

Vomwachamela Muluku, nyuwo munahaala owachamela asiinthamwene a Muluku. Yalatho anahaala okhala asiinthamwene anyu. Mweparipari, anahaala okhala ntoko asiinninyu ni arokorinyu. Anahaala okhala ni ohakalala wohusihaani etchu volocha sa Muluku, nave awo enarwa yokhaviheryani ni wohakalalihani.

Hiyo hinri olikana ni Muluku. Vavaa oryaaya wawii munavyavya okhala ni onthamwene ni Muluku, onatchuneya osuwela mwaha wotchuneya. Onthamwene ni Muluku tahi onthamwene wa atchu olikana. Owo okhala ni iyakha sinchipale navetho tamirukusha takurusha onipwaha hiyo. Tori Olamulelaahu. Mwawihihaa, naatchunaka okhala asiinthamwene awe, ninnaphwanela onwiriyana ni werano yeyo onanrumiiye. Ela enahaala okumiherya ophamaahu.—Yesaya 48:18.